المرحومة فاطنة بنت المداني

[بقة الحاج]

السلام عليكم
الشاعر /الهادي براهيمي
احد اعمدة الشعر الملحون بمدينة حاسي بحبح يكتب /
قرراءة ممتعة

المرحومة فاطنة بنت المداني

يا ربي يا خالقي و انت عالم سهلي يا خالقي كن لي معين
باسم الله نبدا القصيدة على الأم من فراقك يا والدة راني حزين
افراقك يا أم جاني محتم و لازم من الفرقة عليها محتومين
جاب الله مسكين حالو معدم و حليل لي يفارقوه الوالدين
يا جاب الله دير الصبر الوعد حكم و لازم علينا نكونو صبارين
الدنيا تسماط بعد فراق الأم نتفكر بكري كنا مجمولين
في الموسم الخاوة اكل تتلم مزينها ليلة نباتو زهوانين
بنت المداني ديما تتبسم تزها بينا كي نعودو مجمولين
راها سماها فاطنة يلي تفهم من عرش معلوم هلها معروفين
راها سكنت فالقبر و رقدت ثم لا طاقة لا باب لا ترى بالعين
القيتها لقية حنينة بكيت الدم و ببكاو امعايا الناس الحاضرين
اجعل الجنة مأوى لهذي الأم في الجنة العليا مع الصديقين
ثبتها يا خالقي كي تتكلم تنطق بالرسول سيد المرسلين
ونسها يا خالقي و الطف بالأم و ريحها فقبرها و انت حنين
الي جاب القول حالو متألم من فراق الوالدة ديما حزين
الدنيا تسماط عند لي يفهم حتا العز يروح مع الوالدين
يا طايعهم افرح لا تتألم و الدنيا تفنا على الأجمعين
الي عصاهم راه لازم يندم و ما ينفع ندم يخسر الدارين
استغفر الله منيش نعمم غفور و رحيم ذو العرش المتين
اقبل دعانا يا رب الاعظم و اجعلنا يا رب من المتقين
نختم هذا القول ضرك و نتمم و الصلاة على شفيع المذنبين

الشاعر الهادي براهيمي