لماذا يا زوجي تقهرني وحبك في قلبي يطعم صبري عليك

[مشكلتي]

السلام عليكم و رحمة الله تعالى و بركاته.
هذا وال موضوع لي بعد تردد كبير في طرحه هنا ... ساحاول الختصار قدر الأمكان لأن تفاصيل القصة مهمة في موضوعي .
أنا امراة تعديت الثلاثين مثقفة و ذات شخصية قوية لي عملي و الحمد لله ، عانيت كثيرا في حياتي و تحملت أمور عائلتي و اموري و تمرمدت و جريت لجل بناء مستقبلي و الأستقرار المادي ، بصعوبة لكني دائما أصل الى هدفي بعون الله تعالى .
حساسة جدا و طيبة و كثيرا ما تدمع عيني قبل الشاكي لأن احساسي يغلب على شخصيتي .
خطبت الكثير من المرات لكن من باب الأهل و الأصدقاء و الجيران لكن اسس اختياري كانت ان اجد فعلا من يحمل معي اعبائي النفسية خاصة لأني اهملت نفسي بالكدح في العمل و امور الحياة . سعيت أن اجد من يشبع روحي قبل ان اتزوج بعد مجرد عرس و دفتر عائلي ... لم يكن همي العلاقات ابدا لكن سعيت ان اكتشف روح الخاطب قبل مميزاته .
بعد ان يأست من البحث و من المتقدمين الي .. و تعبت ماديا و نفسيا قررت الهجرة .الى خارج الوطن ، اتصلت باحدى الجامعات و قبلت و لكني كنت مترددة في ترك عائلتي و السفر ربما بلا عودة ..
الى آخر لحظة كنت فيها سأقطع التذكرة ، دخل حياتي شاب في سني متواضع الحال بسيط كما يقول همه الوحيد ان يجد المرأة التي ترضى بضروفه و تكملان معا مشوار الحياة ... تم التعارف بشكل عادي و بعد مدة قصيرة احسست نفسي و احسسته ايضا قد تعلق صارحني بمشاعره و طرحنا موضوع الزواج مباشرة
خلالها صارحني انه فقير جدا و معدم لا يملك حتى تكلفة سيارة للمجئ لخطبتي ، كنت اشجعه على الحلال و ان المولى عز وجل سيبارك لنا فيه و سيكرمه و وو ، المهم رضيت به لأني احببته و لم يكن يهمني سواه .. عدلت عن موضوع الهجرة و تفرغت للتفكير فيه و الزواج منه .
كان وقتها يعمل عند الخواص ، اسبوع يعمل و اسبوع لا ... مرة قال لي انه سيدخل في مسابقة عمل و انه متردد فيها لأنه متاكد انها ستكون من نصيب اصحاب المعارف و الرشوة .. لكني سعيت معه قصارى جهدي ان يتقدم و يتوكل على الله .. دخل المسابقة و تقدم لخطبتي بعد شهر .

عشت معه أيام الخطبة ملاك بأجنحة أطير على قمم الجبال ..

حان موعد العقد المتفق عليه بعد 4 اشهر و قال انه لا يملك المهر و انا على دراية بالأمر لأنه شرح ظروفه قبل الخطبة و انا وافقت فذلك لم يكن يهمني بتاتا ..
سعيت ان اقنع اهلي به و انه انسان طيب و انه فقير و اني احبه .. و الحمد لله اقتنع والدي و قال ان همه سعادة ابنته مع من تريده و يريدها ..
و حتى لا اجعله يخجل من دفعه لمهر رمزي طلبت منه ان يجعله في علبة و يقدمه لوالدي دون ان يعلم احد كم ..

و واصلنا حياتنا بعد العقد أكثر من رائعة ..

قرب العرس بحوالي شهر ، كنت احسه متذمرا دوما و غير مرتاح أسأله عن سبب ذلك يشكيلي ظروفه المادية و عدم وجود أصدقاء و لا أهل يسعون الى جانبه و انا حالي بمصل حاله تقريبا لهذا كنت اشعر بكل كلمة كان يقولها ..

سالته ان يطلب المساعدة من اهله و اقربائه و اصدقائه فقال لا أحد .. و قال بالمجاز انه سيبيع ذراعه او كليته لتسديد مصاريف العرس .. حز في نفسي كثرا ما يقوله فحاولت ان اسعى معه ، رمة اتصل بي و طلب مني ان استقرض له مالا من أهلي ، و فعلت و اقرضته المال .
وصلنا بعدها خبر تنصيبه في عمله و الحمد لله قلت سنعيش في راحة .

