وصفات من حراير مطبخ وش طيبتي اليوم

[maloo]

nadia7888

هذي البقلاوة يسموها بقلاوة ال****اج و الطبقة الأخيرة تتعمل كالاتي بعد ما تخلصي من البقلاوة نتاعك احكمي العجينة حليها و قطعيها دوائر بمول دائري مشرشف و من بعد احكمي كل دائري و رسيها في مول ال****اج حتى تأخذ الشكل ثم ضعيها فوق حبات البقلاوة بعد ما تكوني قطعتيها و حطي حبة لوز في زاوية الحبة كما في الصورة

[maloo]

كريات الثلج

كيلو شيكولا بيضاء ( تتباع كي شغل كتاب )
4 بياض بيض
علبة نستلي
كيلو جوز الهند
2 علب ترك صغار
شوية فاني جوز الهند

الطريقة:

تغربلي جوز الهند مليح لازم يخرجلك الرقيق 500غ و تخلي بالباقي لحرش للوجه

تذوبي 600غ شيكولا بيضاء في شوية زيت نص كاس تاي

و تضربي بياض البيض حتى يطلع كيما الثلج

بعدها تجيبي حاجة عميقة و تحطي فيها جوز الهند الرقيق و تحطي فوقو الشيكولا

البيضاء و علبة نستلي و بياض البيض و تخلطي مليح مليح حتى تعود متماسكة


بعدها تفتي هذا الترك و تكوري كرة بالخليط و ديري وسطها شوية ترك و عاودي

كوري كي تشكلي كامل الكرات

تروحي تذوبي 400غ شيكولا البيضاء اللي بقات و تجيبي جوز الهند لحرش اللي

بقات و تحطي كل كرة في الشيكولا و ترمديها في جوز الهند

صدقيني البنة و لا في الاحلام هههههههه موالفين نديروه مكانش اللي ما يعجبوش

[awladi]

للمتالقة الهام
حبيبتي قريوش الطاجين:
* 250غ مارغارين أي ماركة تحبي انا جربت فلوريال و لابال نفس النتيجة ( تكون طايبة وباردة ) ( قبل ماتذوبي الزبدة تنقصي حوالي 2 أصابع من القطعة ماتستعمليهاش كامل باش يجيك مقرمش وماشي يتفتت )
* 1كغ فرينة
* 1 م ص ملح ( الملعقة اللي نكيل بيها الملح كبيرة شوية )
تبسي الفرينة بالزبدة مليح ومن بعد تزيدي :
* 3 م ك خل
* 2 بيضات كبار ( أنا البيض نضربو مليح في صحن مع شوية ماء زهر باش مايبقاوش هذوك الكتل نتاع البيض في العجينة )
* تلمي بماء الزهر وحدو ( تتحصلي على عجينة طرية ماهي جارية ماهي يابسة )
تعجنيها شوية حتى ترجع ملساء وتقسميها كريات من 8 إلى 10 حسب حجم الطاجين نتاعك ( حنا عادة نقسموها على 10)
تحطي الكريات في كيس وتخليهم يريحو شوية ) 30د )
حليهم بالنشاء رقاق بسمك حوالي 1 مم ( كل ماتكون خشينة رايحة جيك معجنة من داخل حبة القريوش وطرية وتنتفخ بزاف والفقاعات يجيو كبار وكل ما ترققيها جيك مقرررمشة و طيب مليح من داخل والفقعات صغار بصح ماشي ترققيها كيما البقلاوة المهم كي ديريها مرة او 2 رايحة تتعودي وترجع عينك ميزانك )
قد ما تكبر القرصة في العرض قد مايجيك فيها لفات بزاف وجي باهية الحبة
حاولي تحلي القرصات بشكل مستطيل باش الحبات كامل يجيو قد بعض ومايطيحوش بزاف الحواشي
تفرشي مناديل الكسرة وكل ماتحلي قرصة تحطيها وتغطيهم باش ماينشفوش
أغسلي طاجين الحديد مليح وحطيه فوق الطابونة على نار هااااادئة خلاااااص وأبداي حطي بالوحدة فوق الطاجين لازم غير تنشف العجينة فقط تنحيها مالازمش طيب يعني بمجرد مايتغير اللوم نتاعها خلاص ماتخليهاش طيب وتعمل فقاعات رايحة من بعد مانتنفخش كي تقليها لازم العجينة تبقى شوية مندية
هنا لازم واحد يعاونك : كل ماطيبي قرصة تروليها مليح على شكل حربوش وتدهني الحافة بالبيض المخفوق بالبانسو وتغلقي الحربوش وتحطيه مباشرة في كيس وتغلقي باش العجينة ماتنشفش إذا نشفت ماتنتفخش في القليان
ومن بعد تبداي تحلي الكيس وتجبدي بالحربوش الواحد وتقصي بالبهذي اللي يقصو بيها المقروظ وتكون مشرشفة ههههههه باش الشكل يجي مليح وباش جيك مليحة انتبهي ل2 حاجات :
كي تقصي ميلي مليح مليح مليح باش تتحل من بعد الحبة مليح وتتورق وثاني ماتعرضيش الحبة يعني خلي حق اصبع فقط وقطعي قد ماجي رقيقة تتورق مليح
كل ماتجبدي حربوش تعاودي تغلقي الكيس مليح
كي تقطعي الحبات تحليهم يعني تورقيهم مليح وتحطيهم في صينية وبسرعة تغطيهم بكيس باش ماينشفوش هههههه راكي حفظتيها
كي تكملي كل الحرابيش تسخني زيت غزير على نار متوسطة وتقلي القريوش
طبعا بلا مانوصيك ماتقويش بزاف للنار باش مايتحرقش من برا ويبقى من داخل عجين
وماتنقصيش بزاف باش مايشربش الزيت
كي تخلصي قلين حطيه في إناء وأغلقي عليه خاصة إذا عندك الرطوبة في الدار
وما تعسليهش حتان تبغاي تاكليه باش مايطراش ويبقى مقرررمش
وطبعا ماتنسايش ترشيه بالجلجلانية تزيدو بنة على بنة

