السلام عليكم
اللهم وفقنا للقول السديد والعمل الرشيد
اهلا بك اختي
صراحة هذه اكثر استشارة اعجبتني
كما انني اعجبت بك واضح انك طيبة ..
وعلى قدر عال من "الغفلة" التي تجعلك من النوع الذي لا يعرف اعداءه جيدا ولا تعرفين سبب المشكلة حقا ... هذا ما يسمى تجاوزا بالنية
من الاخير اختي مشكلتك ماراهيش مع الحجاب ...
شحال لازملك من سنة حتى تعرفي بلي مشكلتك هي الضغط من داركم
و داركم ما يعرفوش يتصرفو للاسف..كاغلب العائلات يشوهو ديننا بلاما يعرفو
تصيبي الراجل (الاخ العم الخال ..وحتى الاب ) ..الصلاة ما يصليهاش اومبعد يترجل على الطفلة "استري روحك "
الحجاب اللي تهدر عليه العائلات هو حجاب تع العادات والتقاليد ..ماشي تع الاسلام
ماكان حتى واحد منهم يحبب للطفلة الحجاب من صغرها ويعرف كيفاش يوصللها الرسالة ويقنعها باش هي تقتنع وديرو ..وتحس روحها "مسلمة"
لان الحجاب من شعائرنا وبيه تعرف المسلمة والمتدينة
اختي ..ديري في بالك بلي الحجاب فرضو ربي ..ماشي يماك ماشي باباك ..وماشي حتى الرسل ... ماعلى الرسول الا البلاغ
وهادي حاجة مفروغ منها الحجاب واجب على كل بالغة ..وبشروطه المعروفة ...
فاذا كنت متحجبة سواء درتيه بالسيف ولا بالرضا فانت مؤدية للواجب..واذا ما يهمكش امر ربي هاديك حاجة وحداخرى !
وربي كي يلزمنا بحاجة ما علينا الا ان نسمع ونطيع
في سورة الاحزاب ، يقول ربنا :{ وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَن يَكُونَ لَهُمُ الْخِيَرَةُ مِنْ أَمْرِهِمْ ۗ وَمَن يَعْصِ اللَّهَ وَرَسُولَهُ فَقَدْ ضَلَّ ضَلَالًا مُّبِينًا (36)}
يعني راجل ولا امراة شيخ ولا شاب امي ولا عالم كلنا مامورون ..اما هادوك اللي راكي حاسبتهم عايشين حياتهم (اللي ماشي دايرين حجاب ويلبسوا وش يحبو ) ماهم الا عصاة -في هذا الامر -
قلتِ بلي درتيه 12سنة .. كاين اللي دارو قدك وقل منك (وانا منهم ولله الحمد )
وحقيقة تحسي بلي ما " فرغتيش قلبك فاللبسة "
هادا امر طبيعي ..مي مام لوكان مادرتيهش بكري ماكنتيش رح تشبعي لانو وقت المراهقة والشباب هو افضل وقت "للتعري" ايمالا لو كان مازلكي حتى لدوك متبرجة ... امالا مليح ساعات الواحد يسلك روحو ... ان شاء الله تكوني فهمتيني
وقلت توقفت عن الخروج عن اللعب ... شفت المشكل!).وش دخل الحجاب فالخرجة واللعب!!!!
وقلت بلي كلما يخطبك واحد تقوليلو نحي لحجاب ..الخ ! اذا فهمتك صح !
وشبيك هبلت ؟؟ كيفاش رح يغزر فيك هاد الراجل !! ..تتوقعي راجل رح يفهم مشكلة نسائية كيما هادي !
اغلب الرجال كي يشوفو وحدة لبست لباس ضيق مثلا ..يروح بالو لبعيد
..مايفهمش بلي المرا تحب تلبس برك باش تبان شابة وما تقصدش حاجة ماشي مليحة !!! .امالا .رح يحقرك بالعين و يشوفك ماشي متربية ومافيكش الخير وزيد بالزيادة ماتخافيش ربي
شكون من الرجال رح يحترمك كي يسمعك تهدري هكدا !!!!!
بالاك تعاودي هاد لهدرة خاصة لرجل عربي !
نقولك حاجة انت لو كان تجيك فرصة تنحي لحجاب الى الابد ..ماتغتنميهاش ماراكيش رايحة تنحيه ..ولو كان تنحيه ماتزيديش بزاف وتعاودي تلبسيه.. وماتربحي غير لعيب مانيش نهدر على العيب قدام الناس .. لالا
ماتخميش فالناس مايهموكش الناس ... ربي اللي فرض الحجاب ماشي عبادو ...
مع العلم انت ايدا نحيتيه مراكيش رايحة تكفري! ..تقدري تنحيه وتصلي وتصومي
بصح ماراحاش تحلالك
ولو كان تنحيه راح تخسري العلاقة بينك وبين مولاك !
جابلي ربي باش توري شعرك وجسدك هاد الامر ما يستاهلش انك تخسري علاقتك مع ربي ...
كي تخممي تنحي لحجاب هادا وسواس لا اكثر من هذا
ماتخليهش يتغلب عليك
وانا احيانا نحس تاني رح نتخنق !مي انت اصبري كي تتزوجي تلبسي كيما تحبي ..وفرغي قلبك .. وفالاعراس تاني البسي ماعليكش مادام غير نسا في نسا عادي قصير بلا اكمام ..الموديل اللي تحبي ..باش تنقصي عليك الضغط ... وقولي مع نفسك كي نتزوج نلبس وش نحب
ربي يفرج عليك ..ويقربك ليه .. ويوفقك ..
نسقسيك :انت راكي حابة تنحي الحجاب وماتزيديش تلبسيه كامل حتى تموتي ؟ الجواب يفيدك انت .
💜