طريقة طياب الأرز من مطبخي

[إلهام07]

البسملة1


مساء الخير حبيباتي وصحة عيدكم ........ إن شاء الله تكونو عيدتو بالصحة والهناء


على بالي وعدتكم بوصفة الأرز وطولت عليكم بزاف واليوم درت القلب وقلت نحطهالكم باش جربوها راهي بنينة وخفيفة وتعجب كل العائلة وتعرفوني مانحطش وصفة غير لا كنت متأكدة من انها تنال إعجاب الجميع .

الوصفة هنا ساهلة وبنينة وسريعة وأهم حاجة ماتخمجوش ماعن بزاف يعني لا برمة لا كسكاس غير الكوكوط فقط .
هذي طريقتي ، أنا ديما نحب نطيب الارز في المرق باش يشرب الصوص بدلا من الماء ويجي بنين .

وما تخافوش وتقولو راهو مافيهش مرق يجي ناشف لالا يجي طري وفيه رطوبة ماتحتاجوش أصلا للمرق أنا بابا ماياكلش الشايح وهذا ياكلو عادي حتى جربوه باش تفهمو قصدي

هذا هو الارز اللي خدمت بيه هايل خفيف ولذيذ ومايعجنش صراحة ملي جربت أرز البسمتي وليت مانقدرش ناكل الارز العادي




بما أنو ماما تحب الارز بزاف نطيبو بزاف وهذي الوصفة مهداة إلى أمي الحبيبة .



المقادير : ( الكمية لأربع أشخاص )


* 1/3 كغ أرز بسمتي ( ممكن تعوضوه بأرز نتاع بلادنا يكون مفور هذا شرط أساسي بصح بالبسمتي يكون بنين وخفيف بزاف وفرق كبير في الطعم ) = حوالي كاس ونص أرز
* 1 فلفل حلو مقطع شرائح او مربعات صغيرة
* 1 فلفل حار مقطع شرائح او مربعات صغيرة ( هذا اختياري للي يحب الحار )
* 2 حبات جزر مبشور سواء رقيق او خشين كيما تحبو
* 1 حبة بصل متوسطة مقطع شرائح او مربعات صغيرة
* دجاج حسب أفراد العائلة ( أنا استعملت 2 أفخاذ كبار )
* 2 مكعبات مرق دجاج ( ماجي )
* 3 فصوص ثوم مقطعة شرائح
* 3 ملاعق كبيرة زيت + 1 ملعقة كبيرة زبدة
* التوابل :
- 1 م ص ملح
- 1 م ص فلفل أسود
- 1 م ص ثوم بودرة
- 2 م ص كسبر
- 1/4 م ص فلفل احمر ( حلو أو حار حسب الذوق )
- 2 أوراق رند
- ساعات نزيد معاه شوية كركم للتلوين ( اختياري )




* لتحمير الدجاج :
- 1 م ص زبدة
- 1/2 م كبيرة عسل
- 1 م كبيرة موطارد
- شوية هريسة انا اللي عندي حلوة ماشي حارة ( هريسة بروقة حطيت ملعقة كبيرة )
- رشة خفيفة ملح فقط
- رشة فلفل أسود
- رشة بودرة ثوم
- رشة فلفل أحمر


الطريقة :

1- أول حاجة وقبل مانبدى نكيل الروز نتاعي في كاس ونتذكر قداش حطيت أرز ونفرغو في صحن كبير وغامق ونغسلو مليح ثم ننقعه في الماء البارد ونخليه من 1-2 ساعة لازم هذي العملية باش الارز من بعد مايجيش معجن .




2- نوجد الخضر: يعني نقشرهم ونغسلهم ونقطعهم ونحط الزبدة والزيت يسخنو ونبدى نحط اولا البصل والفلفل والجزر يتقلاو مليح مليح وبدون ملح على نار متوسطة حتان يذبلو مليح وينشفو من الماء ويبداو يكتسبو اللون الذهبي ( باش يجي الروز بنين لازم يتقلاو مليح )
البصل والفلفل تحبو تقطعوهم شرائح إذا حبيتوهم يبانو او مكعبات إذا ماحبيتوهمش يبانو
ايضا الجزر ممكن ترابيوه في الجهة الرقيقة او الخشينة إذا حبيتوه يبان أنا عن نفسي نحبهم مكعبات خير




وهنا كي تقلاو وبداو يتحمرو





3- نضيف الدجاج والثوم ونقلي مليح ... انا دايما ما نقويش للنار ونقلي بعقلي باش جي الماكلة بنينة وديما نخدم فوق الكانون الصغير



4- بعد مايتقلى الجاج مليح نضيف التوابل والملح ومكعبات الماجي (نحتفظ بقطعة صغيرة جدا من مكعب ماجي أقل من ربع مكعب نخلطها مع توابل تحمير الدجاج ) و الرند ونقلي دقيقة واحدة.
ماتقولوش 2 مكعبات ماجي بزاف لالا كي تكون وصفة فيها روز يطيب في المرق لازم 2 وحدة للروز ووحدة للمرق .



5- نمرق بالماء بحيث تكون كمية الماء كالتالي : لكل كأس أرز نحط 2.5 كاس ماء ( لهذا قلتلكم تكيلو الارز قبل النقع ) .




6- بعد ما يغلي المرق نغلق الكوكوط ونخليها على الكانون الصغير نتاع الكويزينييار باش يطيب الدجاج براحتو بدون ما ينشف المرق ( نخليها حوالي 30-40د على الأكثر ونطفي ) .