إضغط هنا لرؤية الصورة بحجمها الطبيعي.

أعتقد ضرك فهمتي
:
https://www.djelfa.info/vb/showthread.php?t=999630
شوفي في هذا الرابط لتوضيح الصور

[*عاشقة الجنة*]

إلهام07

شارلوت دارتها أختي بالفراز والاناناس والكرز والاجاص المستورد



طلعي كرام شانتيي عادي تكون ثقيلة ( مثلا 100غ ) وفي صحن تحطي مقدار علبة نتاع جبن طازج مع شوية سكر ناعم ( حوالي 2-3 ملاعق حسب الذوق ) وتضربي مليح بالباتور حتان يذوب السكر وضيفيهم للشانتيي وضربي مليح وخلاص ديري واش تحبي بيسكري مغطس في أي نوع مثلا قهوة ، حليي بالشكلاطة ، كابوتيشنو ، عصير ليمون ..... وزيني بأي فاطهة تحبي
هذي من بكري مديروها وكل مرة كيفاش نلبزو :d:d:d:d:d:d

[بشرى2008]

aphrodite 16
parfumdor1 اتفضلي عزيزتي
المقادير
للعجين
125غ زبدة طرية
كاس سكر قلاصي
1 بيضة
ملعقة و نصف كاكاو
ملعقة صغيرة خميرة الحلويات
و فاني
و لميي بالفرينة حتى تولي عندك عجينة طرية خليها ترتاح شوية

الحشو:
كاس جوز الهند.2 مغارف و نص سكر والا على حساب الدوق تاعك. بياض بيضةو ملعقة كبيرة حليب
راح تتحصلي على حشو ماشي شاد روحو باش ما يجيش يابس

شكلي كويرات بالعجينة و حطي فيهم كمية من الحشو و اغلقي مليح و دير شكل كرية و طيبيهم ( ماشي بزاف وحد 10 دقايق)
كي يبردو غطسيهم فالشوكولا و زينيهم كيما تحبي نتييي

