الشامل على المدرسة العليا للبحرية تمنفوست

[walidovicblanco]

الاسم: وليد
العمر: 25
متطوع دفعة جانفي 2015
لوردر دابال: 15 جانفي 2015
التحقت بالمدرسة في : 21/ جانفي 2015
بقيت 09 ايام في المدرسة
01 فيفري راني في الدار
خرجت فائض الحمد لله
أولا:كيفية الوصول الى المدرسة
أخرج من محطة خروبة توجه للجهة المقابلة للمحطة من اجل الصعود في الترام واي أو الحافلة للتوجه الى تافورة (ماتهزوس التاكسي غالية بزاف)
الي مايعرفش منين يركب الى تافورة يسقسي بركة في الخروبة
رحلة تاع 15 د
كيما يعيط الروسوفور على قهوة شرقي أهبطوا
بعد الهبوط سقسوا على الحافلة يلي تطلع الى لابيروز La pirousse (برج البحري مكان المدرسة) احبسوا في التيرمينوس
تهبط من الحافلة تقابلك المدرسة.
ثانيا: الدخول للمدرسة
تلقي Post Police رقم 01
تعطيه لاكارت + لوردر دابال يقراهم ومبعد يردهملك
تزيدوا تكملوا تطلعوا تلحقوا الى Post Police رقم 02 تحطوا الكابة في السكانير ومن ثم الدخول الى أفضل مدرسة في الوطن
بعد السكانير يدوكم الى Post Police رقم 03
يسجلوكم في سجل ويعطوكم رقم الوصول يكتبوهولكم في لوردر دابال
ثالثا: الدخول عند الطبيب
اذا كان الطبيب موجود يدوكم ليه كي تدخلوا اذا ماكانش يدوكم في النهار يلي من وراه
معلومات عن الطبيب:
الطبيب عام يعني Geniralist
معناها اذا مافعمش المرض تاعك رايح يفوتك كونتر فيزيت
اذا ماعندك والوا رايح يعطيك Apt ماتخافش كاين يلي عطاهم Apt وطلقوهم
من بعد الخروج من عند الطبيب: يدوكم الى Salle de Sport
وين ترقدوا.
بالنسبة للرسمي: Apt/Inapt
في دفعة جانفي 2015
قفلت يوم 29 جانفي
العدد: 393
246 فائض
32 سورسي
45 inapt
70 مجند
القوانين الخاصة بالمدرسة:
تحترم روحك يحترموك
رايحين تكونوا تحت امرت أخوانكم تاع دفعة جانفي 2015 هوما كامل ناس طيبين احترموهم بركة وماتسبوهمش
وهوما ثاني تخت ارمرت كابيتان Capiten
يلي رايح يقوليكم 5*5
Ay Rapidement هههه كم كانت ايام ممتعة
بالنسبة للقيادة الموجودة في المدرسة:
General Major
2 General
80 lyoutna colonelle
واحد 120 الى 140 Capiten
يعني حبيت نقليكم راهوا Capiten في هادي المدرسة ما يقضيش
ملاحظات:
المدرسة تخير من بين 70 Apt عن طريق العمر + التخصص
المتزوجين كامل راح يطلقوهم.
كياين يلي جاو وطلقوهم من الباب بسبب التأخر والعدد الكبير في المدرسة
كاين يلي نحاولهم اللحية عند الباب
الهاتف مسموح حتي Smart Phone راه مسموح مي ماتوريش هولهم احنا في دفعتنا كاين يلي فوتوا حتي Les Tablets
هذا هو السبب يلي يخليها افضل مدرسة في دزاير
الصلاة جماعة مسموحة.
الأكل مقبول وجيد خير من تاع الجامعة
الفحص المضاد في B.R.I الناحية العسكرية الأولي البليدة
أتوكلوا على الله ومتخافوش لأنها تجربة في أفضل مدرسة في الجزائر
حداكم البحر من كل جهة
النهوض على الساعة 07 صباحا يدوكم تفطروا في كل مجموعة 70 فرد
بعدها ترجعوا الى Salle de Sport تنظفوها كل واحد ينظف تحت سرير ديالوا
راح يقتلكم الروتين تاع القعدة
بعدها الغداء
ثم العشاء
يطفوا النور حوالي الساعة 10 ليلا
اتنهلوا في رواحكم
سلام.

