السلام عليكم صباح الانوار اليوم بغيت نحطلكم موضوع ممكن يهم المبتدئات أكثر
ادوات الخياطه.
كل وحده تحب تتعلم الخياطه او تمارسها لازم يتوفرو عندها ادوات لي تساعدها
و تسهللها مهمتها و لي حابه تبدى تتعلم و ما عندهاش فكره واش تحتاج و لي ناقصينها ادوات
راح نشوفو مع بعض اهم الاشياء لي نحتاجها
![](https://imagizer.imageshack.com/img538/7051/zQ592Q.jpg)
اول حاجه المقص : لازم يكون ماضي باش ما يقلقكش و يفسدلك لفصاله
الصغير تحتاجيه في الاماكن الضيقه او لقطع الخيط اثناء الخياطه
Decouseur : هذا يساعدنا باش نطرطقو لخياطه بلاما نفسدو لقماش
![](https://imagizer.imageshack.com/img537/8739/yg4RdF.jpg)
الميطره نحتاجوها لاخذ القياسات ل تفريغها على الباترون و القماش
![](https://imagizer.imageshack.com/img537/4966/V33OrO.jpg)
الخيط هذا من اجود الانواع الكبه الكبيره تحتاجي البيضا و السوداء
و معليش الالوان اشري من الصغار
![](https://imagizer.imageshack.com/img540/2240/XOUanP.jpg)
الدبابيس نقولولهم النقاقب يساعدونا بتثبيت القماش و الباترون
و لمساسك ايضا تحتاجي واحد على الاقل
![](https://imagizer.imageshack.com/img538/9076/VwFFa3.jpg)
ابر الخياطه باليد الخشينه و الرقيقه و تاع المشينه من الاحسن تتبعي الرقم لي يساعد قماشك معناه اذا راكي تخيطي في قماش خشين
استعملي رقم 18 و اذا رقيق تنقصي فيه ارقام 14/16/12 و ماتنسايش المشينه المنزليه عندها نوعها و المشينه الصناعيه كذلك
![](https://imagizer.imageshack.com/img538/1828/EXoTy6.jpg)
و كاين حتى الابر خاصه بالقماش الايلاستيك
و هاي ليك
![](https://imagizer.imageshack.com/img913/7827/CC5ZJJ.jpg)
الجرايه هاذي نحتاجها لرفع الباترون او لتوضيح اماكن البانس
![](https://imagizer.imageshack.com/img538/4011/cxgZ2E.jpg)
تحتاجي لحديد باش تحدي من الاحسن كل ما تخيطي جزء حديه باش جي خياطتك نظيفه و واقفه
ورق لرسم الباترون
![](https://imagizer.imageshack.com/img540/6233/fWIz4e.jpg)
و مساطر صغيره و كبيره
مسطرة البيروكي لرسم منحنيات الكول و فتحة الذراع ...
هي كاينه تاع الطايور سبيسيال انا هذا لي متوفر عندي
![](https://imagizer.imageshack.com/img911/2984/DBSHSV.jpg)
و دفتر لتسجيل القياسات و ممكن ترسمي فيه الموديل
باش تتذكري تفاصيلو
![](https://imagizer.imageshack.com/img538/7689/ZecHCi.jpg)
قلم و ممحاة و مبراة و الوان للرسم و طبشير و كاين لاكري طايور يتباع
و علبه لوضع مستلزماتك باش ما يتودروش
![](https://imagizer.imageshack.com/img661/6929/yv1JnX.jpg)
و المشينه اكيييد
![](https://imagizer.imageshack.com/img661/1342/48X72w.jpg)
والمانكان اذا توفر راه يعمل 1600دج في المارشي
وهاذي البيستولي لي تلصقلنا القالون و لي زيستراس و تساعدنا في الاعمال المنزليه
ولي قدامها لاكول نتاعها. كاين لي تمشي بلاكول الرقيق و كاين لخشين كيما لي عندي
![](https://imagizer.imageshack.com/img537/7809/4F00ON.jpg)
وهاذي الفيراسودي.
![](https://imagizer.imageshack.com/img908/8428/celyjq.jpg)
وهاذي لاباراي لي تلصق لي زيستراس الرقاق انا ما ساعدتنيش ممكن كاين اخوات عجبتهم الخدمه بيها
![](https://imagizer.imageshack.com/img538/918/HerEcT.jpg)
![](https://imagizer.imageshack.com/img908/1631/PkgDLy.jpg)
انت تقدري تستغناي على حوايج بزاف من لي حطيتهم الا الخيط
و لبرا و لمقص و المشينه كبدايه لي ماعندهاش بالشوي تلمي حويجاتك
السوارد راهم يروحو من الأفضل تشري بيهم حوايج يهونو عليك الخدمه
اذا حبيتي تصوريلنا ادواتك و تحطيلنا نشوفوهم ماذابينا على الاقل نخلقو روح للموضوع
دعواتكم لابي
سلام