تقسيم الشهرية

[_lydia]

ياريت كل وحدة تقولنا كيفاش تقسم شهرية
وشحال تخصص مبلغ لكل من الاكل و الكرية ووووو.....
وشحال تصرفو في الشهر
نبدا بروحي اول مبذرة عرفها التاريخ منعرفش نتصرف كل منقول نخبي نصيبهم خلصو
نصرفالشهرية كامل ميبقى منها والو
الاكل برك 2ملاين و الكراء3ملاين
ياريت الي عندها طريقة تمشي بيها تفيدني
سلام

[ام امجد14]

شوفى اختى بنت الجزائر الغالية عندها موضوع هااااااااااااااااااااااااااااايل فى هذا المجال تحكم فى مصروف البيت حوسى عليه فى الارشيف ان شاء الله تلقاى الحل هناك

[أم أسرار]

بسم الله الرحمان الرحيم
أختي المحترمة أنا كنت كذالك و لكن الحمد لله فالطريقة التي أستعملها هي كالأتي
ناخد 5 أضرفة و في كل ضرف نضع ما أصرفه في الأسبوع لاتستغربي تقولي الشهر فيه 4 أسابيع لكن الضرف الخامس ندخرو و مانستعملوش إلا حتجة ليه و هكذا و مع العلم كل أضرفة تحمل نفس المبلغ إذا تصرفي 2000 دج فكل ضرف يحتوي على نفس القيمة
هناك ملاحضة
1- الخضرة أشري قيس قيس و كي تخلاص أشري لأنو في معضم الوقت تفسد بعض الحبات
2 - هناك أشياء تشريها مرة كل شهر أو شهر و نصف فمصروف هذه الأشياء تستفادي منها و هكذا .
أتمنا من كل قلبي أني قد أفدتك و لا تنسينا من صالح الدعاء

[melissa lola]

السلام اختي انا كي تجي الشهرية نقضي قضيان الشهر من زيت سكر عجائن ...حتى الشمبوان و الريحة اي كل مانحتاجه خلال الشهر نحي حق الفواتير الهاتف السيارة ....... ونخصص مبلغ لكامل الشهر مثلا زوج ملايين نقسمهم على اربعة اضرفة يعني 500الف في كل ظرف نقضي منها الخضرة و اللحم و الدجاج و الخبز وحتى الفاكهة لمدة اسبوع وهكذا ديفوا نشيط وديفوا لالا علابالنا كامل المعيشة غالية نسيت اختي اهم شيئ الصدقة راهي تباركلنافي اموالنا وصحتنا نتمنى نكون افدتك

[أم أسامة 07]

نصيحتي لك هي ان تزكي الشهرية اولا يعني:
25 الف على كل مليون ( مثلا مرتبك الشهري 4 ملاين خرجي عليه100 الف )
ستلاحظين انك قد ماتصرفي سبحان الله كاين الزايد
رب قال ( ويربي الصدقات )
كلامي أختي عن تجربة شخصية والحمد لله
طبقيها ورديلي الخبر................ رجاء دعوة خير

[_lydia]

المشاركة الأصلية كتبت بواسطة ام امجد14

شوفى اختى بنت الجزائر الغالية عندها موضوع هااااااااااااااااااااااااااااايل فى هذا المجال تحكم فى مصروف البيت حوسى عليه فى الارشيف ان شاء الله تلقاى الحل هناك

شكراا خبيبتي

المشاركة الأصلية كتبت بواسطة حب و ويصال

بسم الله الرحمان الرحيم
أختي المحترمة أنا كنت كذالك و لكن الحمد لله فالطريقة التي أستعملها هي كالأتي
ناخد 5 أضرفة و في كل ضرف نضع ما أصرفه في الأسبوع لاتستغربي تقولي الشهر فيه 4 أسابيع لكن الضرف الخامس ندخرو و مانستعملوش إلا حتجة ليه و هكذا و مع العلم كل أضرفة تحمل نفس المبلغ إذا تصرفي 2000 دج فكل ضرف يحتوي على نفس القيمة
هناك ملاحضة
1- الخضرة أشري قيس قيس و كي تخلاص أشري لأنو في معضم الوقت تفسد بعض الحبات
2 - هناك أشياء تشريها مرة كل شهر أو شهر و نصف فمصروف هذه الأشياء تستفادي منها و هكذا .
أتمنا من كل قلبي أني قد أفدتك و لا تنسينا من صالح الدعاء

برك الله فيك

المشاركة الأصلية كتبت بواسطة melissa lola

السلام اختي انا كي تجي الشهرية نقضي قضيان الشهر من زيت سكر عجائن ...حتى الشمبوان و الريحة اي كل مانحتاجه خلال الشهر نحي حق الفواتير الهاتف السيارة ....... ونخصص مبلغ لكامل الشهر مثلا زوج ملايين نقسمهم على اربعة اضرفة يعني 500الف في كل ظرف نقضي منها الخضرة و اللحم و الدجاج و الخبز وحتى الفاكهة لمدة اسبوع وهكذا ديفوا نشيط وديفوا لالا علابالنا كامل المعيشة غالية نسيت اختي اهم شيئ الصدقة راهي تباركلنافي اموالنا وصحتنا نتمنى نكون افدتك