[حماده هلال]

شكرا لك اخي على المعلومات المفيدة للاعضاء المقبلين على اداء الخدمة الوطنية
في هته المدرسة والتي من كلامك واضح انها من افضل المدارس في الجزائر
كيما قال الاخ توكلوا على ربي وروحوا راه عام ويفوت

[bmskikda]

شكرا على المعلومات اخي
حبيت نعرف الميطاسيون بعد السطاج الى اين
28 سنة ما هي نسبة الحظوظ في نيل الاعفاء و شكرا

[youcefball]

بارك الله فيك أخي انا ذاهب 21 ماي ان شاء الله 26 سنة مهندس مدني

[walidovicblanco]

المشاركة الأصلية كتبت بواسطة bmskikda

شكرا على المعلومات اخي
حبيت نعرف الميطاسيون بعد السطاج الى اين
26 سنة ليسانس حقوق ما هي نسبة الحظوظ في نيل الاعفاء و شكرا

الميطاسيون
تلمسان وهران مستغانم جيجل
يعني تميتي الا البحر
بالنسبة للحظوظ انت ومكتوبك فان كانت هناك صغار السن وليهم نفس التخصص ستكون من بين الفائض

[bmskikda]

شكرا جزيلا

[fayssal_lama]

اخي في رأيك الدخول في الوقت او التأخر احسن ؟؟

انا 27 سنة ,,, لوردر دابال: 15 ماي 2015

و مادا كنت تفعل طول المدة التى قضيتها في المدرسة ؟ يعني كاين كرفي و لا واش ديرو ؟

[walidovicblanco]

الدخول الى المدرسة في الوقت ولا غير الوقت
ماعندوا حتي معني في تمنفوست في دفعتنا كاين يلي دخل قبل غلق المدرسة ب3 و4 ايام
وطلقوهم
المدرسة ترفد على حساب السن والتخصص الدراسي
بالنسبة للكرفي قليل جدا
احنا قتلنا الروتين
درة كرفي نهار الاول كي دخلت يالمدرسة مع واحد 70 فرد تفريغ شاحنة مواد غذائية مي شاخة فيها لمبيونس بركة باقي ليام غير رقاد حتي لفطور مانروحش روحت غير اليوم الاول
بزاف حوايج كي تدخلوا تتحلبوا لبهم

[fayssal_lama]

المشاركة الأصلية كتبت بواسطة walidovicblanco

الدخول الى المدرسة في الوقت ولا غير الوقت
ماعندوا حتي معني في تمنفوست في دفعتنا كاين يلي دخل قبل غلق المدرسة ب3 و4 ايام
وطلقوهم
المدرسة ترفد على حساب السن والتخصص الدراسي
بالنسبة للكرفي قليل جدا
احنا قتلنا الروتين
درة كرفي نهار الاول كي دخلت يالمدرسة مع واحد 70 فرد تفريغ شاحنة مواد غذائية مي شاخة فيها لمبيونس بركة باقي ليام غير رقاد حتي لفطور مانروحش روحت غير اليوم الاول
بزاف حوايج كي تدخلوا تتحلبوا لبهم

بارك الله فيك ,,,, واش هوما التخصصات المطلوبة ؟

و صح كاين منها متطوع محال يطلقوه فائض ؟

[azzoun abdelouahab]

ya khou baraka allaho fik walah rak newartna
ana le 17 mai 2015 rani mesahal nechalah

[walidovicblanco]

المشاركة الأصلية كتبت بواسطة fayssal_lama

بارك الله فيك ,,,, واش هوما التخصصات المطلوبة ؟

و صح كاين منها متطوع محال يطلقوه فائض ؟

والله يا اخي بالنسبة للتخصصات لا استطيع حصرها لكن الذي اعلمه ان في دفعتنا رفدوا
4 تاع economic
واحد عندو ماستر إعلام آلي
فرنسية
انجليزية
رياضة
فيزياء
علوم
لا اتذكر جيدا
بالنسبة للتطوع يطلقوه عادي في الفاذضالفائض
وانا صاحب الموضوع متطوع وخرجت فائض

[walidovicblanco]

المشاركة الأصلية كتبت بواسطة azzoun abdelouahab

ya khou baraka allaho fik walah rak newartna
ana le 17 mai 2015 rani mesahal nechalah

وفيك بارك الله
ربي يسهل خويا
انشاء الله فيها خير

[khaled2121]

السلام عليكم اخي وليد حاب نسقسيك على السطاج لكان نعقبوه فيها ولا بلاصا خلاف و الميطاسيو لكان متاكد بلي تميتي للبحر برك

[khaled2121]

كاش رد مكان والو

[alilocherif]

شحال ميزان يطلبو هل صحيح فوق 54كيلو افيدونا جزاكم الله خيرا