السلام عليكم
علابالك الناس واش دارو في فترة 15 يوم
في الصين تم بناء ناطحة سحاب تخيلو ناطحة سحاب كاملة في 15 يوم فقط
و من جهة أخرى اليابان بناو عمارة من 3 طوابق خلال 24 ساعة يعني نتا تنوض صباح ربي تروح للخدمة ما تصيب والو و غدوة من ذاك تصيب عمارة 3 طوابق
هذو علاه قدرو يحقو كيما هذو الأمور اللي تبانلنا حنا مستحيلة
هم بشر مثلنا و أولاد 9 شهور كيما حنا
مالا علاه هوما يقدرو يحققو هذي الأمور الرائعة و حنا لالا
بكل بساطة لأننا نحتقر أنفسنا و لا نثق بها
لم يمنحك الله تلك النفس لتعذبها و تحتقرها فهي نفسك أمانة عندك اعتني بها حتى تؤدي أمانتك يوم الحساب
لذا ثق بها و بما تستطيع أن تحققه في هذه المدة
من وجهة نظري 10 أيام و ضرك راهي 9 مدة طويلة بزاف بالرغم من أني مازال ما كملتش الحفظ و مازال ما راجعتش كل المواد
و راني في المراجعة تقريبا في 55/100 و لكني متفائل بأني سأنتهي من كل شيئ قبل موعد الامتحان حتى لو اضطررت للمراجعة و أنا في ريقي لاجتياز الباكالوريا
نعطيك معلومة خفيفة
حنا الجزائريين نخدمو بشكل أفضل تحت الضغط (الانتاجية تزيد تولي عندنا قوة خارقة)
مالا قولولي كاين ضغط كيما اللي راكي فيه الباك في الطريق و المراجعة ما كملتش
بالنسبة ليا هذا حافز ماهوش حاجز
من جهة أخرى ضرك أنتي فقدت الأمل و كرهتي و راكي حاسة بالضعف
واش يكملك هذو 9 أيام
تبقاي أسيرة شعور خانق ضاغط مؤلم من الداخل و ألم النفس أشد من ألم الجسد
و نهار تجوزي الباك يزيد هذاك الألم لأنك تندمي على ال9 أيام اللي ضيعتيها من المراجعة
و زيد لازم كل مادة تديريلها أسبوع باه تراجعيها (هذا غير معقول علاه رانا في النازا ندرسو في الكواكب؟)
نورمال كل مادة ديريلها يوم
تبانلي يوم أكثر من كافي و راجعي شوي شوي من كل عنصر افهمي مليح و حلي موضوع ولا زوج تاع باك و تتهناي
نظمي وقتك برك
ان شاء الله نكون افدتك ولو بصنع فتحة صغيرة يصلك منها نور الأمل في غشاء اليأس الذي غلفتي نفسك به و عزلتي نفسك عن طموحك
ربي ينجحك و ينصرك و يعينك
كل التوفيق لكم
مع تحياتي max8