تحبي الكسرة ؟ تفضلي شوفي هذه الطريقة الجديدة

إلهام07 · 2013-02-03, 11:08

الوصفة الرابعة

جبتلكم اليوم كسرة الحرشة بطريقة جديدة ، شفتها في منتدى و جربتها و عجبتهم فقررت نحطهالكم باش تستفادو معايا.
البارح كان عندي سردين بلا صوص طومات بايت ما حبوش ياكلوه ، مالا درت الحيلة هذي باش ما يروحش خسارة

، تبعو معايا ، راهي سااااهلة خلاص :

المقادير :
* 500غ دقيق رقيق ( أنا الميزان نتاعي فسد حطيت 3 كيسان متوسطين سميد )
* أقل من نصف كاس بين زيت و زبدة ( كاس متوسط )، ما تكثروش الزيت لأن التونة فيها زيت.
* 1 كيس خميرة كيميائية ( خميرة الحلويات )
* 1 علبة تونة ( أنا استعملت تونة بالزيت و أنتو و الذوق نتاعكم )
* ملح ( ما تكثروش لا خاطر التونة راهي مالحة )
* حليب فاتر لجمع المكونات ( أقل من ربع كاس )
* نصف كاس معدنوس ( أنا حطيت تقريبا كاس لا خاطر نحبو

)
* 2 حبات بورو مقطعين أو بصل أخضر حسب الرغبة ( حبات صغار )
* كان عندي شوية ساردين رقيق في لاصوص طومات بايت حطيتو بيه بلاصوص بعد ما نقيتو من الشوك و الذيل( حوالي 3 ملاعق كبيرة بعد ما نقيته )

الطريقة :

1- تخلطي المكونات الجافة : الدقيق + الملح + الخميرة .
2- تبسسي الدقيق بالزبدة الذايبة و الزيت .
3- تضيفي كل المكونات الباقية و تخلطي.

4- نضيف الحليب قليلا قليلا حتى يتلم العجين و نقدر نشكل منها كرة مثل الصورة( راهي ماتديش حليب بزاف ) و نخلط مليييح باش تتداخل المكونات جيدا .

تتحصلي على عجينة طرية مثل الصورة ، خليتها ريحت حوالي 20 دقيقة :

https://www.up.djelfa.info/uploads/135988498381091.jpg

5- نرش الطاولة بشوية سميد ونطرح العجين فوقها بالحلالة ( ما ديريهاش رقيقة بزاف ، ديريها بالخشن نتاع الكسرة أو أخشن شويييية برك ) .

6- نقطع دوائر أنا استعملت كاس و اضغطي جيدا حتى تقصي المعدنوس و البصل و تكون الحواف مقصوصة مليح ( إذا تقدري تحطي الدوائر في ثلاجة باش تشد روحها وما تتكسرش يكون أحسن جيك ساهلة في الطياب )

7- إرفعيها بحذر بواسطة هذي الأداة باش ما تتكسرش لاخاطر راهي مبسسة

8- أطهيها فوق طاجين الحديد على نار متوسطة ( ما تقويش النار باش طيب مليح من داخل ) و حمريها مليح و ما تكثريش تقلبي فيها باش ما تتكسرش ، يعني حتان تحمار باش تقلبيها و ما تحركيهاش بزاف.

و هاهي واجدة و ما تخافيش بعد ما طيب مايبانش فيها طعم السردين .

أخواتي عجبتهم ، حطو فوقها فرماج و كلاوها و مافاقوش باللي فيها سردين لا خاطر ما يحبوهش ، أنت أيضا ممكن تستعملي هذه الحيلة باش الأولاد الصغار ياكلو السردين راهو مفيد جدا ليهم .

* ملاحظة : ممكن تغيري في المكونات حسب الرغبة .

*سماح 94* · 2013-02-03, 11:17

حتى انا شفتها في عدة منتديات مغربية يقولولها الحرشة وهي من اكلاتهم التقليدية لكن ما جراتش نحربها هههههههههههه
اما هاذ المرة راهي بايدي جزائرية وتستاهل التجربة ههههههههههههه
يعطيك الصحة اختي

amy mima · 2013-02-03, 11:22

mmmmmmmmmmmmmmmm

إلهام07 · 2013-02-03, 11:27

اقتباس:

المشاركة الأصلية كتبت بواسطة nokia2007dz

حتى انا شفتها في عدة منتديات مغربية يقولولها الحرشة وهي من اكلاتهم التقليدية لكن ما جراتش نحربها هههههههههههه
اما هاذ المرة راهي بايدي جزائرية وتستاهل التجربة ههههههههههههه
يعطيك الصحة اختي

الله يسلمك ، جربي و ما تخافيش راهي بنينة و هشوشة من داخل بسبب الخميرة

اقتباس:

المشاركة الأصلية كتبت بواسطة amy mima

mmmmmmmmmmmmmmmm

تفضلي قطعة