افيدوني باراءكم رجاءا

[مشكلتي]

السلام عليكم ورحمة الله تعالى وبركاته نتمنى من لديه خبرة او تجربة او حتى راي سديد يفيدني به ولكم جزيل الشكر
انا عزباء في الثلاثين وبضعة اشهر قاعدة في الدار لاصنعة ولا عمل تقدم لخطبتي مطلق خمسيني لديه ستة اطفال انا محتارة ومترددة خايفة نقبل نتعذب معاهم ومايتقبلونيش خايفة نرفض ونبقى بدون زواج
تعبت وماعرفتش وش نعمل خصوصا وانو مابقاش بزاف وقت
يرحم والديكم عاونوني وشورو عليا اسكو ممكن ينجح هذ النوع من الزواج ولا محكوم عليه بالفشل
انا حرت وبحرتلي وخايفة في كل الحالتين من النتيجة
راني نستنى جواب وشكرا مسبقا لكل من رد علي او حتى عاوني بدعوة صغيرة والسلام عليكم ورحمة الله تعالى وبركاته

[ع.عيسى]

ثلاثين عام ويضعة أشهر صراحة مزالك صغيرة باش تقولي على نفسك فاتك الوقت ، دركا البنات ولاو يتزوجوا في هذا السن .....بالنسبة للسيد الذي تقدم لحطبتك ،هناك عدة امور ومعطيات تتحكم في نجاج الزواج او فشله وتبقى في علم الغيب....، اول حاجة هل انت متقبلتيه كشخص بغض النظر عن اولاده ؟؟ .هل هو قادر يوفق في لحياة بين اولاده وبينك ؟؟ انجذبتي اليه اولا ؟؟ ...ثانيا بالنسبة لاولاده لا نقدر اننا نحكم انه يتقبلوك اولا ...ممكن انه يتقبلك 5 ويرفضك 1 ، او العكس ، او يتقبلوك كلهم ، او العكس....الخ هذه تبقى في علم الغيب ، اذا كانوا يميلوا لابوهم اكثر رايح تكون نسبة احتمال تقبلهم لك كبيرة جدا وما تلقايش مشكل معاهم اذا عامليتهم مليح ، اما اذا كان يميلو لامهم اكثر وما يحبوش باباهم رايج تكون نسبة احتمال كرهك ورفضك كبيرة جدا ...كلش يبقى في علم الغيب .
النصيحة لي نقدر نقدمهالك ...صلي صلاة الاستخارة مرارا وتكرارا ...ثانيا لا يكون قرار قبولك بناء على نظرتك لنفسك ( خلاص كبرت... فاتني الحال ...لازم نتزوج ...الخ ) لانه رايح يكون اسوء قرار لك ،

[مراد سابقا10]

مازالت صغيرة اختي بصراحة انت في 30 وهو في 50 سنة لن يحدث التوافق بينكما .

مالا ارفضي احسن انت خلقت لتكوني ملكة في بيتك لا ان تكوني خادمة لأي شخص اخر .

[رَمَادِيَاتْ]

30 عام تهدري هكا!
وكانو انت لي راكي في 50 مش هو

هذا النوع من الزيجات يكون الغرض منك فيه بدرجة أولى هو تحقيق دور المربية لي تلم الدار وخلاص..


بمعنى آخر لي تقبل رجل ب 6 أولاد.. لازملها تدخل لحياتهم باه تبعهم مشي باش تأسس حياة مستقلة لروحها

أعتقد انها معادلة غير متكافئة

[قدور بن عاشور]

أي واحد قبل أن يعطي النصيحة الأفلاطونية المثالية يسأل نفسه هل كان سيقبل بهذه الزيجة لأخته أو ابنته؟
طبعا لا أظن عاقلا يقبل بهذا،
إذن نعطيك نصيحة أخوية بكل واقعية أرفضي بكل ثقة بالنفس و بقوة و بدون تردد و ما تشوفيش ڤع موراك.
هناك بعض الزيجات الواحد يتمنى يبقى عازب للأبد و ما يغرَّقش روحو فيها.

[أم ميرال و آرال]

حتى و يكون هاذ السيد فيه كل المواصفات المليحة ما نظنش عندك
الصبر و القدرة تتحملي و ترفدي ولادو الستة.

[محمد محمد.]

