أختي صح عيدك أنا الوصفة هاذي نعتمدها منذ 15 سنة علمتهالي جارتنا وأنا صغيرة ربي يعطيها الصحة
06بيضات تفصلي البياض وحدوا تطلعيه كي الثلج وتخليه على جيه أما الصفار تزيديلوا التالي بالترتيب وكل مرة راكي تخدمي وتزيدي بالحلجة 16مغرف ماكلة سكر عادي + 16مغرف حليب +12مغرف زيت+زاست حبة قارص(من أجل الطعم اذا لم يتوفر ماعليش)+15مغرف فرينة+02باكيات خميرة
الفرينة كي تجي تلوحيها غربليها والخميرة ديريها في الفرينة قبل ماتلوحيها وفي الأخير أضيفي البياض وحركي غير بشوية وماتكسريهش وديريها في الصينية المتوفرة حبيتي مدورة أو مربعة الأن أهم خطوة الطياب سر المسكوتة الهايلة هو طيابها الفور يكون سخون وماتحليش عليها أبدا طلي عليها من الزجاج كي تطيب من تحت حمريها من فوق غير بشوية ماشي تحرقيها
أختي التزيين على حساب المقدار ساعات ندير فوقها شيكولة ومكسرات مرحية وساعات ندير فيها كاكاو باش تجي قهوي وندهنها بالمعجون ونحي هادوك الحواشي الزايدين نرابيهم فوق المعجون وتجي باهية أنا من كنت في دارنا لازم ماتخلاصش على خاوتي والان زوجي أختي اذا عجباتك دعوة خير لأولادي بزايد وان شاء الله تعجبكم وتجربوها وتردولي الخبر هي صح فيها حساب تاع مغارف وخدمة بصح تجي خفيفة خاصة اذا خدمتي بالباتور ربي يعاونك