البسملة1
مساء الخير حبايبي 
هذي وصفة الفلان راهي مسروقة باش نتفاهمو من الاول 
هذا الفلان داراتو خالتي لاختي في السهرة كي راحت ضيفة عندها وكي ذاقتها وعجبتها سرقتلي الوصفة ( شافتها كيفاش داراتو ) يعني راني عندي عصابة لايستهان بها 
شوفو رايحة نحط الوصفات المسروقين اللي عندي كامل قبل رمضان ياجماعة راني حابة نتوب أتقيو ربي أنا نقول نتوب وأنتوما تقولو زيدي غير هذي 
المكونات :
- قوفريط كروستي لازم لازم هذا ماتصلحش بالقوفريط الرخيص نتاع ألفين
والنكهة لازم يا إما تكون فانيلا ( كيما دير خالتي ) أو ممكن تعاندو عليا انا درت كابوتشينو 
هايلة
- فلان فاني أو كاراميل ( ماتصلحش بفلان فراز او شكلاطة ) انا استعملت فلان نوارة كاراميل هذا
- نصف لتر حليب ( من الأفضل كونديا او حليب بقر او حليب لحظة وإذا ماكانش ديرو بحليب الشكاير عادي )
- كاراميل للتزيين
- أربع ملاعق معمرة مليح بودرة شانتيي
الطريقة :
- نحط في القاع نتاع كل كاس جوتابل شوية كاراميل ( انا استعملت كاراميل التزيين نتاع القارورات اللي يتباع )
- نفتت القوفريط في قاع كل كاس ندير حوالي حبة ونصف إلى زوج حبات المهم يكون القوفريط ثلث ارتفاع الكاس وقد ما تكثري قوفريط و يكون القوفريط مليح جي بنينة
- نحط الحليب مع الفلان في كاسرول ونطيب فلان عادي ونصبو وهو سخون على القوفريط في الكؤوس حتى نعمر ثلث ويبقى ثلث للشانتيي ، كي نصبو الفلان وهو سخون على القوفريط يطرى ويطفو من فوق الفلان ويطلق النكهة نتاعو
- نحط الكؤوس في الثلاجة حتان يبردو مليح ( انا حطيتهم في المجمد بردو مليح وبسرعة كنت مزروبة )
- في هذا الوقت نطلع الشانتيي مع شوية حليب يكون باااارد بزاف ومانكثرش الحليب لازم الكريمة تكون عاقدة مليح ونخليها في الثلاجة حتان يبرد الفلان مليح وكيما يبان في السهم أحمر حكمت اختي بالجرم المشهود تسرق راكو تشوفو اللي ماعندوش شاهد يموت كاذب
- خرجت الكؤوس من المجمد ومسحت الحواف من داخل بمنديل ورقي باش نحي هذيك الرطوبة وقطرات الماء على جدران الكاس الداخلية باش كي ندير الشونتيي ما تهبطش ) هذي تعلمتها من عند ام أنس ربي يخليها لينا 
- حطيت الشانتيي في كيس التزيين وزينت الكؤووس بالشانتيي وكثرو باش جي بنينة وباش يجيو الوردات باهيين كي جي ديري الوردة أعصري مليح في نفس المكان بلا ما طلعي يدك للفوق باش يجيو الوردات كبار شوية وعراض وباهيين
- زيني من فوق بكراميل التزيين وكثري ما تشحيش وزيدي ذرذري شوية قوفريط من فوق تكوني فتفتيه رقيق
انا مالقيتش القوفريط نتاعي خبيتو زعمة باش ماياكلوهوليش ماشفيتش وين حطيتو وإلى هذه الساعة راهو مازال مفقود اللي تلاقاتو تتصل بالحصة
وهذا الكاس درتو ليا دوبل شانتيي ودوبل كاراميل ,,,,,, مكراشة واش تحبو
وهذا مقطع شاقولي في طبقات البنة كي تذوقو الفلان تلقاوه ولى طعمو طعم الكابوتشينو مممممممممممممممممممممممم
أخيرا النصائح :
- تقدرو ديرو فلان فاني مع قوفريط فاني او فلان كاراميل مع قوفريط كابوتشينو كيما انا درت تبانلي خير 
- ديرو ثلث الكاس فلان وثلث قوفريط وثلث شانتيي باش جي بنينة
- هذه الكمية ديرلكم من خمسة حتى ستة كؤوس حسب حجم الكؤوس نتاعكم ,
حقة نسيت نقوللكم خليوها تبرد عدة ساعات مليح قبل التقديم باش جي بنينة
راهي وصفة سهلة وسريعة واقتصادية وتبرد القلب وتحمر الوجه قدام الضياف
بصحتكم مسبقا 
تحياتي ,,,,,,,,,,,,,,,,,,,,,, لهومة
( تقرير عن مشاركة سيئة )، و الموجودة أسفل كل مشاركة .
2014-05-31, 21:41
فلان بنكهة الكابوتشينو لسهرات رمضان
العرض المتطور