بعد شهر تم الزواج .

من أول ايام عرسي شعرت بشئ غريب احاول تفسيره لكن لم استطع .

بعد اسبوع من زواجنا دخل منزعج و ثائر ووو حاولت تهداته و فهم الموضوع أجده يردد كثيرا انا حالي متعتع و زوالي و فقير و حاله مخنوق و كانه سنفجر ... يغيضني بزاف و نحاول نسيه و نفكره اني معاه و ان الفرج قريب .
بعدها يخطئ في الكلام حين اتقرب منه لأواسيه ، يجرحني بكلمه نسكت عليه لأني تصدمت انه يجي نهار يقولي قلقتيني و انا متعودة نسقيه قبل الزواج و يحب يفرغلي قلبه و يحكيلي كلش بالتفصيل الممل .


انا طبعي كي نتقلق ما نهدرش و ما نردش و من هنا يبدا هو - انا الكلب خير مني يعبروه وووو يزيد يشعل النار . هذاك النهار يبات وحده في الصالون و انا نبات نبكي في الغرفة وحدي .

غدا يصالحني و يحللني و ننسى ..

بعد 20 يوم من زواجنا يدخل مقلق كالاعادة نحاول نفهم يبدا يتنرفز ز يثور ، هذ المرة يقولي راني خارج عليك ما تزيديش تشوفي خلقتي ، صدمت صدمة رهيبة فيه .. يحمل أوراقه الشخصية و يخرج ، يرجعلي في الليل يبكي و يتوسل فيا و يقولي منيش راجل خليتك وحدك و نسامحو كأن شيء لم يحدث .

بعد مرور 3 أشهر أصبح موضوع نرفزته يومي .. نهار مشنفين و نهار نضحكو لكن انا مع الوقت و تصرفاه الغريبة تدهورت صحتي كثيرا لا رقاد لا ماكلة ضعفت و ليت ندوخ و نطيح .

في رمضان قلت ذرك يتهدن مع القيام و قراءة القرآن لكن ظهرلي العكس لم يكن لا يقوم و لا يقرأ قرآن .

زاد أمر القلقة تاعو ، عذرته قلت غلبو رمضان كما نشوف في السكاتشات .. و قلت يفوق رمضان يتهدن .

انا مع هذا كله و رمضان تدهورت صحتي على الأخر و خلاص ما بقاش فيا .

زيد المشكل أهله كل نهاية اسبوع عندي ، و انا عودتهم خدمات خمس نجوم . حلويات و طبخ و بهرجة نعت في روحي زعما . هما عجبهم الحال يحبو يتفرهدو عندي .

كنت نحرم روحي من أكله على جالهم نخبيها حتى يجو ناكلوها مع بعض . عمري جاوني و ما طيبتش طوب و اللي يسخفو عليها نقولها حاضر .

المهم كي تدهورت صحتي طلبت منه ان اذهب للطبيب . قالي بلاك راكي حامل و سكت على الموضوع حتى خلاص وليت منيش في الدنيا /

لما اخذني للطبيبة قالي معنديش باش نجيبلك الدواء قتله معليش خليني نرتاح و ساهل اذا ريحت ما نحتاجش الدواء .
في ذلك اليوم قالي امي اتصلت بي و قاتلي راني جاية قتله ياك البارح برك كانت هنا و اتا شفت حالتي مانقدرش حتى نطيب قهوة .. قالي امي راهي جاية و هي رايحة تخدمك ..

انا مش متعودة أحد يخدمني و لا يجيبلي قطرة ماء و هي عجوزة كبيرة و عندها 4 امراض . حتى لو مريضة و قريب نموت ما نسمحش لروحي تخدمني .
زاد معايا في الهدرة و قالي اقعدي في غرفتك هي تجي تخدمك .
دخلت العجوزة و بقات معاه ساعة بعدها تبهدلت انا قلت هي عندي و انا في غرفتي حتى لو راجلي قالي متخرجيش بالصح هذي امه لازم نسلم عليها .

خرجت ليها سلمت عليها مات قاتليش وشاركي - قاتلي علاه راكي مشنفه ؟
قتلها منيش مشنفة راني مريضة ، قاتلي علاش مريحتيش قتلها ما كليت دواء ما نريح .
هيا خرجت للبالكون و بدات تبكي لحقها راجلي يحلل فيها و هي تقول انتم ما تحبونيش و انا نظل نجي عندكم ووو

كبر الموضوع و انا غير نتفرج على الفيلم ..
من بعد دخلوا للهول و بداو يعارو فيا كلام للي عمري ما سمعتوا هي و هو ..

