نخليلها ولدها وخلاص

[مشكلتي]

السلام عليكم
مشكلتي هي ان طاقة صبري احس انها ستنفذ وان كظمي لغيضي مازاله شويا ويخلص

ام زوجي لا تعاملني مثل بنتها رغم انني عاملتها مليح كي دخلت عروسة هدايا اطراء نعاونها عزومات حتى اني كنت عروسة جديدة كي نخرج انا وراجلي نديها معانا
امي اللي ولدتني معطيتهاش هدايا قد اللي عطيتهم لامه حتى وليت نقول نستاهل مخلية امي اللي ولدتني ورباتني منبعثلهاش هدايا ونمدهم لام زوجي نستاهل خاطر وليت نفضلها على اللي افضالها متتعدش امي الحبيبة

مش حابة نرويلكم وش دارت واللي دارته مش قليل راه كذب وفتن وحفر مش حكاية سمعتني زوج كلمات كيما النسا يشكيو

المهم هاد الشي كامل نجاني منه ربي وثانيا مانيش ساكنة معااها كون جيت معاها رح توقعني في الفخ عاجلا ام اجلا
راني في العامين متحملة هاد الشي وكاتمة في قلبي وساكتة زوجي لا يعلم بشيء بصح علابالي كاين مجموعة اكاذيب فاقلها بيهم وسكت بعد جدتي توفاة في عرفة مجاتش تعزي ولو بالهاتف اسيدي الله يسهل رحت نعيد لدار شيخي وش لقيت قريب تضربني تهدر معايا باسلوب مخيف غير وصلني راجلي وخرج وبقيت معاها تحولت لوحش قاتلي علاش مجيتيش اول عيد ؟ واحنا من عرفة لاول عيد جنازة وراها جاني الوالد جابلي قسمتي من العيد ؟ المهم سكت قاتلي واش راكي قتلها مريضة مناكل في والو وانا كنت في الوحم وكان يغمى عليا بدات تعيط عليا وتقولي مش انت اللي مريضة انا اللي مريضة وقعدت وحدي في العيد ونخدم في داري ....................وتعيط وترفع في صوتها ويديها علاتهم انا قلت رح تضربني كي نتفكر قلبي يوجعني
وراها واش قاتلي بعد ما بقيت مندهشة وخايفة منها خصوصا اني بالحمل تصور في راسي رح طيحلي الصغير علاش ديرلي هكدا ؟جبدتلي على الوالدة وبدات تعاير فينا باصول جدتي الشاوية ؟ هنا حسيت دماغي رح ينفجر من سكاتي وصلت تجبدلي على امي وجدتي الله يرحمها ؟

وتقولي الاصل يجبد وهدرت على المنطقة تاع جدتي والعرق جباد وغيرها رغم انها هي في حد ذاتها من منطقة يضرب بها المثل يعني كاين مثل شعبي خصيصا لمنطقتها معروف في ولايتي
سكت على الاهانة ووكلت ربي كي جا راجلي تبدل وجها رجعت ملاك وراها في جنازة اخرى لعائلتي جات ولمحت لامي بذلك يعني ولات تهين في امي وجها لوجه

هنا قررت مقاطعتها ولا اريد اي شيء يجمعني بيها متزيد تشوف وجهي غير في الجنايز طفح الكيل واش حاسبين روحهم تبعت نصائح المندى واش زادتني غير مذلة فوق مذلة توصلني في امي وجدتي الله لا يسمحلها حسبي الله ونعم الوكيل

لجد الساعة راجلي معلابالوش بصح انا ضقت ذرعا مرضتني ؟ نحاول نكالمي روحي خاطر في عايلتنا وراثة مرض السكري علاش يا ربي ساعات نقول نرجعلها وليدها تديه تخليني نعيش حياتي تقولولي عجوزة كبيرة لا ماهيش كبيرة راهي في الخمسينات ونزيدكم تلبس العدسات اللاصقة يعني كون جاتني كبيرة قد جداتي رح نغفل عليها نقول خرفت بصح هاذي راهي بصحة جيدة احسن مني انا

[اياد حياتي]

تخليلها ولدها وعلاه ولدها نقطع عليها وحتى تخليه وعلاه ما راحش تزوجو بواحدة اخرى كبري بالك وحمدي ربي الي مراكيش ساكنة معها وزيد راجلك معاك حاولي قدر المستطاع انك تجنبيها وخلي زيارتك قليلة الا في مناسبات لانو هذا النوع ما ينفع معاه غير هكذا واش نقول لاختي غير ربي معاك ويبعد بلاها عليك ما علاباليش علاه يحبو يزوجو ولادهم ومبعد يعذبو بنات ناس هذه تمشي زوج وجوه والله انا منك تعاود ديرلك هكذا غير سجليها في بورتابل وخلي راجلك يسمع الله يصلح الاحوال

