مشاركتي في مسابقة كيكتي الاجمل

[ريتاج تيارتية]

بما انو او مرة نشارك في المسابقة نتمنى ماتكون اول مرة راني فرحانة وفي نفس الوقت متوترة انا بالنسبة لي تجربة وتحدي انا نموت على المغامرات سيرتو في الطبخ واليوم جبتلكم معايا كيكتي البسيطة اللي كنت متخيلتها تخرج روعة زعما الله غالب التوتر والستراس اثر عليا المهم معليش المهم المشاركة هذي الكيكة خدمتها من اجل الاطفال لانهم يحبو ه\ي الاشكال مي خرجت شوي مفزعة ههههههههههه كاين اللي غادي يخافو منها كيما بنت خالتي كي شافتها ولات تعيط ورقدت طوووووووول مانضتش للصباح ههههه

طولت في الكلام اللي بلافايدة راح نبدا اولا بالمقادير واللي هي

اولا بديت بعجينة السكر خدمتها ولي درت فيها

300غ سكر ناعم ومغربل+110 غلوكوز

نسخن الغلوكوز فوق النار كي يدوب نفرغه فوق السكر الناعم ونخلط شوي ومن بعد نعجنها مليح

اذا بغيتوها شوي جارية نزيدولها مفرف ونص شيكولا بيضا دايبة

ثاني شيء حضرت جنواز كبيرة شوي درت فيها :

8حبات بيض +200غ سكر

+300غ فرينة +قرصة ملح+1خميرة كيميائية+ولافاني

نبدا طريقة التحضير

خفقت البيض والسكر وقرصة تاع ملح خفقتهم مليح حتى يتضاعف حجم البيض

ومن بعد غربلت فوق الخليط الفرينة مع الخميرة ولافاني

وخلطت المكونات بالعقل حتى تدخلت الفرينة مليح ويتجانس الخليط

دهنت المول نتاعي وخلفتو ببابي كويسون وفرغت الخليط ودخلتو للفرن

وهنا بعد ماطبت خرجتها من الفرن بصح المشكلة كي خرجتها كانت منتفخة روعة غير خليتها ريحت شوةي هبطت ماعرفتش علاه غير شفتها هبطت هبطلي المورال خلاص

وخدمت جينواز اخرى بنصف عبر تاع الجينواز الاولى وحاولت نقصها شكل ورقة مكانش عندي مول تاع ورقة قصيتها غير بالموس شربتها بالشاربات ومن بعد طليتها بكرام شونتي وحليت العجينة تاع السكر اللي كنت لونتها بالاخضر وغطيت بيها الجينواز اللي كنت شكلتها ورقة

وخدمت جينواز صغير درت فيها 2حبات بيض +50غ سكر +75غ فرينة نحيت منها مغرف كبيرة وعوضتها بمغرف كبيرة تاع كاكاو ودرت نص باكي خميرة

طيبتها في مول دائري الشكل بعد ماكنت غلفتو بالمنيوم

قصيتها وطليتها كذللك بكرام شونتي وخلفتها بعجينة السكر اللي كنت لونتها بلون احمر

وشكلتها بالموس ووضعتلها نقاط سوداء اكيد بعجينة السكر واللي هي ثانيك ملونة بالبني الغامق

وخدمتلها الراس حتى اصبحت تقريبا مثل الكوكسينال وثبتها فوق الورقة

.

..

..

...

[ريتاج تيارتية]

ومن بعد رجعت للتارت الكبيرة ولي هي القاعة كنت حبة نقسمها ونحشيها بكرمة الزبدة اللي مخلطة مع صوص كرمال زعما كي هبطتلي هبطتلي المورال معاها قلتلها اقعدي هاك هههههههه

شربتها بالشربات وطليتها بكرام شونتي لانو كريمة الزبدة مانحبهاش بزاف في التارت سيرتو كي تكون مطلية قاع بيها تجي ثقيلة

ومن بعد درت من الفوق ديكوجال كراميل وثبت فوقها الورقة والكوكسينال

وزينتها تزين بسيط يلائم الاطفال الصغار ههههههههههه

خدمت فراشات بعجينة السكر وزينت بيهم الكيكة انا كنت حابة نديرهك شكلهم واقف زعما العجينة ماحبتش توقف الله غالب

وهنا كي قطعت الكيكة

نتمنى انشاء الله تعجبكم انا خصصتها للاطفال

سلااااااااااااااااااااااااااااااام

نتمنى التوفيق لكل المتسابقة والكيكة الاجمل هي اللي تستحق الفوز وكل المتسابقات انشاء الله فائزات

[OM AYA]

الله الله على التيارتيات وش راهم مدايرين بالتوفيق خلاصولي ايقونات الشكر كي يولوا نولي اوكي

[nounou120]

يعطيك الف صحة رائعة

[راجية غفران ربها]

Mmmmmmm kamli hanouna rana nastanaw

[أم يحي صهيب]

بالتفوفيق غالاتي
ربي معاكم

[رحيل ج]

ماشاء الله عليك موفقة حنونة

[zahra30]

ماشاء الله ويعطيك الصحة وبارك الله فيك على المجهود وبالتوفيق

[القبطية]

بالتفوفيق

ربي معاكم

[جوهر دعوة]

أورتونا رتوجة وأخيرا ظهرتي ههههه من الصباح وانا خايفة ما تجيش
كيكة رائعة والاروع انك اهديتيها للأطفال
اتمنالك كل التوفيق اختي

[ام ملاك.]

ماشاء الله هايلة
بالتوفيق

[ريتاج تيارتية]

شكراااااااااا حبيباتي فرحتوني بردودكن
نورتن موضوعي

[فريال88]

الله يبارك اختي بالتوفيق

[دائمة الحمد]

المفروض الاطفال الكل يصوتولك لانك خممتي فيهم
موفقة بادن الله

[basmala farah]

هايلة الله يبارك تسلميلي