[*عاشقة الجنة*]

lahna moka

تارت الليمون بالمورانغ

للعجينة:
250غ فرينة_ 125غ زبدة باردة_ 2ملاعق أكل زيت_ 2 ملاعق أكل حليب_ رشة ملح_ صفار بيضة_ 2 ملاعق كبيرة سكر
للكريمة باتيسيار:
نصف لتر حليب_ 3ملاعق كبيرة سكر_ 2بيض _ 2 ملاعق كبيرة مايزينة_ ملعقة صغيرة فانيلا_ عصير حبة ليمون
للمورانغ:
2بياض بيض_ 3ملاعق كبيرة سكر ناعم_ رشة فانيلا
التحضير:
حضري قبل العجينة: اخلطي مليح الفرينة مع السكر و الملح و الزبدة ثم زيدي عليها صفار البيضة و الزيت و حكي ثم لميه بالحليب دون عجن للحصول على عجينة (ممكن تحتاجي ملعقة اخرى من الحليب كي تجمعي العجينة)
حللي العجينة و ضعيها في مول الطرطة أثقبيها بالشوكة و ضعيها في الثلاجة ترتاح ربع ساعة ثم ادخليها الفرن حتى تنضج تماما.
للكريمة:
اغلي الحليب في كاسرونة و من جهة اخرى اضربي البيض+ السكر و الفانيلا و قليل من مبشور الليمون حتى يذوب السكر ثم أضيفي المايزينة و اخلطي قليلا فقط ثم أضيفي الحليب المغلي بالتدريج مع الخفق الدائم و بعدها أعيدي الكل للكاسرونة و ضعيها على نار هادئة مع التحريك حتى تثقل و بعدها انزعيها و اتركيها تدفأ ثم أضيفي عصير الليمونة و اخلطي
ضعي الكريمة على العجينة الناضجة و سويها جيدا
للمورانغ:
اضربي البياض كالثلج مع رشة ملح ثم أضيفي السكر الناعم و الفانيلا و اضربي و ضعي هذه المورانغ في جيب الحلواني (poche à douille) و ضعيها فوق الكريمة و أدخليها الفرن المشعل من فوق حتى تتحمر ثم ادخليها الثلاجة حتى تبرد.
بالصحة و الهناء

[مطيعة]

كل شيى يهبلللللللللللللللللللللللل

[*عاشقة الجنة*]

touta2010

كيك الطوارئ


2 بيض 6مغ ك سكر 6زيت 6حليب 1خميرة حلوة زازت قارص فرينة

وادا حبيتي مول دائري


3بيض 9 مغ ك زيت 9سكر 9حليب 2خميرو زازت قارص فرينة


هدا الوصفة معتمدا عليها دائما


التزيين شكولا كرام شونتي ........................

[ادرارية]

سلطة التليتلي

2كيسان شاي تليتلي مطبوخ يعني يكون شاد روحو ونديرو يقطر مليح

جزرمقطع رقيق ومفور جلبانة مفورة

طون وزيتون مايونيز خل زيت ملح

[فاطمةع]

فاطمة ع ها ليك الرابط نتاع السفنج[/QUOTE]. https://www.djelfa.info/vb/showthread.php?t=872711

[aphrodite16]

lahna moka
كايك


4 بيض_ 1 كأس سكر_نصف كأس حليب_1 كأس زيت_ 2 كأس فرينة_ ملعقة صغيرة فانيلا_ 1 كيس خميرة_مبشور ليمون.
التحضير:
اضربي مليح مليح البيض مع السكر و المبشور ثم زيديلها الحليب و الزيت و الفانيلا و اخلطي ثم الفرينة و الخميرة المغربلة أعيد و أكرر المغربلة,
خلطي كلش باش تختفي الفرينة فقط ما تبالغيش في الخلط هاذا هو السر,
بعدها صبي المزيج في مول الكاك المدهون والمرشوش بالفرينة و ديريه في الفرن حتى يتحمر.
كي يخرج من الفرن ادهني الوجه بالمربى و زيني بالكاوكاو او جوز الهند و خليه يبرد
انا نحبو كي يبات يزيد يطرى كثر مممممممم ما يتشبعش
جربيه و رديلي بالخبر

[lamia zina]

وصفة ريهام

العجينة
درت عجينة أختي أم راضية برك زدتلها السكر خاطرش الكيفية تاع حلوة كالتالي
كأس ماء
كأس زيت
1 ملعقة أكل سكر عادي
شوية لافاني
الفرينة حسب الحاجة

للتوريق
نشاء
زيت
لافاني

التحضير
100 % كما قالت أختي أم راضية(نحلو لعجينة و ندهنها بخليط التوريق من بعد نلف العجينة و في الأخير نقطعها مقروطات)