[لامْية]

اختي ران حاسة ومقدرة آلامك وش نقولك اخيتي ربي معاك حنونة غضتيني بزاف سورتو وانت حامل ننصحك متتقلقيش في وجه البيبي تاعك حافظي عليه حتا يجي لدنيا وتفرحي بيه وينسيك الهمومك تاعك وعجوزتك انشاله رب يهديها ويعطيلها العقل

[قناعتي سعادتي]

يابنتي رانا كامل في هذه الدوامة يعني رانا فالهوا سوا

وكون نحكيلك واش راني عايشة تحمدي ربي

المشكل نتاع عجوزتي انها دير الفرق بزاف بين ولادها ولدها لكبير تموت عليه والصغير تاني اما راجلي تعاملو كيما ربيبها والله كيما راني نحكيلك

وصل بيهم الحد انهم حابين ينحونا الدار باه يمدوها للصغير لاسباب بزاف ...... مانيش قادرة نحكيها ضرك .وهي الرأس المدبر في هذه لحكاية

انا نهار اللي شفت راجلي بكى من والديه وكيفاه يعاملو فيه قررت بلي عمري مانسمح فيه على خاطر ماشفتش اطيب من قلبو . يحبني بزااااف ومنقدرش نسمح فيه

كاين اللي راح يقوليا مهما كان والديه بصح والله كون تشوفو كيفه يعاملوه وكيفاه يفرقو في التعامل بين ولادهم نتوما نعطوني الحق

انا تاني راني بداري وحدي بصح ملي نروح نزورهم نروح نبكي منهم ديما تلوحلي كلمات قدام نسا سلافي

نسا سلافي كامل تموت عليهم على خاطر هوما بنات خاوتها غير انا اللي برانيا فيهم وزيد من فوق انا مانفهمش الشاوية وهوما كامل شاويا

نكونو قاعدين كامل حتى تلقايها هدرت حاجة بالشاوية انا من بكري مافهمتش بصح كي ندور ليهم نلقاهم كامل يضحكو ويشوفو معايا

يعني باينا كانت تهدر عليا والله مانلقا لا نضحك ولا نبكي بصح واش راحا ندير نوكل ربي عليهم وعليا واللي ظلم هو اللي يسلك

ونزيدلك هادي نهار سمعت بلي راني بالحمل دارت حالا ..تقول هي اللي راح تربيه

انا حابة لولاد وزيد هذا الثاني نتاعي برك وواحد مادخلو فيا نحب حتى نولد 100

المهم خليك من مشاكلي نرجعو عندك

الخاسر الوحيد في هاذي لحكاية هي نتي مالا احكمي راجلك ودارك ولاكان على زيارتهم ماتزيديش تروحي عندهم

ماهوش حرام على خاطر ماهمش من صلة الرحم نتاعك بصح راجلك انتي انصحيه باه يزورها هكدا يعرف شكون لمليح وشكون لقبيح

وماكان لاه تفتيو وتقولو بلي حرام كون ماتزورهمش على خاطر راني سقسيت مليح وفاهما واش راني نهدر

[Nada Sweet]

يأختي علاه معمرة راسك بيها ؟
كاين مثل يقول لي يحبني ما بنالي قصر ولي كرهني ما حفرلي قبر
الحمد لله انت دارك وحدك ..ما طلعيهاش كامل في راسك انسايها ولوحيها في الثقيل والله ماتستهل تقلقي روحك على جالها ..انت كل ما تزيدي تحطي معها وتقلقي روحك كل ما هي تزيد ...اقتليها بالبارد والله عن تجربة..ادا رحتي ليها و سباتك ابتسمي في وجهها وخليها هي تغلي مش انت ههههه لازم تبينيلها انك قوية ومستحيل اي هدزة تهزك ..هاك زحدها تكره وماتزيدش تلوحلك الهدرة..وحتى اذا لاحتلك ...تدخل من تخرج من
انت كي تجي الواجبة تع لازم ديريها غي في خاطر راجلك ولانك بنت فاميليا
والا انسايها كيما قتلك وخمي غي في سعادتك وسعادة راجلك ووليداتك ربي يخليهوملك وربي يقومك بالسلامة

[غزلانْ]

لك مسكنك الخاص فلما كل هذا
لا عليك حاولي التقليل
من زياراتها لحين هدوءها
الله يهديها و يهديك
و يطيب بيناتكم

[om_nour]

اللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ فِي الأَوَّلِينَ وَالآخِرِينَ.. وَفِي الْمَلأِ الأَعْلَى إِلَى يَوْمِ الدِّينِ..

اللهم رْزُقنَا شَفاعَتَهُ.. وَأَوْرِدنَا حَوْضَهُ.. وَاسْقِنَا بِيَدِهِ الشَّريِفَةِ الطَّاهِرَةِ شَربَةً هَنِيئَةً مَرِيئَةً لاَ نَظْمَأُ بَعْدَها أَبَداً.