شوفي أختي أولا : عليك بصلاة الإستخارة لأن الله سبحانه هو الذي يعلم ما هو خير لك و لا اي عبد من عباد الله فلا تستمعي للنصائح العاطفية و الإندفاعية .

ثانيا : مايغلطك حتى واحد و يقولك راكي صغيرة فهذه لاعقلانية لأن سن الزواج الحقيقي هو البلوغ و 30 سنة راكي كبيرة و لازم متضيعي حتى فرصة للزواج لأنه بعد الثلاثين تنقص إحتماليات الزواج خاصة و ان الإنجاب لدى النساء يتوقف بين 35 و 40 في الغالب.
بالنسبة لسن الرجل فهو مناسب جدا و لا إشكال فيه و بالنسبة لأولاده فأعتقد انهم كبار و اعتقد ان منهم من يبقى مع امه ' فحاولي ان تجسي نبضهم ليتبين لك الحق و قبل كل شيء صلاة الإستخارة هي الأساس

[نفحات]

يا الله ما أصعب ان تربي اولاد شخص آخر والمصيبة هذو امهم على قيد الحياة زيدي اضربي الصعوبة في اثنين
بأه واحدة تقبل بمثل هذا الزواج لازم تكون صنديدة صح وعندها رسالة في الحياة ماش ساهل الأمر اطلاقا راه مسؤولية عظيمة واللي تتلقى عرض مثل هذا لازم تتجندلو وتتجهزلو كما ينبغي ماش مجرد اني ما لقيت بيها وين وفاتني القطار نقبل برك لا هذا راه اشبه بقبول وظيفة مربية أطفال
المهم الموضوع قديم ما بقاتش هدرة خبرينا الأخت هل قبلت ام رفضت واش صرا درتينا الفضول هههه
ربي يقدرلك الخير

[نقاء روح]

اختي انت ناقصك ايمان بالله وبالارزاق والمكاتيب حتى تقلي فاتني الوقت يا ليتك تعرفي حاجة بلي في الارزاق ماكنش فات الوقت هي بيد ربي عزوجل ومتى يحين وقتك تجيك .عليك فقط بالدعاء واغلقي وذنك للناس الجاهلة كاين الي توصل 25 سنة يقولو عانس هل صح عانس اكيد مجانين ؟وماكنش عانس كاين وحدة مازال وقتها مازال رزق ربي ماجاهاش لحكمة.ربما الله يؤخر رزقك ليعطيك الافضل والاحسن. نعرف وحدة وصلت 50 سنة وماحبتش تقبل بلي يجي غير الشايب والمطلق بقفة ولاد والي على ضرة تولهت بروحها تحفظ في قران تعلمت حلويات ودارت مشروعها ملات وقتها انت عندك فراغ اشغلي وقتك بحاجة مفيدة الرجل والزواج جزء من حياتك وليسوا كل حياتك حياتك فيها عبادة فيها حفظ قران فيها تعلم صنعة وما تبعيش المجتمع لمريض الجاهل ..عليك بالدعاء وقيام الليل ييرزقك ربي زوج صالح .هذي المراة كوصلت50 سنة ختمت حفظ كتاب الله مشروعها تاع حلويات تقليدية كبر مع انها فقيرة واهلها معقدين غير مسموح ليها تقرا في تكوين مهني تعلمت من االيوتيوب وكانوا يستهزءوا بيها وحتى اخواتها يعايروها عانس وفاتك الوقت ما تجيبيش اولاد واقبلي بالشايب عمرو 80 سنة وكترفض يستهزاو بيها علاش راكي تشرطي وانت مولاة 50؟
صبرت على الاذى وتقربت لربي اكثر حتى كتب ليها ربي مكتوبها ورزقها كوصلت51 سنة بعث ليها ربي رجل 55 مطلق دون اولاد يخاف ربي تزوجو دارو وليمة صغيرة وداها للعمرة كرجعت بعد شهر حملت تعرفي واش معنتها حملت وهي دخلت لسن الياس في سن 49 سنة وفوقها اكرمها ربي بتوام وضرك متهنية ما شاء الله تعاون في راجلها بمشروعها وتحفظ في الاولاد الصغار قران ..وانت جاية تحوسي ترمي روحك حتى لو عازب كبير عليك بزاف بزاف هو داخل لسن الشيخوخة وانت مازالك في سن اوج الشباب راح تعاني معاه فمابالك اب 6 اولاد يشربوك المر حتى لو هو ناس ملاح معاك على جال ولادو يولي مش ناس ملاح وهل سقسيتي روحك هل تقدري رعايةومسؤولية 6 اولاد ماهمش حتى اولاد كرشك كون تنصحي واحد يبكي ويقول لباباه ضربتني وسبتني خاصة باين راهم في سن المراهقة وحتى لو عند امهم تسمع بطليقها تزوج تبعثهملو وهذا الي عمرو 50 سنة واب 6 اولاد ما حشمش على روحو يخطب في عازبة قد نص عمرو؟ اذا حاب لحلال كاين الي قدو في العمر وعازبات ..علاش يحوس على الصغر؟تاني قادر يرجع طليقتو وشفت بعيني بعد ما تزوج رجع طليقتو وقال ليها على جال النفقة ما عنديش ولات طلبت الطلاق....خمي مليح يا اختي وقوي ايمانك ايمانك ضعيف تقولي فاتني الوقت علاش بقرة انت ولا نعجة باش يبيعوها ولازم تتباع ولا تتذبح قبل ما تشرف ؟ راك انسانة عطاك ربي مكانة كبيرة وحقوق ولازم ما ترميش روحك بسبب عقلية المجتمع المريض 50 سنة ولو عازب والله تعاني معاه خلي اب 6 مراهقين .هل كيكون كاتبلك ربي تموتي عازبة بلا زواج هل تجهلي وترمي روحك في الزنقة عللى الرجال تقوليلهم تزوجوني بسيف؟.الزواج جزء من حياتك وليس كل حياتك اشغلي روحك وتعلمي صنعة ومطالعة رياضة ادخلي لدورات مفيدة كاين مجانية عن طريق النت تعلمي لغات ...والزواج كيكتبلك ربي يجيك وحدو للباب رزقك

