وين راهم حراير المنتدى يحكولنا على الفتيل

[ghorba]

عمري ما فتلت وما نتعلمش مادام كاين يتباع علاه نتعب روحي وزيد عائلتي ما تحبش الطعام بصح انا نموت عليه ناكلو صباح وعشية ما نمولوش

[om lojayn]

راني جايا روطار لكن معليش حنا في الصحرا قليل لي متزوجا ومتعرفش تفتل لوكان قلتي منعرفش يديروك في الجرنال الصفحة الاولى المهم نهدر على روحي انا علمتني الفتيل عزوجتي ربي يحفضها خطراكش تزوجت صغيرى مالحقتش باش تعلمهولي ماما راني درك نعرف نفتل كل انواع الطعم رقيق و خشين و متوسط وكل وحنا ناس الصحرى يحبوا الطعام ياسر لدرجة انهم ياكلوه يوميا تقريبا و نديروه مرقة حمراء وتعلمت من عزوجتي كيفا نطيبوا نتاع لعراس و نقدر ندير حتى 30 طبسي حنا نحسبو بالطبسي والمرقة نديرولها التمر الغرس و السكر بصح بنين ما تنحيهش من فمك

[أم ماجد]

ياه ياه يا بروقة الان فقط شفت موضوعك والله فكرة رائعة مانكذبش عليك كنت نفتل قبل الزواج علمتني ماما
اشترطت علي كون ماتتعلميش لفتيل ما نزوجكش وانا حبيت نزوج ههههههههههههههههههه
فتعلمت مليح لكن تعلمني وتشبعني معاير ماما صعيبة بزاف الله غالب هي تعرف تدير كل شئ
المهم بعد ماتزوجت اديت فكرة من ماما بلي لازم المراة تفتل ولا زوجها ما تعجبوش شوفو نية العجايز
بعد مادخلت قفص الزوجية ماحبش زوجي يخليني نفتل نهائيا قالي اشريه من عند واحدة ثقة وماتعبيش روحك احم احم راكي عارفة بروقة الدلال هههههههههههههههه
لكن ماما شبعت سب وقالت الاه الاه على رجال اخر زمن وحتمت علي نفتل وانا في داري وتقولي دبري راسك تاع الناس ميشي نظيف
ومن بعد كي كرهت مني وعاندت ولات تفتل وتبعثلي والان تفتلي اختي الصغيرة علي كل عام شكارة كبيرة لانها ماخالفتش وصية امي وبقات تفتل وانا واش نديرلها زوجها قالها افتلي ؟؟؟؟؟؟؟؟

المهم الان كي بداو لبنات يكبرو قلت نطبق طريقة ماما هيا لبنات نعلمكم لفتيل رغم اني نسيته تماما ونسيت طريقته 18 سنة مافتلتش بصح قدام بناتي نقول مازلت نتذكر هههههههههههههههه
لبنات رفضوا وقالولي يخي تتباع غير نتعلمو الطياب تحوسي علي الفتيل
وحتى ابوهم معاهم ومدللهم بصح انا حابتهم يتعلمو كيما انا معليش مايفتلوش نقول كون ايطيحو في زوج يقولهم افتلوا واش ايديرو نخاف عليهم راكي عارفة بروقة بصح ماحبوش

المهم مازلت نتذكر السياير السقاط والمعاودي وسيار البربوشة والخ والخ

ماما تظن بلي مازلت متذكرة لفتيل وانا صفر هههههههههههههههههههههههه

هذه هي حكايتي مع البربوشة
لكن نعرف نفورها مليح مليح ونقدر ندير كميات كبيرة في الاعراس احم احم
وندير يربوشة لحليب وندير بالمرق الاحمر واللحم والخضر والمسفوف

اي سؤال راني هنا بروقة لكن بعد مافقدت الذاكرة

[أم ايهاب 2013]

انا نعرف نفتل ونفتل كميات كبيرة شكارة 25كغ لكن زوجي مايحبش الفتيل مايخلنيش نفتل وادا جاب السميد يقولي ردي بالك ديريه طعام حنا ناس الجلفة نديروه مرقة حمرة

[oumhana]

سؤال محرج أنا فتلت بكري كنا صغار13/14 سنه وماتت يما وكان خويا قبيح بزاف وكشوف خواتاتي يعلمو فيا يعيط عليا ويضربني ويقول كفاه متعرفيش لازم تتعلمي من الخوف والقهر تعلمت و الحمد لله اما اليوم خانتني شوية الصحه لكن منحبش تاع برا تفتلهولي بنت عمي الله يجازيها.المرقة نديرها حمره وخطرات نبدل نديرها بيضة اقصى كميه 10أو 20 شخص لا أكثر ويعاونوني مشي وحدي.معذره أحييتي فيا ذكرات الماضي

[staifia]

سلامووو بروقة
انا منعرفش نفتل ,,,, وحنا ديما يقتلوه في الدار ,, جامي نشروه من برا ولا من عند لي يفتلو
ديما يجتامعو امي و خالاتي ونفتلو للعولة