صح عندك الحق هي طريقة مباركو شكرررا

المشاركة الأصلية كتبت بواسطة نصرية

نصيحتي لك هي ان تزكي الشهرية اولا يعني:
25 الف على كل مليون ( مثلا مرتبك الشهري 4 ملاين خرجي عليه100 الف )
ستلاحظين انك قد ماتصرفي سبحان الله كاين الزايد
رب قال ( ويربي الصدقات )
كلامي أختي عن تجربة شخصية والحمد لله
طبقيها ورديلي الخبر................ رجاء دعوة خير

ان شاء الله نطبقها ربي يعطيك متتمناي

[اماني البتول]

شكرا على الموضوع كيما قالت الخت ميليسا كي يخلص زوجي نقضي قضيان الشهر كامل ونهز مصروف الاسبوع ونهز ادرهم الفوتير مثل الهاتف والكهرباء والماء اما بالنسبة للكراء فنحن نسدد كل 6 اشهر وفي هذه المدة ان كون جمعنا المبلغ الكراء وانا عملا حصالة في الكزينة كل ما يتبق من دراهم اي صرف انحط في الحصلة وفي اخر الشهر اجمعه واتصدق به والحمد لله رغمى غلاء المعيشة فربي الستار على عبادة ويارب اعين ازواجنا ان شاء الله وبارك للمراة العاملة ان شاء الله

[jawada22]

الله يعطيكم الصحة كل واحدة استفدت منها

[رونق الامل]

و الله نفس المشكل
انا و زوجي في زوج خدامين عندنا طفلة واحدة عمرها ثلالث سنين و مالحقناش
الكراء زوج ملايين و غالبا مانصرفو ربع ملايين في الشهر و عندنا ديوووووووووون من اجل اكمال مبلغ المنزل تاع lpa
حابة نقتاصد شوي و نتحكم في الميزانية
انشا الله نجرب افكاركم و نستفاد
ربي يسهلنا و يباركنا لي و لكل المسلمين

[amel kamel]

رانا كامل نفس المشكل نخدم انا وزوجي لكن الكراء متعبنا قسميلي اختي راتب ربعه ملايين بين الكرا مليون ونص والباقى مع العلم عندى طفل عمرو عاميين

[منال100]

كل شيء غال البحر ما يكفيش
لكن نحمده على كل حال كاين للخبز مالقاوهش والسكن ما نهدروش المهم بالقناعة القليل يصير كثيرا ونعيشو هانيين
صدقوني كل ما كانت الشهرية كبيرة كل ما زاد المصروف وحنا لنولفو رواحنا على التبذير نعطيلكم مثال لو كان نرجعو للوراء حوالي 10 سنوات لم نكن نستعمل المكيفات في البيوت كنا عاشين لاباس السخانة بصح نورمال الصيف يعقب عادي أما الآن مستحيل نفوتو الصيف بلا المكيف لأننا والفناه
حنا كبرنا كروشنا وحصلنا رب يدير الخير

[fadila@]

كل شيء غال لكن نحمده على كل حال يعطيكم الصحة كل واحدة استفدت منها

[مينوشه]

اخواتي موضوع هايل انا كنت حاسبة بلي غير انا اللي كارية و مبدرة لاكن الظاهر انو المعظم ياعنيو من نفس المشكل تاع الكراء و تاع كيفاه نتصرف انا مانيش مبدرة لكن كل مل نلم شوي دراهم نقول مادريناش بلاك يفرج ربي بسكن يجي زوجي يبع سيارة و يشري اللي اغلى منها بالكريدي و مبعد يحصل و ما علياغير نسلكلو الدين تاعو على اساس يرجعلي اييييييييييييييه والو النافع ربي
صدقوني انا زوجي هو اللي يبدر و ما يعرفش يتصرف و كيما يسلك 5 ملاين و لا يسلك 500 الف يقولي فضو وفي تفاهات
الله المستعان
اخواتي ادعولي يفرج ربي بالسكن من فضلكم

[zahra ayoub]

ربي يفرج عليك و علينا وعلى كل واحد ماعندوش السكن

[روح مراد]

السلام عليكن أخواتي
ربي يفرج على كل وحدة بسكن مستقل و مستقر آمين يا ربي العالمين
صح كي يكون عندك دار نصف مشكل التوفير تحل
و لكن الناس كامل يعانيو من مشكل الشهرية
أنا عن نفسي عندي 3 غرف و مطبخ و صغير و حمام صغير
عندي غرفة درتها صالون و غرفتي الخاصة و غرفة عجوزتي مغلقة أحيانا تبات فيها و أحيانا تبقى مغلقة مانستعملهاش كامل
رانا نخمو نزيدي نوسعو شوية الدار و لكن ما قدرناش نوفرو كل مرة نوفرو وشوية دراهم جي حاجة يروحو
ماذابيا لوكان نلقى فكرة للتوفير
عجبوني أفكار الأخوات اللي قدموها في منتديات أخرى و في أقسام أخرى
و لكن كل ما نقول نمشي عليها زوجي يخربهالي خطرا الشهرية نتاعو جيروتار يبدى يدي من المصروف المدخر ، خطرا يماه طلبت دراهم يعطيلها، خطرة باباه يسحق دراهم يعطيلو و هي رايحة ....
لوكان نحن السيدات نديرو فكرة أو كل واحدة تقدم فكرة و نجمعوهم و نلقاو مخرج لأزمة الشهرية