7- في الوقت اللي تكون المرق يطيب نوجد توابل تحمير الدجاج في صحن ونخلطهم مليح ( من كل حاجة حطيت على راس المغرفة برك خاصة الملح رشة خفيفة خلاص )




8- نفتح الكوكوط وننزع قطع الدجاج من المرق ونصفيها مليح مليح مليح من المرق لازم تتصفى مليح ونخليها على جنب في صحن .

9- هنا خطوة مهمة ، انا بميز عيني نقدر نعرف إذا المرق قليل ولا بزاف على الارز انتوما إذا ماعندكم ميزان في عينيكم مع الارز ننصحكم نقصو شوية من المرق في ماعون ثم صفيو الارز نتاعكم من الماء ونرميه في المرق ونخلط ونشوف إذا نكمل المرق كامل ولالا يكفي لازم مستوى المرق يغطي الارز فقط مايكونش اكثر لانو أرز البسمتي رقيق يطيب ثم ثم خاصة كي نقعناه في الماء . انا مالف يجيني ديما المرق قدقد مع الارز عمري لا نقصت منو طبعا المرق لازم مايكونش زايد وإلا الارز يطيب بزاف ويعجن ومايكونش قليل باش يطيب الارز مليح
إذا استعملتو أرز عادي ماشي بسمتي ( طبعا لازم يكون أرز مفور ) يكون مستوى المرق يغطي الارز واكثر منو بحوالي 2سم لذلك إذا درتو أرز عادي نكيل لكل كاس أرز 3 كيسان ماء لانو مايطيبش بسرعة كيما البسمتي .
نصيحتي ديروه بالبسمتي لذيذ جدا وخفيف .

لاحظو الارز مازال يبان تحت المرق


هنا لاوم تذوقو الملح إذا خص الملح زيدو شوية لأنو من بعد كي يطيب ماكانش كيفاش تزيدولو الملح مالازمش تخلطوه كي يكون يطيب ولا بعد الطياب يتفتت .

10- بعد مانخلط الارز مع المرق باش يتخلطو مليح المكونات ( لازم الكوكوط هنا تكون على الكانون الصغير ) بمجرد مايغلي المرق نقص للنار خلااااااااص أقل مايمكن ونغلق الكوكوط ونخليه يطيب براحتو راهو مايطولش بلاك ربع ساعة او اكثر شوية المهم كل شوية طلو عليه ( ندخل شوكة او ملعقة على الجنب ونحي الارز بالشوية باش نشوف القاع نتاع الكوكوط منين نشوف المرق نشف تماما وشربو الارز نلقاه طاب على البخار )
* ملاحظة مهمة جدا : الارز مانحركوش خلاص كي يكون يطيب باش مايتفتتش غير نطل على الحاشية إذا نشف المرق نطفي النار عليه .

11- في الوقت اللي يكون الارز يطيب نرمد قطع الدجاج نتاعي في خليط التوابل ونحطهم في كيس شواء وندخلهم للفرن في الرف الوسطاني ونشعل النار من فوق ونحمرهم على الجهتين أيضا الجاج مايطولش ثم ثم يتحمر ( السبب اللي خلاني نديرهم في كيس الشواء باش ماينشفش الدجاج .





12- ونقدم الدجاج بالصحة والهناء أنا طبعا درتو عدة مرات لذيذ جدا وعائلتي دائما تطالب بالإعادة وبالوصفة أيضا مازال ماعطيتها لحتى واحد أنتم الأولين قبل عائلتي











هنا درتو بلحم الخروف طيبت الروز وحدو مع شوية كفتة واللحم وحدو في كوكوط اخرى حمرتو مليح مع ثوم وملح وفلفل اسود فقط ومرقت غير شوية ماء وخليتو طاب على نار قليلة وكي طاب حطيت الروز وفوقو حطيت الروز وسقيت بالمرق نتاع اللحم جا في الطعم تححححححححححححفة مممممممم




هذو ثاني باللحم نتاع الخروف :














بما انو الأرز من الأطباق المفضلة عندنا جربتو بعدة طرق وصدقوني لذيذ كيف ماكان هاهم بعض الأفكار البسيطة للتغيير فقط لن الطريقة هي هي :

أرز بالأجنحة والقوانص ( لأيام تشومير ) ، التغيير الوحيد أنني زدت معاه شوية هريسة شوية طماطم مصبرة وشوية كمون وكركم
أيضا : الجوانح ماصفيتهمش من المرق كيما في الصور والقوانص غسلتهم مليح ورقدتهم في ماء فيه شوية خل باش تروح ريحتهم
لذيييييييييييييذ جدا حتى بالجوانح




شوفو كيفاش تلقاوه يذرى كل حبة وحدها




أرز مع صوص حمراء بالكفتة : التغيير هو أنو قليت الخضر جيدا ثم أضفت مباشرة الارز المنقوع واستعملت هنا وحدة فقط مكعب ماجي ولإضفاء نكهة شرقية على الارزأضفت شوية شعيرية حمرتها مليح في شوية زيت تعطي نكهة مختلفة للارز و أيضا حطيت توابل : فلفل اسود وملح وكركم وبودرة ثوم وكسبر ورند و حب هال و 2 أعواد قرنفل و قطعة صغيرة نتاع قرفة عود ومرقت بالماء فقط .
عملت صوص طوماط عادية وفيها شوية زيتون مقطع وطيبت فيها الكفتة بعد ما تبلتها وخلاص

هاهو طايب وكل حبة وحدها :


وجربتها أيضا بنفس الطريقة مع اسكالوب مقطع مكعبات بصح نسيت ماصورتوش ثاني يجي بنين

إن شاء الله جربوها .... رايحة بإذن الله تعجبكم وتدعيولي .


أتمنى ان تنال الوصفة إعجابكن كما نالت إعجاب كل من تذوقها وآسفة على التأخير


تحياتي ............... لهومة