فن الكروشيه بانامل حرائر الجزائر .....ورشة ((( لمة لحباب))).......سموا بسم الله و تفضلوا

amira19 · 2013-03-03, 15:56

اهلا و سهلا باخواتي و حبيباتي في الله

نورتوا ورشتي و اسعدني تواجدكم و انضمماكم الي

سميتها " لمه لحباب" لانو كامل لحباب رايحيين يكونو معانا

" يعني نورمالمون نسميها لمه مهووسات الكروشيه " ههههههههههه بصح ماعليش

المهم هي لمه جزائرية و بامتياز
لالا لينا قاتلك نكملوا في 3 ايام وجدو الكرونومتر و ابداو احسبولها هههههههههههه

هادا هو الصدر لي طلبت باترونو الاخت بينا و انا عجبني بزاف بزاف لانو انيق و جديد و سامبل و باهي لذا نتمنى هي ايضا تلتحق بالورشة و تنضم لينا

و طبعا كاين لورونج لاخر لي قاتلي ghalemmm لا درتيه راكي فحلة تاع الصح و انا بصراحة نموت على التحدياتتتتتتت و نديرو نديرو بربي ان شاء الله

نكملو هادا و نوليو للعبري لوخر ههههههههههه

لانو معضمنا محترفات رايح يكون شرحي بسيط فقط

..
.
.
..
.
.
بسم الله ابدا على بركه الله
اللوازم

4كبب و كل وحدة تخير لون باهي
10 anneaux متوسطة الحجم
50 بيرل على شكل دمعة او ورقة شجر

10بيرل مدورة قد لانو

الصدر فيه عشر وردات زوج في الذرعين و 4امام و 4 خلف

طريقة عمل الوردة

نعمرو لانو بالماي سيري و من بعد نعمل 5 سلاسل تاع 15س و بيناتهم 3 غرزات حشو

و من بعد كل قوس تاع 15 س نعملو فيه 15 بريد +بيكو+15بريد و نسكرو في الوسط

شفتو تاعي جات تهبل ههههههههههههههه

ثانيا نلزقو الوردات تاعنا بالبرا و الخيط بهاد الطريقة

لي حابه تعتمد طريقة اخرى دبر راسها المهم تجيها مليحة و خلاص

ضرك نوليو للكتفين

تولهو مليح وين بديت 3 فوق الوردة ووحدة فوق الريشه تاع الوردة

نعملوا 4بريدات +1س+4بريدات+4س+4بريدات+1س+4بريدات

" الاخت لي طلبت مني ندييرو صدفات جربت و ما عجبتنيش لهدا درت نفس الطريقة تاع الموديل الاصلي"

و من بعد نفس السطر نعاودوه

و من بعد نفس الطريقة لكن في 4س نسكرو بغرزة حشو السطريين السابقيين يعني نديرو 4س+غرزة حشو+4س

و نكملو بنفس الطريقة نعاودو هاد الثلاث سطور 8 مرات حتى نتحصلوا على الكتف الاول " بروتال"

و طبعا كل وحدة و قياسها كاينه لي ضعيفة تحتاج اقل من 8

المهم كل وحدة تقيس على كتفها و لي ماهيش حابه الصدر يكون هابط و مكشوف تانيك

و نعاودو نفس الطريقة 4 مرات 2 تاع الامام و زوج تاع الخلف و طبعا نلصقوهم بالماي سيري

.........................
و الان اخر جزء هو الذراعين

يا لبنات راني بدلت الطرييقة الاولى لانو الاولى تخلي الصدر مكشوف و اغلبكم كانو حابينو يكون مشتور شويا

اذا لعيونكم المونش الجديد

شوفو كيفاه درت بديت من الوردة و جيت طالعة عملة 14 سطر و لصقتو بالماي سيري

الطريقة راهي واضحة جدا في الصورة

و النتيجة

.
.
.
..
.

نتمنى تكون الطريقة واضحة اي استفسار اميرتكم في الخدمه

بالتوفيق اخواتي و يا الله شدوا الهمه و فرحوني بالتطبيقات

و هادي النتيجة

zahra30 · 2013-03-03, 16:00

بالتوفيق اختي اميرة ولكل الاخوات .... انا السنة فنيانة انتاع الصح ما فهمتش علاه ؟ كنت نخدم لكروشي وليزيقوي والسنة 0000 ما فهمت فها والوووو
المهم راني نتبع معاكم لعلى وعسى نتوضو فيا الحماس ..... سلامي

