زوجي موسوس,,, رايح ايهبلني

[nada hayati]

مساء الخير عليكم يا لبنات,,
حبيت نحكيلكم على راجلي رايح ايهبلني موسوس بالنقا أنا تاني موسوسة بصح ماشي كيفو صدقوني كل ما يدخل للمرحاض ( حاشاكم) ايبدل أحوايجو الكل اللبسة اللي يخرج بيها الصباح مايزيدش يلبسها لعشية ,, الغبرة أيشوفها منين ماتكونش فوق القرعة تاع الريحة مور لخزانة,,,ايحب يمشي حفيان مادا بيه تفتوفة ما اتكون,,, رايحة نهبل ,, عندي بنتي 5 أشهور و ترجع بزاف عندها المعدة مفتوحة والله كلما يرفدها وترجع عليه أرواحو تتفرجو ايدير حالة,,
قولولي واش أندير أمعاه؟؟؟؟ بزاف عليا هاد الشئ,,,,,

[melissa lola]

الله يكون في العرن

[nada hayati]

يعيشك حنونة,,,,علبالك des fois نسقم الدار على شعرة و يلقالي des défauts رايح يهبلني

[melissa lola]

اختي ساعفي ويجي النهار ويكره انا عن نفسي كنت بالاك اكثر من راجلك كنت ايلا مسيت باس انتاع الباب لازم نغسل يديا وبحكم انني مووظفة كنت كل مانشد وثاءق نغسل يديا حتى 30 مرة في النهار معمرة القرع انتاع الما في المكتب ودايرة فيهم جافيل نغسل كل مرة ومانمسش الاسطح كي نجي طالعة في الدروج مانحكمش تجي في بالي بلي راهي معمرة ميكروب حتى حكمتني حساسية من كثرة الغسيل نحكيلك هاذي رحت ستاج 4 اشهر حاشاك معمرة قرعة جافيل واومو كل مانروح للحمام اعزكم الله لازم نغسل حتى الحيطان باه ندخل ومانحملش واحدة تقعدلي فوق فراشي المهم معاناة وجامي ندخل تواليت عمومي ولا ناكل ماكلة الناس اللي مانعرفش درجة نظافتهم غير هاذي اللي ماتكونش ولا نشرب في كاس شرب فيه واحد قبلي وبما اني كنت متشاركة وسط الدار مع اهل زوجي حوايجي كي نغسلهم لازم نكون ثما باه ننشرهم تجي في بالي بلي كي يمسوهم بيديهم وهما جايزين بلي يتعمرو ميكروبات واش نحكي واش نخلي كان راجلي يتقلق مني بزاف لازم ينحي حاشاك حذاءه عند الباب وبالنسبة لغرفة النوم مكان مقدس لا ماكلة لاشراب فيها ونمشوا فيها بالحفا ممنوع دخول اي حاجة لحقت لدرجة لوكان يجي كاش واحد ويدخل لداري غير يخرج نفوت موراه نشاف حاشاك الله غالب كنت موسوسة قراف وعلابالك حاجة نروح من الصباح داري مغلوقة كنت نوض بكري نسيق ونرمي الماء كل يوم ونمسح ونفرغ الجافيل وانا ماعنديش اطفال مي نتخيل بلي الدار موسخة وصراولي ظروف دخلت للمستشفى وراكي عارفة مستشفيات بلادنا ثمة اللي راحلي شوية التوسويس علا خاطر تمرمدت في السبيطار ونقصت من التوسويس انتاعي قاع هذوك الميكروبات وماصرالي والو الحمد لله حكايتي حكيتهالك باه نطلعلك المورال ،،،،سلام

[melissa lola]

نقولك هاذي برك كان عندي 5-6 قرع جافيل bref في قضيان الشهر ولازم bref ولا ماكاش

[nada hayati]

vraiment طلعتيلي شوية morale ,,, المشكل الان اني أنا وليت انخاف انكون قاعدة و امبعد ايجي في بالي دوق ايجي و يبدا ايعلق ,,,انوض نجري نمسح الارض, الغبرة, المرايات, انشوف الخزانة كيفاش الكوزينة. كيما راكي تحكي عندي قرعة جافيل تاع الكوزينة وحدها و تاع الدوش وحدها مالازمش ينقص من الدار ,, عندو بليغة تاع الدوش وحدها تاع toilette وحدها تاع البرا وحدها و في الدار لازم يمشي حفيان ما لازم اتكون حتى تفتوفة,, يا اختي هبلني

[ام ياسمين10]

ربى يكون فى عونك اختى والله بزاف سيرتو كى يكون عندك درارى لازم تنساى حاجة مش نظيفة حاولى معاه وادعى ربى

[القرآن راحتي]

زوجي وفس الشيء ولم اكن اجرؤ ان علق عليه وبعد مرور سنوات ر زقنا بالاطفال واخبرته انني اتعب ولست superwoman بحيث اقضي على كل شيء واخبرته انه منذ زواجنا لم يحصل له تسمم طبعا قلت كل هذا بطريقة هادئة ولطيفة كما ان بلادنا معروفة ان فيها نسبة كبيرة من الغبار والتلوث الذي يدخل البيت مهما نظفتي ونصيحتي ان تدعي الله في كل صلاة ان يكون لينا معك والله المستعان

[radmoh2006]

الله يكون في عونك

[missossa]

ربي يكون في عونك ماعليك غير تتحملي ديما إتفكري حوايج تبغيهم فيه ويلا كان حنين معاك إتفكري حنانتو ؤحبو ليك وكتري من الدعاء والصلاة بقدرة ربي راح تتغلبي عليه وإلا هو يتسقم واهدري معاه غير بالحنانة

[أم محمد علي]

نصيحتي أختي لك الصبر والحوار معه بلطف والدعاء لأنه يغير كل شيء بإذن الله ,وأكتبي الإيجابيات والسلبيات تع زوجك وقارني أكيد تجدي أن الإيجابيات أكثر فهناك نساء راجلها يشرب ويدروقي ويضربها وميقديش للدار حتى ولات طلابة ,,,,,,و و قولي الحمدالله وهذا شيء يتغير بالوقت ,فالوقت كفيل لعلاج جميع الأمور أختي متنسايش الدعاءوالعلم هو علاج للوسواس يلزم يتعلم أن الغبار وو ,,,ليست نجاسة راني مستعجلة أختي فرصة أخرى , أختك فاطمة

[said 2008]

ربىّ يكون فى عونك اختى

[أم شروفة]

أختي متزوجة هي وزوجها كل يوم مشاكل رغم أنها نظيفة إلا أنه بهدلها مع أهلو والجيران وضعفلها شخصيتها .المسكينة ماعندهاش وقت راحة .ماعندهاش مرض كل يوم تنظيف ملابسه المغسولين يقلها عاوديهم .تحطلو الأكل يقلها عاوديه .وياريت كان عامل ماعليش حقو يجيب ويتشرط .لكن حق قرعة جافيل ماكاش في جيبو وهو داير روحو حكاية .ما يتفهمش أن المرأة حامل أو مريضة ربي يكون في العون

[أم أسامة 07]

رب يكون في العون

[mariana1]

هذا النوع من التصرفات هو نوع من الامراض النفسية يسمى الوسواس القهري كيما اللي يشك في الوضوء أنتاعو ويعاودو في أشرطة علمية أجنبية يسمى بla tic ويتعالجو عليه وربي يصبرك ويقدرك