فيك و فيك و فيك و انا غير نقولهم واش صرا ربي يهديكم من ال 4 تاع العشية حتى 11 تاع الليل و هما سب و شتم و فضايح ربي كامل فيا .

و انا مريضة خلاص تهديت طحت من طولي و هما و لا خبر راحو رقدو مع بعض و انا بقيت وحدي في الصالون .

قتل معليش نهار و لا زوج و يتهدن و يرجع يطلب السماح و قتها نفهم القصة من اساسها علاش قامت ..لكن لأسف كل يوم نقول اليوم يتهدن و هو وين رايح يزيد .

استعمل معايا كل وسائل التعذيب - النفسية و الجسدية و العقلية - و انا لا أكل و لا نوم و لا راحة

لأخر يوم بدا يهدد فيا بالسكين و يطردني و يكركرني و يحاول يخرجني من الدار و قالي نحب نطلقك .
رفضت الطلا ق لأني ما عندي ما درتلو و انا لو كان عيوني يتنجاو نمدهملو هدية .

هذا جزاء سنمار للي كنت نسمع عليه و هذا ان انت اكرمت الكريم ملكته و ان اكرمت اللئيم تمردا و هذا اتق شر من احسنت اليه وووو عبر كثيرة ..

كل يوم نقول ربي رايح يهذيه و يرجع للطريق ،لكن لأسف ما عندوش قريب يحاول يصلح حالو و لا صديق ينورلو طريقه و لا أمه تقيه تسعى لربط ابنها بزوجته .

كان يضربني قدام امه و يجري يبوسها و هي تضحك و يبزقلي في وجهي و يجري يحضنها و هي تقولو يا ولدي رانا راضيين عليك .

حسبي الله و نعم الوكيل

بعد ما تلفظ بالطلاق قلت معليش هذي الازمة و راحت تعدي و راح يرجعلي خاطر كان يحبني . رح يرجع و يندم خاطر درت معاه غير المليح . راح يرجع خاطر يعرف شحال نحبه .

راح يرجع خاطر داتو الدنيا و نسا المراأة للي خلات الدنيا على جالو

لكن مرت الشهور و انتهت عدتي و لا شيء يذكر مما تخيلت ..

احببته بكل ما في من روح .. فرحل و تركني ..

[توحيد الجزائرية]

لا ترغب فيمن يزهد فيك فذلك ذل
ولا تزهد فيمن يرغب فيك فذلك ظلم
اديها قاعدة ،،
اذا عزيت روحك من البداية ،تبقاي عزيزة وكرامتك مصونة
لكن انت من البداية اهنت نفسك
ربي يعوضك وياجرك في مصيبتك

[طيور الجنان]

اختي مالقيت مانقولك هذا الراجل مايعرفش لواحد يديرلو القيمة يحب اللي مايحسبوش خلاااص قولي خسبي الله و نعم الوكيل.

[nihal159]

انا اوافق توحيد الجزائرية ...... و مع كل احتراماتي مانيش عارفة واش عاجبك فيه و خلاك تحبيه ؟؟؟ ما تزعفيش مني و لكن هذه هي الحقيقة لان المراة تحب الرجل الشهم و الرجل اللي يعرف قيمتها و يعزها و يكرمها و يتهلا فيها ماشي يهينها و يضربها ...... *ما يكرمهن الا كريم و ما يهينهن الا لئيم *..... ان شاء الله ربي يهديه و ربي يفرج عليك ان شاء الله

[صفيان 11]

و الله غير هد الوقت غير عجيب الرخيس ولا مليح و الراجل ولا ماشي مليح يا لطيف نساء اخر الزمان واش دارلك او مزال تتمناي يولي وين راي الكرامة تاعك

[ايمان4]

يا اختي لما تبكين عليه بل اكيد ان الله جعل لك في هذا مهيرا اهانك فاحببته؟هذا ضرب من الجنون

[قدور بن عاشور]

رغم أن هذه الحكاية جاءت من جهة واحدة، إلا أنني أهنئك بهذه النهاية السعيدة، تهنيتي منه.

نصيحتي للبنات المقبلات على الزواج، الرجل الفقير الشهم لا يبكي و لا يشتكي: ماعنديش دراهم التاكسي، ماعنديش المهر، سلفي لي من عند داركم..... يجيب الخبزة من فم السبع كما يقولون

لا تقبلن إلا بمن عنده شيء من عزة النفس، و لا يقبل المذلة.

