مشكلتي 26

[مشكلتي]

السلام عليكم ورحمة الله تعالى وبركاته

أول شي أنا راني طامعة ترايو عليا لأن هذا المشكل والله غير عياني
المهم أنا عندي 24 سنة مابقاليش ونغلق 25 على كل حال على وشك انها الدراسة الجامعية ماستر يعني بقاتلى ميموار ادعولي .............مخطوبة منذعام ونصف لشخص لطالما تمنيت مواصفاته من دين خلق وحسدوني بزاف عليه حتى المتزوجات حتى ضنيت انهم حابين يعاودو الزواج........والله غير في هاد الدنيا هم يضحك هم يبكي
المشكلة راهي في عائلتي بصريح العبارة ماعلابالهم بوالوا لا بتجهيزات ولا غير ذلك وكي نحكي معاهم يقولولي اومبعد علاش راكي مقلقة وكي فاتو هذ اليامات كامل ومادرت والو سورتو معا الغلا راكم عارفين ولاو يقولولي الله غالب واش نديرولك مع العلم أننا لاباس علينا من ناحية المستوي المادي والدي مهندس طرقات هما حاجبهم الحال والسيد....الخ بصح ضاربين النح لدرجة أنهم ملي تخطبت مدولي تسعمياتلف لاأكثر ولاأقل جابتلي نص حاجة......... يعني معندهمش ثقافة تجهيزالعروس بأي شكل من الأشكال والوالدة دايتها غير لسكات والله ماراني حاسة روحي كي لبنات مانيش مأمنة ولا حاسة بلى انا حنتزوج علابالي بلي راكم تقولو هادي واش بيها تحكي على الماديات الصح فالهنا بصح قولولي واش مالهنا يجيني اذا انا معا روحي ماشي مهنية علابالكم لازم قش العروسة وحوايج التصديرة مش معقول ندي حوايجي القدم نتاع درك أصلا مايصلحوش لأنو فرق بين الفتاة كي تكون عزباء وكي تولي متزوجة ولا منهاري نصبح عليه اشريلي مالقيتش اش نلبس...... وانا والله ماراني نحوس على صوالح بزاف راني نحوس غير على اللازمة والضرورية قدام الناس
وشي لي راهو قاهرني أنو خطيبي فكل مرة يسالني واش راكي ديري واش راكي تشري واشراكي توجدي أنا فكل مرة نقلو كي نجي وتشوف باش نتهرب مالموضوع بصح راهو غير يأكد قالي باش نتفاهمو لي ديريها منديرهاش ولي نوجدها نقصيها انت ويدا كاش ماخصك نعاونك وانا ماني دايرة والووووووووووو مسكين واش يعاون واش يخلي وماقدرتش نقولو جاتنى طايحة وتبهديلة جابلي ربي ربي لوكان نصارحو حتنقص قيمتي وتتكون عندو صورة ماشي مليحة على دارنا الى هوما فالحق كي نطلب منهم صوالح ليا نستعملهم في هاذ الوقت ميردونيش بصح انا نهدرلهم على الجهاز وهما يضربوهم الجنون هي صح ماشي بيدي بصح والله غير حصلت اش ندير خصوصا أنو هاد اليامات ناويين نعقدو ويمدلي الصداق والعرس بعد 5أشهر
منكذبش عليكم مادام حالتي هكدا مارانيش حابة نفوت فالأمور الإدارية ونحصل روحي راهو يقولي راسي نفسخ الخطبة ونهار الى نخدم ويولو دراهمي في يدي اذا جاني مكتوب نتزوج ويذا ماجاش راني مريحة هذا هو زهري بصح راني خايفة نندم صح هو الرزق على ربي بصح مع عائلتي لاحياة لمن تنادي مانضنش أنا في عام ونصف مادارو والو حتى يديرو في 5 أشهر ومايضحكني فيهم أنهم يراقبوني وكل مانغلط بكاش جازت يقولولي هادو طبايع راكي دايتهم معاك للناس و الله غيرحيروني دخلوني في زنقة الهبال راني نمشي ونقول نبطل نحبس وكي قلتها البارح للما قالتلي ببردة أعصاب تامة بطلي واش حبيتيني نقولك..........وا أسفي على مستقبلي
من فضلكم أرشدوني راني خايفة ناخذ قرار نندم عليه بالخصوص اني متعبة ومرهقة من كثرة التخمام
وجزاكم الله خيرا مشكورين مسبقا

[- بصمة خير -]

ماتقوليش في عام و نص مادارو والو واش رايحين يديرو في 5 اشهر

نقولك من حياتي كاين مواقف نكون اشهر نوجد و ماتصلحش في يوم واحد نخلصها
باذن الله وحدو