[نغہم الہروحہ369]

شوفي ختي أي طريق في حياتك تروحي ليه بدافع الخوف مش بدافع الرغبة والاقتناع تراجعي قبل الخطوة الاولى لانك راح تفشلي وتنضري ..دافعك للزواج من هذا الشخص هو خوفك انو تبقاي بلا زواج او "يفوتك القطار" كيما يقول المجتمع الجاهل مش لانك باغية تتزوجي بارادتك وكامل اقتناعك ...مزلتي صغيرة اختي وقلتي خمسيني +مطلق+عندو 6أطفال!!!! .تربية الاطفال مش ساهلة ويظهرلي والله اعلم انك رايحه علا جال تهربي من حالتك مش علا جال تحتويهم وتكونيلهم صح ملجأ
كنصيحة حاولي تخدمي اي شيء .ديري حرفة في يدك علا الاقل وصيبي مصدر دخل ولو قليل المهم تكوني مستقلة ماديا اولا ،ونالية وقتك ثانيا وثالثا واحد ميقلقك او تحسي روحك عالة .وثقي انو الزواج رزق واحد واذا كاتبلك ربي كبيرة ولا صغيرة تتزوجي .لكن أيضا ارفعي استحقاقك يجيك الي يناسبك ومترضايش باي حاجة علا جال الخوف ولا هدرة الناس
ربي يكتبلك الخير ويزقك من فضله

[Rofrof]

ممكن انت لم تقبلي .. وامل انك لم تقبلي!
وبما انك لم تذكري الا انه سبق له الزواج وله اولاد ويكبرك بعشرين سنة فلم تذكري الا ما يحث على رفضه! انت في اعماقك تبحثين عمن يدفعك للرفض، فمادام الامر هكذا على المراة ان تنصت لذلك الصوت داخلها.
وانا رأيي هو يكبرك بعشرين سنة او اكثر وانت في الثلاثين يعني هاداوين بديتي تقولي بسم الله للحياة. اصبري وربي يجيبلك أحسن ان شاء الله.
الا ان كان هو ثري ومتدين ووسيم ورياضي فيبدو اصغر وروحه شبابية وولادو مربيين وعايشين عند يماهم وزوجتو خاطياتو دايرلها حدود، وانت يعيشك ملكة ويخرجك لاوربا وامريكا واستراليا هنا تفكري في الأمر ... لكن ايدا ماعندو مايميزو سوى انو خطبك فلا يبدو مناسبا لك
ربي يرزقك احسن منو ويعوضك
والله اعلى وأعلم