عندك بيضة واحدة ... ارواحي نقولك وش ديري بيها

[عبير ريمة]

ساعات تحلي لفريجيدار تلقاي حبة بيض وحيدة يتيمة و تكونو حابين حاجة حلوة نشربو بيها القهوة لعشية او تفطرو بيها الصباح، الحل عندي ، را ني جبتلكم وصفة نتاع قاطو اقتصادي جدا ببيضة واحدة فقط تبعوني اليكم المقادير و الطريقة و الخطرة الجاية ان شاء الله نحطلكم الصور

المقادير
- بيضة
- كاس ماء ( 250 مل ) او حليب
-3 ملاعق اكل كاكاو
- 5 ملاعق اكل زبدة ذايبة أو زيت
- 170 غ سكر ( 8 الى 9 ملاعق اكل)
- 200 غ فرينة ( حوالي 12 ال 13 ملعقة اكل)
- 2 باكيات خميرة الحلوى

التحضير

سخني الفور على 180 درجة
في ليان خلطي بالباتور الماء مع الكاكاو مع البيضة حتان تشكل رغوة ( أنا استعملت خلاط العصير)

زيدي السكر و خلطي و مبعد الزبدة أو الزيت

خلطي الفرينة مع الخميرة وحدهم و مبعد ضيفيهم للخليط الاول و الاحسن تكملي التخلاط بالفوي باه ما تضربيش بزاف الخليط

ادهني المول اللي عندك : مربع 19 سم او دائري قطره 20سم أو مول الكيك، او حتي لي مول نتاع المادلان .
فرغي الخليط في المول نتاعك ، و دخليه يطيب ، و عسيه نتي تعرفي الفور نتاعك .
كي تخرجيه زينيه كيما تحبي

هاهو واجد

و بصحة و الراحة.





ملاحظة : يجب مراعاة حجم المول اللي عطيتهولكم باه يجيكم طالع كيما لازم
راهو يجي يشبه الى حد كبير البراونيز

ارجو انكن استفدتن
لا تنسوني من صالح دعائكن انا في حاجة اليه