حابة نشري باتور

[القسنطينية 84]

السلام عليكم راهو خسرلي الباطور تاعي بعد ما فورسيتو في تطلاع الميرانغ المهم صلح و الباطور البحر عليه راني حنشري اخر مي لي مارك بزاف و حرت و ما تهمنيش السومة المهم يكون مليح و يحمل الضغط تاعي لانو المنتدى مغرقنا بالوصفات و ما راحش يخلينا نركحو راني في سمانة بلا باتور و الوصفات راهي تتلم

[ام ملاك.]

ههههههههه
كاين واحد النوع والله مانكذب عليك الماركة نتاعو ماشفيتش عليها شراتو ماما يشبع للعجانة تقوليه عجانة بيتران وعو صفير يجي كحل بالفضي
سومته ثلثمية وتسعين العام اللي فات درك مانعرف وكاين زوج انواع واحد هفيف واحد ثقيل شوية اشري ثقيل خير
ربي يسهللك

[feuilleblanche17]

انا عندي philips هايل

[إلهام07]

شوفي أختي ، ما تهمش لامارك ، المهم هو أن الباتور اللي تشريه يكون أوريجينال ، يعني ممكن تشري seb أو brown أو moulinex أو philips المهم يكون الباتور اللي تشريه دوريجين .
روحي للمحلات الكبيرة اللي تبيع لوريجينال ، ماعليش يغليو عليك شوية بصح حاجة مضمونة .
وإذا حبيتي نصيحتي ، أنا عندي 2 باتور ولكن نستعمل البيتران لأن السرعة و القوة نتاعو أكبر و يوفر عليك الوقت والتعب.إذا عندك بيتران استعمليه ، النتيجة نتاعو أحسن( ندير بيه مايونيز وكيك وميرانق و كروكي يطلع البيض روعة و بسرعة و النتيجة نتاعو القاطو هشووش ) و خلي الباتور استعمليه غير كي تكون عندك كمية قليلة .
الباتور كي تكثري عليه راهو يفسد لأن المحرك نتاعو صغير يحب الاستحفاظ وانتي راكي ما شاء الله ناشطة.
أنا نصحتك وانتي حرة

[كريمة حجاج]

المشاركة الأصلية كتبت بواسطة إلهام07

شوفي أختي ، ما تهمش لامارك ، المهم هو أن الباتور اللي تشريه يكون أوريجينال ، يعني ممكن تشري seb أو brown أو moulinex أو philips المهم يكون الباتور اللي تشريه دوريجين .
روحي للمحلات الكبيرة اللي تبيع لوريجينال ، ماعليش يغليو عليك شوية بصح حاجة مضمونة .
وإذا حبيتي نصيحتي ، أنا عندي 2 باتور ولكن نستعمل البيتران لأن السرعة و القوة نتاعو أكبر و يوفر عليك الوقت والتعب.إذا عندك بيتران استعمليه ، النتيجة نتاعو أحسن( ندير بيه مايونيز وكيك وميرانق و كروكي يطلع البيض روعة و بسرعة و النتيجة نتاعو القاطو هشووش ) و خلي الباتور استعمليه غير كي تكون عندك كمية قليلة .
الباتور كي تكثري عليه راهو يفسد لأن المحرك نتاعو صغير يحب الاستحفاظ وانتي راكي ما شاء الله ناشطة.
أنا نصحتك وانتي حرة

يعطيك صحى اختي قولتي ليكونت راحا نقولو يعطيك الف عافية

[القسنطينية 84]

شكراااااااااا على الاهتمام و يا الهام والله راني سخفانة على بيترا و في بالي و عمبالي راهو مليح و يفيد بزاف لكن اامكانياتي الحالية ماتسمحش و انا عيني كبيرة حابة kenwood يديل كلش حاجة مليحة مرة واحدة راهو ربعة ملاين وكثر و انا منيش خدامة كشما ينوب ربي هههههههههههههه

[nounoutoto]

السلام عليكم انا و اختي عندنا في زوج philips ماشاء الله عليه بصح انا شريتو من المحل ب 3500دج وهي شرالها زوجها من سوق العلمة ب 3000دج

[إلهام07]

المشاركة الأصلية كتبت بواسطة القسنطينية 84

شكراااااااااا على الاهتمام و يا الهام والله راني سخفانة على بيترا و في بالي و عمبالي راهو مليح و يفيد بزاف لكن اامكانياتي الحالية ماتسمحش و انا عيني كبيرة حابة kenwood يديل كلش حاجة مليحة مرة واحدة راهو ربعة ملاين وكثر و انا منيش خدامة كشما ينوب ربي هههههههههههههه

صح ، عندك الحق راهي الدنيا غلات ، أنا ثاني عندي بيتران kenwood شريتو دوريجين هايل .
إن شاء الله ربي يرزقك وجيبي واحد انت ثاني والله راهو يعاون بزاف ويعلم الكسل هههه

[oum radja]

شوفي اختي أنا عندي seb باتور و ميكسور في نفس الوقت شريته 350 الف و راه عندي في شحال من عام

[نرجس44]

المشاركة الأصلية كتبت بواسطة oum radja

شوفي اختي أنا عندي seb باتور و ميكسور في نفس الوقت شريته 350 الف و راه عندي في شحال من عام

حتى انا عندي هذا
يعني جديد عندي قبله كنت نشري ماركات اخرين كلهم يتحرقو في اقل من عام

[أم ياسين الزهراء]

شوفي اختي ماكانش كيما البيترا كانود يدير كلش لاجينواز واووووووووووو الله يبارك الغربية واوووووووووو وزيد تحطيه يخدم وانت تشوفي حاجة اخرى بصح كيما قلتي كل واحد وضروفو المهم انا عندي فيليبس 15 سنة الله يبارك وماكانش كيما الماركات الكبار وديري مجهودك ولمي باش تشري البيترا والله غير ينحي عليك

[كوزينة هديل]

أختي أنا عندي philps هايل بصح لازم تشري ا vrais ماشي chinois راهو هايل أنا نخدم بيه وجاميكان عندي مشكل معاه

[أم ماجد]

ربي يرزقك عاجلا غير اجل بعجانة تنحي شدة ارواحي لسوق دبي الاثمان معقولة

[fouzia alger]

le batteur de marque SEB c'est le meilleur,les autres marques d'émitation il faut éviter de lés acheter

[نزهة الربيع]

كاين ماركة moulinex philips ملاح و كاين kenwood ماركة المانية روعة ادا شريتيه كامل راهو يدير ب 5 ملايين toutes option بالباتور و البتران و الروبو مناسب للكميات الكبيرة اي ادا استعملتي ابيض البيض من فوق 4 بيضات و روح و كاين kitchen aid مناسب للكميات الصغيرة و زيدي سقسي و شوفي و نشالله تشري ماركة مليحة