ان شاء الله تخلص لجهاز تاعك في الوقت
لاعود راهم يسناو في العقد باش يبداو يوجدو

و زيد راكي تفراي عندك المنحة
وين ماتسمعي كاين لبسا و الا صبابط و الا حوايج التجميل
des occasions
اشري

ربي يوفقك و يكمل و لكن ماتبطليش من لزواج خلاص
حطي ربي في بالك
اختمي القران على نية التوفيق في الزواج
الصدقة
اقراي البقرة كل يوم على نية التيسير
الاستغعار
الدعاء و قت الاذان

[ميمنة الجزائر]

ربي يفتحلك من كل ابوابو

ما تخميش يقدر يكمل العرس في شهر

المهم اعملي مثلما قالت لكي اختنا تاميلة

وربي يسرلك امورك لكن ما تبطليش

اذهبي الى واحد كبير في العايلة يتكلم مع والديك مثل الجد او الجدة

واذا لم يوجد احد منهما تكلمي مع كبير العايلة مثل العمة او الخالة وما شابه

حتى يفهموهم واش راهم يحبو ولكن لا تفسخي الخطوبة

وربي يهنيك انشاء الله

[/زهرة عصفور الجنة/]

لا تخافي كي يقرب العرس ان شاء الله يتهلاو فيك

["زينب"]

لا يا أختي علاش تبطلي مادام إنسان مليح
مدام غادي تعقدو و يعطيك المهر جهزي بيه, و اشري فقط الضروريات و على حساب دراهمك من بعد إن شاء الله الزواج أي حاجة تسحقيها يجيبهالك مدام أنه إنسان كريم و عرض عليك المساعدة حتى قبل الزواج لأنه بعد الزواج تولي من مسؤوليته يشريلك كل ما تحتاجينه
و ربي يسهل و كل شيء يفوت كي لي دارت بزاف كي لي دارت شوية المهم الهنا من بعد الزواج و البركة في القليل خاصة إذا عندك ذوق عالي في الإختيار

[دكتورة بإذن الله]

وعليكم السلام ورحمة الله تعالى وبركاته..

اختي سهليها تسهل ...وش بيك هبلتي تفسخي خطبة على جال ما وجددتيش الجهاز!!

و هذا القرار انسايه خلاص لانه ماهوش قرار و هذا يسمى هروب

كيفاه بقالك 5 اشهر و تولي بدارك ان شاء الله و اولادك تتراجعي على جال حاجة لا تعتبر سبب مقنع ابدا

صديقتي 3 شهرين و جهزت روحها .....صح يكون على حساب صحتك بالصح كلشي يفوت

بالصح كيفاه لازمك تكاثف الجهود خاصة مع من حولك و من هم ثقة في الاختيار و الذوق كصديقاتك بنات خالتك بنات عمتك ..يالوكان وحدك

و تحلي بالصدق و الصراحة مع خطيبك باش يتفهم امرك ..و ارفعي معنوياتك و معنوياته

و التصديرة اكريها

و اعقدي و توكلي على ربي و خليك من وسوسة الشيطان نفسخ الخطبة و كي نولي خدامة نجهز رحي وش هاذي الهدرة ؟؟؟

علاه الخدامات كي يخدمو عنبالك دراهمم تبقى كامل تروح في النقل و الواجبة و عاوني خوك و اختك و شويا صوالح ...دورو ما يبقى

لذلك اختي كوني واعية و ماتخليش الناس لي كانو يحسدو فيك يضحكو عليك و تفاهمي مع خطيبك امليح و الصدق و الصراحة احسن شي

و ربي يسهلك اختي و يمدولك الصداق و تشري واش حبيتي و راهم داركم يزيدو يعاونوك و بالاك لافامي و ما تقطعيش رحمة ربي و ما تحصيش

الرزق منين يجي و كيما قالتلك الاخت ميمنة احكي مع عمتك بالاك تفهم ابوك امليح لانو الرجال ما يفهموش في امور تجهيز البنت

و ثاني خالتك باش تفهم امك ....و راه كلشي يفوت في خير و على خير ....و الف مبروك مسبقا و ما تنسايش تبشرينا باش نفرحو بيك

و ربي يهنيك و يفتح عليك و علينا ........امين ......سلااااام

[الواثق]