اللَّهُمَّ اجْعَلْ قُبُورَنا بَعْدَ فِرَاقِ الدُّنْيا خَيْرَ مَنَازِلِنا، وَافْسِحْ فِيهَا ضِيقَ مَلاَحِدِنا، وَارْحَمْ فِي مَوْقِفِ العَرْضِ عَلَيْكَ ذُلَّ مَقَامِنا

، وَثَبِّتْ عَلَى الصِّرَاطِ أَقْدَامَنا، وَنَجِّنا مِنْ كُرَبِ يَوْمِ القِيَامَةِ.

اللَّهُمَّ بَيِّضْ وُجُوهَنا إِذَا اسْوَدَّتْ وُجُوهُ العُصَاةِ يَوْمَ القِيَامَةِ، بِرَحْمَتِكَ يا أَرْحَمَ الرَّاحِمِينَ.

[نورسين.داية]

السلام عليكم

عزيزتي لاحظي أن كل مشاكلك تأتي من قالتلك ثم قالتلك ثم قالتلك يعني المشكلة كلها مبنية على كلام عايراتك ككدبت عليك


شوفي أختي العلاقات الإجتماعية الشيئ الإيجابي فيها أنك متى أردت أن تغلق بابها لك الحرية في دلك صح أنتي أنهي هده العلاقة ياخي ماشديتيش عليها ولدها .....الله يهنيها ...................أنتي ماهو الشيئ الدي يجبركي على التواصل معها ماذام ماتسكنيش معاها ............ولدها يروحلها و السلام ..................


مليحة هادي يعني أنسان يستغل مركزو العائلي و يكون شغله الشاغل أدية الغير سبحان الله اللهم عافينا و إحفظنا يارب

[ManouraHilwa]

هي باختصار بعد التشخيص راهي غايرة والباقي عليك تجنبيها

[AMINA.Z]

اخطيك ...تبقاي ديما برانية و عمرهم و لا راح يحسبوك كيما بنتهم .. هاذي قاعدة.
خليها تهدر و الا تقعد ...احمدي ربي و زيدي كي راكي بدارك وحدك.
ربي يفرج عليك

[KING STAR]

اختي هذا المشكل تعانيه الكثير من النساء لكن ما دمت تعيشين في بيت منفرد بعيد عنها راه شافلك ربي أصيبري وحاولي تتفادي الزيارات الكثيرة بالزيادة انت قلت ان زوجك يشعر بوجود بعض الفتن وقد تفاد فتح مواضيبعها حسب ما وضحت لذا اظن انه يعلم بالمشكل لكن الأمر صعب لا تنسي انها أمه وربي يفرج كربك

[loulou88]

السلام عليكم
انصحكي اختي بتقليل زيارتك لها الا في المناسبات
واستغرب فعلتها هذه من غير سبب ولا مقدمات الله يهدي امهاتنا يا رب
ربي يعدل الاحوال
انصحكي بالدعاء علها تحن عليكي
تبقى والدة زوجك
موفقة

[oummed]

السلام عليكم ياختي ماتقلقي روحك ماوالوا رنا كامل نعانو من نفس المشكل حاجة لولة هي انك عايشة وحدك يعني راكي متهنية من شي حويج ياسر نزدلك حجة وحدوخرة هي انك بالحمل يعني اتهلاي في روحك مليح على خاطر مينفعك حتى واحد تنفعك غير صحيحتك وربي يهدي ماخلق

[oumhana]

ختي ربي معاك ربي معاك ربي معاك مزيه راكي بعيده مدريهاش في راسك ومتكثريش روح و رواح يعني غير للي لازمه و عزي رجلك كما نقولو، والمهم المهم متسمعيش لقالت و قالت لي جي يوصلك حبسيه عند حدو .فهمتك بلي جرحاتك عيناني بصح نوصيك فاللي جبلك لكلام.وزيد وكلي ربي وشوفي .
نحكيلك شويه باه تعرفي بلي مركيش وحدك. أنا يا ختي لوكان وجعتني يماه معليش قال يماه. أنا ختووبنات خواتو دايرينها موريا عجب متمنيش. راني صابره ووليت منمشي حتى لواحد إلا جنازه ولا عرس كيفي كيف ا لبرانيه.ولي يجيني نقلو مرحبا تاكل تشرب ترقد بصح متجبدليش مشاكلهم والحمد لله ربحت صحتي وعقلي وزوجي.
ونوصيك هذي تاع نخليلها ولدهاأنسايها فاصيها أمحيها متزيديش تخممي فيها.

[زياني العمري]

لازمك تفتخري باصول جداتك الشاوية الشازية الرجالة