يأس أصابني

[مشكلتي]

السلام عليكم و رحمة الله و بركاته

سامحوني ان انا ساطيل على حضراتكم ،
من هو مستعد لان يفتح لي قلبه الله يجزيه الجنة و يسعد قلبه ،
و من جاءه الموضوع طويل و عجز يقراه يدعيلي ربي يهديني و يفرج عليا

مشكلتي سببها إعتقاد و تفكير و مبدأ كان أساسي و رئيسي في حياتي ،
وهي اني لا اكلم الرجال في غير ضرورة لا زملاء الدراسة و لا في النت ، لا منتدى و لا مواقع التواصل الاجتماعي ،
و كنت اشعر بعزة و فخر لانو نحس روحي بقيمتي ، الله غالب هذا شعوري او لوكان اتحدث مع رجل في ضرورة و يزيد معايا في الكلام نتقلق ..
لاني ارى انو الفتاة التي تحدث الشباب او الرجال في مواضيع عامة او خاصة تولي ساهلة و رخيصة في نظرهم خاصة و ان معظمهم نياتهم شوية شوية .. و مكاش اسوء من انو البنت تحس نفسها لعبة في ايادي الشباب او انها رخيصة او سهلة المنال او لي جا يهدر معاها في اي حاجة ،
هذا لا يعني اني ما هدرت حتى مع احد لكن في الضرورة فقط

المهم كنت عايشة بهاذ المبدأ و كنت فرحانة بيه لانو اهم شيء عندي هو سمعتي و شرفي و قيمتي و احترام الآخرين لي،
و المشكل جاني و بدا من موقع تواصل اجتماعي ، انا لم اكن اضيف الذكور الى قائمة الاصدقاء ، و اي طلب نقوم بحذفو ،
لكن مرة واحد وكان صديق لصديقتي ارسل لي طلب فرفضتو عاود ارسل رفضت قعد غير يبعث حتى ارسلت له برسالة و قلت اني مانضيفش الذكور فلا داعي لان تتعب نفسك المهم هو رد باعجاب كيما علابالكم و قعد يشكر و من بعد طلب مني معلوماتي رفضت، انا هذاك الوقت كان عندي سنتين من الالتزام اللي من الله بها علي و تعرفت على ربي اكثر و كنت على نيتي و اي واحد نشوفو مشي على الطريق نحب نعاونو ( البنات طبعا) المهم زين لي الشيطان طبعا وليت نقول مسكين او بالاك ماعلابالوش او راكو عارفين .. وبدات ننصحوا و ... الخ و لما يطلب معلومات او الحديث نرفض من بعد بسبب صديقات الله لا يربحهم اعطاولو معلوماتي و حتى لقبي او واحدة جارتي زادت عطاتلو العنوان !! و زادو مدحوني و شكروني لما سالهم عني ! انا نصدمت من بنات ما يعرفوش الامانة ،
المهم هو حلولو عينيه عندو كلش لوكان ماعرف علي والو لوكان ماطمع فوالو ، حتى قالي انا نيتي الحلال و ناوي نكمل ، انا نصدمت قمت بحظر حسابو باش مايلقانيش، زاد حل آخر و قعد يتبع فيا و هبلني حتى للاسف استدرجني الشيطان و من النصح وكذا حتى ولا الحديث عادي للاسف ،
هو صح ماتمسخرش بيا و كانت نيتو نية حلال لكني لا ارضى مهما كان الهدف شريف انو الطريقة تكون حرام ،
المهم العلاقة علم بها والداي و امي وبختني كثيير و فهمتني وقالتلي هذا مشي راجل والراجل الصح عمرو ما يهبل الطفلة و لا يزعجها و لا يسلك الطرق الملتوية ، هو حاول كم من مرة يتصل بابي لكن ابي لا يرد عليه ولازال الى اليوم يعاود المحاولة و اخبر ابي برغبته في الخطبة لكن ابي لا يرد عليه اي رافض ...
طبعا انا تعذبت وعانيتت كثير وهذا طبيعي من علاقة محرمة

انا عمري ماتوقعت اني تكون عندي علاقة حرام مع شاب ،
و ان شاء الله تلك الاولى و الأخيرة لكن ما الفائدة هذا خطأ لا ينسى و يكفي انو يكون وحدو بلا ما يتكرر لا يغتفر عندي
كانت من سابع المستحيلات حتى اني كنت لما اسمع داعية يتكلم فيها نغير القناة و لا نقرا ليها و لا تهمني ،
لاني كانت عندي بديهية اني لا اقيم علاقات ولا نحوس نتكلم معاهم،
لحد الان مانيش مصدقة واش درت و كانها ليست انا،

انا صح تبت لله لكني ماقدرتش نسامح نفسي كيما حاولت مقدرتش،
و الآن منقدرش نعتز بعفتي ولا اني ماكلمتش الرجال لاني فعلت ابشع من ذلك ،
و تلك كانت اكثر شيء يعزز تقتي في نفسي وعاطيني قوة شخصية ،

الآن اشعر بيأس كبير، لا هدف عندي ،
نحس اني وسخة و عفتي راحت مع تلك العلاقة ولن تعود ،
اشعر اني لا اصلح لان اكون في المستقبل اما فاضلة او زوجة صالحة ،
راني كسلانة كثيير ،
للاسف حتى في امور ديني لاصلاة نحس بيها ولا قرآآن ببساطة قلبي باارد ميت قاسي او بالاحرى لا قلب لي ،
حتى الاعمال المنزلية اهملها نعملها بالسيف اذا طيبت بلا نفس ، اذا نظفت كيف كيف ،
كانت عندي اهداف كبيرة لهاذ العطلة اولها حفظ القرآن ، نحسن مستواي اللغوي .. لكن ماحققت والو و هذا زاد احبطني اكثر

اصبحت ضعيفة الشخصية خايفة مبادئي تروح واحد وراء الآخر، وانا في اشد الحاجة لان اتمسك بيها
ثقتي في نفسي لآ داعي لان اتحدث عنها فهي تحت الصفر

هل من حل؟
كيف استرجع قيمتي؟ كيف اعيد بناء ثقتي في نفسي ؟ كيف اقوي شخصيتي؟


اشعر انو ماعندي حتى قيمة !
نحس انو مانيش حرة !

سامحوني على الاطالة و ارجوكم لا تأنبوني يكفي ما انبني ضميري ،
و والله شاهد علي كانت نيتي خيير و والله مانويت اقيم علاقة و لكن حدثت هكذا بسبب غفلتي و تهاوني و نيتي ،
وعمري ما رضيتها و لا راضية عليها ولا رايحة نرضى عليها ..