شيش في رمضان ما نرميش

[ام سلسبيل البليدية]

السلام عليكم انا حبيت نوريلكم طريقتين للاستفادة من قشور البرتقال مترميوهمش بعد ما تاكلوا البرتقال
اول طريقة هي عمل فواكه جافة لتنكيه الحلويات كالكيك و ال****ز و الله روعة
ناخذ القشور و نقطعهم مربعات صغيرة و نحطهم في اناء بيه ماء سخون يفظل يكون زجاجي ليس المنيوم و نخليه حوالي 8ساعات ام بعد نصفيهم و نغليهم في الماء حتى يطراو في طنجرة اخرى نطيب سيرو كيما نتع البغرير امبعد نحط فيه قشور البرتقال المغلي و المصفي ونخلي الخليط يعقد
بعد ما يبرد يحفظ في علبة محكمة الاغلاق في الثلاجة.
الطريقة الثانية هي لعصير هايل خاصة الا ما عندكش برتقال ،و حبيتي عصير بذوق البرتقال؟؟
تاخذي جزر تنقيه و تغليه حتى يطيب ام بعد تزيديلو كمية من الفواكه الجافة الجاهزة نتع الطريقة الاولى و السكر حسب الذوق او تطحني كلش بالبراميكسور،ام بعد تحطي الخليط فوق النار مع نصف باكي فلان فاني لكل لتر و يغلى يترك ليبرد و تزيديلو الماء حسب الذوق
بصحتكككككم

[zokhrofa]

مممممممممممممممم طريقة شابة بزاف يعطيك الصحة اختي البليدية ناس الطبع و الشّان

[ام سلسبيل البليدية]

ربي يحفظك اختي زخرفة
الجلبانة كي تبقالي نطيب صوص حمراء و نزيدهالها و نستعملها للروز او السباقيتي

[zokhrofa]

اهلا

قصدك الجلبانة تاع الكباب ؟ ولا تاع آش من طبق ؟

[ام سلسبيل البليدية]

طاجين الجلبانة بيض بالدجاج

[zokhrofa]

اه هذا ما نعرفوش حطيهولنا وصفة مع الصور من فضلك

[ام سلسبيل البليدية]

على العين و الراس اختي زخرفة بصح عندي مشكل مع الصور ماعرفتش كيفاش نحطهم انا نخدم بالتليفون ما شي بالميكرو

[zokhrofa]

اوكي شوفي

ادخلي موقع

www. up. djelfa . info

نحي الفراغات

كي تدخلي تلقاي رفع الملفات

انقري على choidir un fichier

لكن ننصحك من الان اذا راكي مصوراتو بالهاتف نقصي حجم الصورة

كيف ذلك ؟

احكمي الزر لي ينقص الصوت و لي يطفي الهاتف ادركي عليهم فيزوج راح يصى حفظ لصورة

روحي وين راهي و حطيها في الموقع لي قتلك عليه سابقا باش كي تحطيها هنا في الجلفة تطلع تم تم

[ام سلسبيل البليدية]

عندي فكرة اخرى كيبقالكم الروز المغلي
تاخذو مقلات تحطوها تسخن تحطي فيها شوية زبدة تذوب و تحطو البيض المخفوق كيما كي نديرو البيض المقلي كي يبدا يطيب نزيدولو الروز، سنة ثوم مرحية،كمون كروية،كركم ،معدنوس مقطع اذا تحبو الخردل تزيدو ملعقة صغيرة حتى ينشفو و يطيب البيض ،في الاخير تقدرو تزيدو الجبن المبشور و المعدنوس للتزيين و الله روعة انا كنديرو دايما يعجب عايلتي
ملاحظة: ينصح الخبراء بعدم الاحتفاظ بالروز المطبوخ لمدة طويلة و اعادة تسخينه عدة مرات خطير لذا عاودو استعملوه كيما وريتلكم بلخف ويجي مختلف تماما

[ام سلسبيل البليدية]

ربي يعطيك ما تتمناي اختي زخرفة راح نسيي هاذ الطريقة و انشاء الله في الايام المقبلة راح نقدر نحط وصفات مصورة و انشارككم افكاري عندي بزززززاف ههههه

[zokhrofa]

الطريقة شابة بزاف تاع الارز و تشهي

حسنا اختي في انتضار صورك

[ام سلسبيل البليدية]

السلام عليكم اخواتي اليوم جبتلكم طريقة بسيطة و رائعة للانتفاع من الخبز البايت قرمشة للسهرات و هي بديل لاطفالنا عن الشيبس و المملحات التي تباع تكون جد مضرة مليئة بالزيوت و المظافات المسرطنة
اولا ناخذو الخبز البايت و نقطعوه مكعبات صغيرة نحطوه في اناء ثم نزيدولو قليل من الزيت و نخلطوه ثم نزيدولو المنكهات ممكن زعيترة او جنجلان او كمون او حتى القليل من الفلفل الاحمر الحار المطحون او جبن شيدر مبشور كيما تحبو او ممكن يكون حلو نزيدولو فنيليا و جنجلان و سكر ثم يوضع الخليط في صينية مغلفة بورق الطهي و تدخل لفرن مسخن مسبقا حتى يتحمر و بصحتكم

[zokhrofa]

سلام اختي شكرا جزيلا

نعطيك فكرة حكيه بالثوم تان تجيك بنة شابة

[ام سلسبيل البليدية]

السلام عليكم حبيباتي اليوم جبتلكم وصفة للاستفادة من بقايا الحلويات الجافة يعني كي يكون عندك قاطو تفتتلك تحفظيه في علبة حتى تلمي كميةو ولا عملتي كمية كبيرة و كرهو منو افراد عايلتك تقدري تحوليه لقاطو راقي و بنين بزاف اولا تطحني القاطو بالروبو و تزيديلو كاوكاو او لوز محمص مطحون كاكاو اسود و كاكاو بني و نلمو المزيج بالعسيلة حتى نتحصل على عجينة نشكلوها كريات و نغطسوها في شكولا سوداء مذابة ثم في الكاوكاو مرحي خشين جربوها و متندموش و الله روعة

[zokhrofa]

شكرا جزيلا صحيتي على الفكرة