الحشوة

درت الحشوة تاع وصفتك لي شوصو بالتفاح
2 تفاحات
3 ملاعق كبار سكر
ملعقة صغيرة زبدة في الأخير

"اضافاتي كانت ماربيتش التفاح بل قطعتو مربعات و زدتلو ملعقة قهوة تاع قشور البرتقال و بعد زدت 1ملعقة ممسوحة تاع المايزينة ألي ذوبتها في شوية ماء بارد و خليت المزيج يغلي..في الأخير ضفت الزبدة و خلتها تبرد"



التشكيل
حليت العجينة كما قالت أختي أم راضية و حشيتها بحشوة التفاح حوالي ملعقة في كل حبة
حطيت الحبات في صينية الفرن و دهنتها بالبيض 3 مرات كما وصفة أختي أم راضية

دخلتها في فرن مسخن مسبقا
تحمرت من التحت و شوية من الفوق خرجتها و دهنتها بالعسل و رجعتها تتحمر كما تكرمتي في وصفتك أختي أم أنس
كس خرجتها دهنتها بشوية لاجولي و رشيت عليها لوز محمص و مرحي

هاهو شكلها من الداخل

[رحيل ج]

للاخت النرجوسة

هذه وصفة خبز الزيتون والاعشاب

حوالي زوج مغارف كبار زيتون اخضر مقطر رقيق

مغرف كبيرة خليط الاعشاب متكون من الزعتر و الفليو

مغرف كبيرة سانوج مغرف كبيرة جنجلان

2بيضات

2 مغارف سكر

مغرف كبيرة خميرة الخبز

نصف كاس حليب

وهدا الكل نخلطوه مليح ونضيف بشوية الفرينة حتى نتحصل على عجينة طرية

وادا شفتي قصحتيهازيدي الحليب غير بشوية

ونقسم العجينة الى قسمين ونورقها بالسميد المتوسط ونحطها تتخمر نصف ساعة

ونكون مسخنة الفرن ونحطها فالفرن وشهية طيبة

[رحيل ج]

لدائمة الحمد

الاخت العزيزة الي سقست على اللوبيا الخضراء ان نخبي منها كميات كبيرة
نقيها ونقطعها ونغسلها ونخليها تستقطر في كسكاس والا قوتوار صبحة كاملة او عشوة كاملة
ومن بعد زيدي امسحيها بتورشون نظيف واعمليها في ساشيات كل ساشية قيبس ماطيبي والى الكونجيلاتور
كي تجبديها نهار تسحقيها طول للبرمة ماتخلهاش تستنى

[رحيل ج]

الاخت الي سقسات على رابط الشاورما تاعي هاهي الوصفة وشكرا لكم على الثقةهاكي الوصفة تاع الشاورما 3كيسان فرينة نصف ملعقة كبيرة خميرة نص ملعقة كبيرة سكر ملح 3ملاعق كبار لحضة 2 ملاعق كبار زيت ماء دافئ للعجن تعجنيها مليح وديريها بولا كيماتاع الشخشوخة خليها ترتاح ثم حليها بالنشا او الفرينة رقييييييقة بزاف وخليها ترتاح10 دقائق تكوني سخنت طاجين المطلوع تكون نارو قوية لوحيها تطيب كي تتنفخ اقلبيها وما تخليهاش تحمار باه ماتقندش ضعيها في فوطة مطلوع داخل كيس بلاستيكي ناتي الان للحشوة صدر دجاج مقطع قطع صغيرة موتارد ملح شوية فلفل اسود شويه برك عل راس المغرفة كيما نقولو حنا كمون مغرفة قهوة هريسة زوج مغارف قارس مغرفة زيت زيتون ثوم ولازم ثم لازم ثم لازم الدجاج يتنقع على الاقل زوج سوايع كيما قالها الشاف نتاع سميرة لازم تقنعيه تقنعيه يقول فيها ويعاود ههههههه. والاضافات الاخرى نتي وواش تحبي تضيفيلها انا نقطع حبة بصلة شرائح رقيقة بزاف وحبة طماطم مكعبات كي نطفي على الدجاج نلوحهم يمممممم وانزيدلها الصلصات هاذو واش نقولك امممممممم