الحلويات الي قدمناها في قهوة عميرتي سيرين

lahna moka · 2015-10-21, 14:37

مرحبا غالياتي
رايحة نحط صور الحلويات الي درتها في القهوة تاع بنوتتي الغالية سيرين, كاين الي درتهم من قبل و كاين المشرية
الصور خذيتها قبل ما يجو الضياف يعني كي كنا نوجدو و للأسف ماكانش الي لها باش يصورلي

في الأول حطينا التمر و التين مع أذمّين , ما نعرف كيفاه تسموه المهم يشبه شوية للروينة بصح ماشي هي, هو خليط من طحين القمح و الحمص المحمصين و يطحنوه في المطحنة التقليدية و يديرولو شوية ملح و زيت الزيتون

هاذا هو أذمّين

و بعدها حطينا لاتاي مع الطمينة و المقروط
هاذ الصورة خذيتها قبل ما يجو الضيافباش تشوفو برك

ها هوما الطمامن

و مع القهوة قدمنا هاذ الحلويات

و درنا تاني المشوشة و نسيت باش نصوّر المنفوخ و هو بيض رولي مع العسل الحر ممممم

و كل واحد من الضياف يبغي يروح نعطولو بيبرون تاع ليدراجي و علبة طمينة

هاذا هو الاحتفال البسيط الي درتو فال لعمري و نور عيني سيرين ربي يجعلها من الصالحات الحافظات لكتاب الله يا رب
ربي يرزق كل محرومة و لا يحرم وحدة من نعمة الأمومة و لعقوبة يا رب لكل الحوامل الي مازالو ربي يسلكهم و يسمعنا عليهم أخبار حلوة و يفرحو بضناهم يا رب
حبيت نشكر كل وحدة دعاتلي في ظهر الغيب , ربي يعطيكم ما تتمناو يا أغلى غاليات على قلبي
مواااااااااااااااااااااح لكل وحدة فيكم

raboha · 2015-10-21, 14:54

يسعدني نكون الأولى
اولا ألف ألف مبروك و تتربى في عز والديها و العايلتين للزوج
اللهمّ أنبتها نباتاً حسناً، واجعلها قرّة عينٍ لوالديها واحفظها، وبارك لنا فيها واجعلها من أهل الصّلاح والتّقوى.
و ربي يطيك صحيحتك
كلشي رووووووعة و اللي قتلتني الطمينة نموت عليها بصح تاع النافسات برك تجي فيها وحد البنة هبال
حتى و نديرها خطرات و الله متكون فيها البنة
نتوما و كل منطقة دايرين حاجة مليحة ديرو نهار تلموهم قاع و ديرو قهوة
حنا كل يوم و ال كل يومين كل أسبوع تجينا دفعة و الله منريحو
ألف ألف ألف مبروك و دعيلي نزيد أخ على خياتو يا رب

lahna moka · 2015-10-21, 15:17

ربوحة حبيبتي تسلميلي على الكلام الراااائع و الدعوات الراااائعة, ربي يرزقك بولد تقر بيه عينك و يكون سند لأخواتو يا رب, صح حنا الحاجة المليحة عندنا هي العرضة يعني نعرضو خطرة على القهوة و يجو كااااامل في نهار واحد هاكذا نتهنّو الاّ الي عندو انشغال ذاك النهار يفوتو يامات و يجي,
بشرى ربي يحفظك حبيبتي
فديلة تسلميلي أختي الغالية
أم رويدة تعيشي يا الغالية و الطمينة كلها ليك يا حلوة
أم رشدي بارك الله فيك حبيبتي و لعقوبة ما تشوفي ولادك في اعلى المراتب يا رب
أم خيرو شكرااااااااااااااااا اختي
أم فاطيمة غاليتي بارك الله فيك على الدعوات الرااااائعة
أم ألاء يبارك فيك و ربي يحفظك الصغيرونة حبوبتي

بشـرى · 2015-10-21, 14:54

الله يبارك ماشاء الله كلش يهبببل ويسخف
ربي يخليلك بنوتتك ان شاء الله تتربى في عزكم يارب

ام رويدة · 2015-10-21, 15:05

الف الف مبروك لهووونة الغالية
تتربى في عزكم ان شاء الله
وجعلها الله من الصالحات ....امين

وكلش راءع وهديك الطمينة ماخلات فيا والو
يعطيكم الصحة

fadila34 · 2015-10-21, 15:02

الف الف مبروك تترب فى عزك وعز اولده ويخليها من عباده الصالحين يا رب
ما شاء الله كل شىء هايل ربي يشفيك ويقدرك على تربيتها

ام رشدى · 2015-10-21, 15:11

اختي لهنا موكا اللللف مبرووووك وتتربي في عزكم انشاء
ونقولك كل شي بالطبع وانشاء الله تحضرينا في حفل تخرجها وتكون دكتورة يارب ان شاء الله

ام خيرو · 2015-10-21, 15:12

لف الف مبروك تترب فى عزك

أم فاطيمة · 2015-10-21, 15:14

الف مبروك لهونة ان شاء الله تكبر على طاعة الله
و رسول الله

أم شيماءْ · 2015-10-21, 15:21

الف الف مبروك ياكشرودة وتتربى في غزك ودلالك يارب

um alaa · 2015-10-21, 15:14

الف مبرووووك لهونتي تتربى في عزكم ان شاء الله و تكون من البارات و التقيات يا رب

طالبة النجاحْ~ · 2015-10-21, 15:21

الف مبارك المزيود اختي لهنة
ربي يحفظها وينبتها نباتا حسن
وبالشفا ليك اختي
تقاليدكم روعة خاصة تاع التين والتمر والطمينة تاع الروينة اول مرة نعرفها ماشا الله
يعطيكم الصحة كلش متحوف ومتقون

أم ياسين الزهراء · 2015-10-21, 15:17

الحمد لله اللي سلكتي على خير ومبروك مازاد عندك وتربي بالصحة ولعقوبة لقهوة نجاحها كاليوم يارب

الطمينة هبلتني والبيبرو هايل

ام و ابنة · 2015-10-21, 15:22

ما شاء الله تبارك الله
كلش بالطبع و فور
الف الف مبروك
ربي يسترها و يحفظها و يجعلها من الصالحات البارات و يقر عيونكم بيها

جزائرية 16 · 2015-10-21, 15:25

مبارك عليك اختي لهنا البنتوتة سيرين و العرضة الله يبارك استمتعنا فعلا بصحتكم