[sissou nrdn]

انتو بتحرجونا ليه ................فقتيلنا يا بروقة انا عن نفسي ما نعرفش نفتلو لكن نعرف نفتل البركوكس و كي جيت نتعلم ما خلانيش راجلي قالي نعرفك ما تهنيش روحك

[oum tessnim]

أنا مانعرفش نفتل بصح ربي يمد الصحة وطول العمر لأم صديقتي أم أحمد هي لي تفرحني وتبعتلي الكسكسي المفتول على أصوله من باتنة الى فرنسا
وأنا الكسكسي نديرو أحمر أو أبيض بصح نحبو احمر وحار ومعمر خضر ممممممممممممممممممممممممم جوعتوني سلام

[أم نهال]

أنا بكل صراحة ما نعرفش نفتل كنت نفتل عند وحدة بالدراهم الحق مراة نظيفة بزاف و طعامها والله مايتشبع وبصح الآن نشري عمر بن عمر.

[أم نهال]

السمحولي ماقلتلكمش كيفاش ندير المرقة أنا المرقة نديرها فالشتاء حمراء بالخرشف والزرودية و الحمصو الدجاج ولا اللحم كيما نديرها بلفت و كمية صغيرة فول يابس و مدشش و عدس صوص حمرا والدجاج.واله ماتتشبع والآن في وقت اللوبياء ماشطو نديرها بيها و الزرودية و الحم بقري و في الصيف في أغلب الأحيان نديرها بيضاء.

[أم نورين]

السلام عليكم انا في رايي الفتيل اسهل شي تتعلمه الفتاة في المطبخ انا تعلمتو في السن الثانية عشرة وبعدها تعلمت العيش والبرويل اللي هو اسهل منهم كامل ولما اصبحت في سن الثامنة عشرة اصبحت نفتل شكارة تاع25 كلغ في نهار كاش نهار نخبركم طريقة فتيل البرويل ألي هو طعام البلوط وشكرا

[ام عبودة]

اييييييييه طحت عليها عزايج ولا واش هههههههه
انا من كنت في دارنا ماما هي اللى تفتل تاع العام كامل وكل جمعة نديروه وانا نطيب المرقة حمراء باللحم والخضراء والكابوية خاصة ونسمقوه بالدهان الغنمي يممممممممممممم ويجي رطب مرطب الله الله من تزوجت راحو اياموووو
عند عزوجتي يديروه يابس شوي مي خاطيك علمتهم كيفاه يرطبوه هههه
والمرقة اما حمراء او بيضاء او خضراء ههههههه
كاين واحد العشبة يسموها البندراق يقطعوها رقيق ويغسلوها بالماء السخون ومن بعد في الكوكوت يحط من فوقها البطاطا والبصل وسنينات ثوم والفلفل الاحمر اليابس والفول واليابس ولحم الحاشي**لحم الجمل الصغير**
حبة طماطم والملح والكابوية غير شوية ومقدار كاس زيت ويغلق الكوكوت وعلى نار هادية حتي يطيبر اللحم ومن بعد نحي اللحم ونرحو المرقة ونزيدولها شوي ماء باش تدخل الحوايج في بعضها ونديرولها فلفل اخضر ونطفو علبها
والبنة روعة اما الجديد عليا انو الكسكس عند اهل زوجي لازم معه سلاطة خضراء
والبندراق عندو موسم الصيف زمن بعد يجى البطراف وهو يشبه السلق عندنا لكن يختلف في الحجم ويطيب كيفكيف الاختلاف الخضراء هنا نزودو البطاطا ونقصو الكابوية
والفتيل انا مانحبش لكن نسلك راس نشري تاع بن عمر المتوسطة للمرقة والرقيقة للمسفوف بنتها كي تاع الدار تقريبا

[lyna2007]

موضوع هايل يعطيك الصحة
انا نعرف نفتل تعلمت وانا في عمري 16 سنة امي اصرت ان اتعلم الفتيل وكنت نفتل مرة في 15 او 20 يوم كميات قليلة غير قيس مانفطروا بيه يوم الجمعة هههه
لكن بعد الزواج تفنينت هههههههههههه واصبحت نشري اعمر بن اعمر او سيم ويخرج مليح والفناه

[بريق الامل&]

[بريق الامل&]

العولة : كسكسي ومحمص نوعان من الدقيق الذي يتحول بفعل حركات دائرية الى حبيبات تعرضها النسوة الى اشعة الشمس لتجف بعدما اضفن اليها الملح كمادة حافظة . تجتمع النسوة يو م العولة وعادة ما يكن من افراد العائلة او العائلات المجاورة منذ الصباح الباكر ويوزعن الادوار بينهن وتتعالى الزغاريد بين الحين والاخر وتشترك كل النسوة بما تجود به كل واحدة من انواع الغرابيل مثل الطلاع والسقاط وغربال الشعر