[اريج 07]

والله نقرا في موضوعك و دموعي تجري حسيت بيك و حسيت بهمك ربي يكون معاك حبيبتي والله راجل مايستاهل تحبوا لمرا بزاااف و même ويلا تحبوا متبيلوش لخاطر يطلوا فوق الراس مين يشوفو الحب vraiment غضتيني والله مالقيت مانقول غير ربي يعوضك ما احسن منوا يارب

[faty05]

واش من حب هذا
مازالكي تحبي في اللي يبزق عليك و يكركرك و يهددك بالموس
اذا الاحداث صح هكذا وش نقولك تهنيتي منه
نصيحة ليك و لكل وحدة ابدا ما ديري تنازلات لاي رجل كان حتى و ان كان من اتقى التقات
كل حاجة في بلاصتها
الله يفرج عليك

[knives66]

ما فهمتش علاه ديما تمشوا بالعكس

لي حبكم تكرهوه ولي يكرهم تحبوه -_-

بالله عليكم عندكم عقول ولا برس تاع قهوة في رسانكم

[ibtissembiti]

إن شاء الله في هذه لعواشر لخرا يرزقك ربي بفرحة تنسيك كل شي
لكن مجرد نقطة اريد نطرق ليها لمعندوش عمروا ليقول معنديش وتلقى عزة النفس عندوا عاليا بزااف وميقبل يتتصلف الدراهم
لا عالينا
أنتي لم تخطئي
كل هذا يبقى امتحا ن من عند الله
ومع هذا إن كنت لا تحسين بالأمان معه حسب قولك وصل به الحد تهديد بالموس إلا اين !!
إرجعي لدار والديك أراه الحل الأفضل والله ربي أعلم والله لا يفضح ولية وإن شاء الله يرزقك ربي على حساب قلبك لخلق ميضيع
والله عجزت عن النصيحة
هل خممتي في أن ترقيله لانه غير عادي مع انوا مندوا بالبداية غير عادي نهار مليح منهار لا !!!
وعجوتك ربي يهديها
ربي يصلح لحوال

[عقد النجوم]

الراجل الي يشكي بزاف ثم لوكان قلتي ستوب .....بصح انتي دخلتي في فيلم رومانسي وهاكي اديتي نهاية حزينة ربي يعوضك

[الفاتحة]

فعلا قصتك حزينة لكن لا عليك هذا ابتلاء من عند الله أكيد ربي يحبك لكي يبتليك وليس لديك حل إلا الصبر ثم الصبر ثم الصبر أنا نقدر موقفك أنت طيبة وعلى نيتك لذلك استطاع ان يخدعك لكن لا تقلقي ان الله يمهل ولا يهمل فقط اريد ان تقول لك انسيه تماما واعربريه كأن لم يكن وواصلي حياتك بصورة عادية لعله خير وستأجرين بإضن الله.

[طاعة زوجي ..]

أولا ربي يفرّج عليك أختي وربي يفتحلك بيبان الخير
ثمّ إن كان الوضع بالسّوء الذّي وصفته فالحمد لله أنّك تخلّصتي منّو قبل مايوقع الفاس في الرّاس ونظنّ ماراكيش حامل ,والله أعلم أحسن من أنّك تحملي من شخص بهاته المواصفات
أيضا يقال أخر العلاج الكيّ ، صحيح أنك تتألّمي وأنّك تعلّقت بيه وضحّيتي وتنازلت على الكثير لأجله ، ولكن صفحة وطويها ، كان عليك أنّك تدعي لربّي سبحانو في هذا رمضان أنّو يخترلك ولا يخيّرك ، لأنّو الخيرة فيما إختاره النّاس

لي قريبة مرّت بحالة زواج تقريبا مشابهة لحالتك دامت أعوام وفي الأخير بعد إجهاضها ومرضا وزادت تكسّرت من رجلها ، طلّقها ورماها ، وبعد سنوات تزوّجت بشخص طيّب وراهي الأن حامل ببنت ومهنّية الحمد لله

يعني حاولي تتفائلي وتحسني الظنّ بربّ العباد وهو أكيد راح يعوّضك بصبرك خيرا إن شاء الله

[روح المي]

القط يحب خناقوا
وأنت رخصتي روحك ومعززتيش روحك ومخليتيش يعرف قيمتك ويبان مش طبيعي اصلا
ونعطيك مثال إذا شريتي قفطان ب3 ملاين وشريتي روب 100 الف كيف ستكون معاملتك لكل منهما وطريقة غسلك لهما
انت بحسن نيه اعلم لكن مجتمع تاعنا متصلحش معاه هدوا لعفايس
هو حب حاجتك ليه برك وتاكدي كون يحبك لا يتجرئ ان يفعل هذا بك ربي يهدي .........