جهازك هو مذكرة التخرج بامتياز هههههه.......................راني نمزح فقط.....واش نقلك ..............بصفتي رجل واعرف الرجال صدقيني لو قلتيلو الحقيقة مايصراش كيما قلتي بل بلعكس يحس روحو واحد من العائلة والى من نشتكي هم العائلة الا للعائلة............وزيدي ابشع حاجة للرجل هي ان تطلب منه الفتاة فسخ الخطبة راه يتحول الى شيء اخر من الاحباط .......................والله المستعان .....................وزيدي انت رايحة تتزوجي راجل وهو رايح يتزوج امرأة وهذا هو الاصل ..........................ومستحيل ان تشكي بأهلك بانهم مايفكروش فيك ...................صدقيني راهم مايرقدوش الا ويخمو فيك.....................لكن هوما يعرفو خير منك ..............................وهم ادرى بمصلحتك......................وزيدي انت تشري حوايج قبل نصف عام راني نعرف النساء تاكلهم قلوبهم باه يستعملوهم وزيد تكرهيهم بسرعة وتحوسي على البديل ..................معناه نشريها اليوم ونفرح بيها غدوة خير من نشريها اليوم ونفرح بيها العام الجاي.................................بالتوفيق

[عابر سبيل في وطني]

لا افهم بامور تحضير جهاز الفتاة
سادعو لك في صلاتي

[moslihe29]

اختى العزيزة اذالم تجدى اي مساعدة من الاهل هنالك جمعيات خيرية تساعد الشباب المقبل على الزواج فى التجهيز اذاكان بنتا او ولد وها عن تجربة خاصة من بينه جمعية الاصلاح والاءرشاد فى ولايتك اذهبي ولن تندمى

[طيب القلب]

السلام عليكم أختي لا تقلقي نفسك سهليها تسهل لا تعرفي من أين يأتي الفرج و أمشي قد حالك زوجك عندما يعطيك الصداق سوف يزيل عنك الغمة الي راكي فيها و أفتحي قلبك لزوجك و أحكي له عما يجول في خاطرك سوف يساعدك إن شاء الله لكن بشرط أن تكون مطالبك معقولة بدون تكلف راح يساعدك ان شاء الله عن طيب خاطر و الحياة الزوجية حتى تستمر وتنجح لا بد من تظافر الجهود و التعاون و بالمحبة و المودة تستمر الحياة ...

[الأرض المباركة]

ما تقلقيش روحك راهم يستناو فالصداق تاعك يجي وممبعد وانا ما ضنيتش مايديرولك والو حتى هوما جيهم طيحة قدام الناس وماعليك الا بالصبر فتجهيز العروس لا يحتاج الى اكثر من شهرين والتصديرة ما تقلقيش روحك بيها تقدري تسلفي من عند الاقارب ولا ماديريهاش نهائيا .عقبال ما نسمعو بيك عروسة .

[salima2231]

نقولك حاجة اختي متدايقيش رحمة ربي واسعة انا غادي ندعيلك ربي يفرج كربتك وانتي تاني متنسيش بلي كاين ربي و هو لي يسير امورنا توكلي عليه و صلي صلاة الحاجة باش يسهلك و ادا راكي باغيا تبطلي صلي صلاة الاستخارة و متقطعيهاش حتى ربي يبينلك البرهان و ادا كان مكتوبك هذا حتى واحد ميقلعهلك و لو كانت ظروفك كيما هاك

[عومارعنابة]

قيمة الفلسفة و اثبات ان الفكرة الاطالة منه

[الامل في الله]

شوفي انا من رايي اعتبري بينك و بين نفسك ان والديك فقيران يعني كيف تتصرف فتاة ادا كان والدها لا يملك حق جهازها هل ترفض العريس؟ طبعا لا ثم مهدي لزوجك انك لم تحضري شيئ و قولي له ان والديك يصرفان عليك للدراسة و هكدا كلام حتى تصله الفكره و انت ايضا لا تكثري عليه الشروط فساعديه في شروطه و جدي له الاعدار لكي يجدها لك يوما اخر أو لم لا تتصلي بقريبة او قريب لك و تحكي لهم مشكلتك و تطلبي منها ان توصل المشكل لوالديك على اساس انها هي من لاحظت دلك فربما يهتمان لدلك
و في الاخير اقول لك و الله كل هده الامور كماليات فكما يقال الفايدة في الهناء فهناك حتى من احضرت جهاز اختها او قريبتها امام الناس ثم ارجعته و صارت من عامها تشري على كل انا لا انصحك بهدا الا ان كنت انت و زوجك اتفقتها على دلك

شوفي يات بنتي يعدي العرس و تبقى هده دكرى و كي تقرايها تضحكي عليها

[يارب رحمتك]

صارحي خطيبك يساعدك إذا كان ميسور الحال ..ماتتقلقيش بزاف ..انا كان عندي مرت بابا كي تزوجت قريب هبلت ....وزوجي كان غير كيما بدا الخدمة يعني ....بصح جازت

ولكن راه رايح يعطيك الصداق وديري بيه واش حبيتي ولاتسرفين ..اشري واش لازم وخلاص...