حمدا لله كثير · 2013-03-03, 16:02

اهلا بيكي الحمد لله علي الورشة و مبروك علينا المحبة الجماعية و ان شاء الله ديما ملمومين في الخير يا لحباب

و قوليلي وش من لون خيرتيه انتي يا اميرة و الي تدخب تقولي علي اللون الي دارتوا ههه

اني درت " الوردي و الاخضر و القري و الموف اني مدايرتهم ماكالاه "

اميرة اني غلطت برك جيت نقولك 30 يوم نسيت ماكتبتش الصفر هههه

شكرا للمة المفرحة سلامي لجميع البنات و الامعات المشاركات معانا

اياو كل وحدة تسمي بالله و تهز طرف

قبل مانبداو و بالاكوا الي عندها لولاد تدي زوج ام رامي تدبحنا وحدة وحدة ههه

didahe · 2013-03-03, 16:04

فحلة ونص اشحال انحب اللمة شكرا لك اميرة

سدرةالمنتهى · 2013-03-03, 16:07

مبروك افتتاح الورشة حبيبتي................ قل هو الله احد عليك من كل حاسد يارب ..................... عمل و اتقان و ابداع و خفة يدك علابالي تبدايه بالصحة و الهنا انا صراحة ماعجبنيش راني نكمل في لانجري اولا ثم نتلهى بحاجة اخرى موفقة حبيبتي

ادخلي للغرفة انا انتظرك

staifia · 2013-03-03, 16:13

اهلين اهليييين بالحباااااااااايب
ما احلاها هادي اللمة ههههههههههههههههههه
ربي يدومها عليناااااااااااااااااااااااااااااااا
مبروووووووووك وافتتاح الورشة

dr.omahmed · 2013-03-03, 16:24

لالا اختي العزيزة كاين لماش شاطرات كيفك انا مثلا

فاذا ممكن الشرح المفصل لازم ندير هذا الصدر ولا ندي طريحة من عند زوجي لبارح دزيت 40 كلم باه جابلي اللوازم

حمدا لله كثير · 2013-03-03, 16:29

اباباباباباااااااااااااااااااا فكرتوني في البيس نتاع الجامعة كي ييجي

منين يتحل الباب الهجوووووووووووووووووووووم

هاكدة الورشة هادي منين تحلت هجمناااااااااااااااااا كامل

حمدا لله كثير · 2013-03-03, 16:35

اقتباس:

لالا اختي العزيزة كاين لماش شاطرات كيفك انا مثلا فاذا ممكن الشرح المفصل لازم ندير هذا الصدر ولا ندي طريحة من عند زوجي لبارح دزيت 40 كلم باه جابلي اللوازم

قتلتيني بالضحك اختي

و اكي ديريه ديريه غير ماتخميش

ام احمد وصال · 2013-03-03, 16:40

اعلاه يااميرةحرام عليك المبتدئات اليكيفي معندهمش بلاصة مي معليش كي نحترف اني نخدمو ونجي نوريهولك في دار راجلك ان شاء الله موفقة حبيبتي و المزيد المزيد من الورشات

زهرة الهضاب 19 · 2013-03-03, 17:18

اهلا أهلا ببنت بلادي الفحلة تاعنا

يا بنتي واحد ما يبحداك راكي فحلة و المنتدى كامل مستعرفلك

انا عندي 5 كبب تاع أزرق سماوي كنت ناوية ندير بيهم الصدر تاع ديدا ....لا تبداو غدوة و لا نبدا بيهم و صدر ديدا نشريلو من بعد ....

تحياتي و في انتظار الحماس

صحيتي الفحلة

amira19 · 2013-03-03, 17:31

شكرا على الردود و الحماس و التطباع ههههههههههههههههههههههههههههههه و ما تخافوش راني نشرح يا لبنات ميش خسارة في حباباتي و تاني خفت من سي محمد يجي يعطينا طريحة حنا ههههههههههههههههههههههههههههههههههههههههه

تم بعون الله اضافة اول جزء من الدرس

yaya41 · 2013-03-03, 17:51

السلام عليكم أخواتي هل من لديه الصورة أوضح للكول بأكمله

kakpop · 2013-03-03, 18:00

مبروك عليكم الورشة اختي اميرة 19
شوقتيني باش نديرو كي نكمل لخدمة نتاعي لي في يدي نخدمو و نوريلك خدمتي
انا عجبني الحماس ربي يخليكم

وليد مولودية · 2013-03-03, 18:00

شكرا اختي اميرة و بالتوفيق للجميع

اميرة وش معنى بيكو راني نخدم بلا بيكو ههههههههههههه

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري