السلام عليكم و رحمة الله و بركاته اليوم قلت نستغل وقت
فراغي و نحطلكم درس نوضحلكم فيه
اول خطوه قبل التفصيل و الخياطه كيفيه اخذ القياسات
لأنو لوكان ما تاخذوش القياسات بطريقه صحيحه
ميش راح تتحصلو على نتائج مرضيه
نحتاج لورقه و قلم و شريط قياس و
اكيد اهم شيئ الطرف الثاني لي راحين ناخذو قياساتو
المرحله التاليه الشخص لي نقيسولو لازم يكون لابس حاجه
رقيقه و حافي باش يكونو قياساتنا مضبوطين
توجدي الورقه و القلم و تسجلي كل النتائج
تلاحظي منين يبدا رقم واحد في الشريط و منو تبداي تقيسي
حذاري تقلبيه على الانش
![](https://imagizer.imageshack.com/img537/2581/rL3fFi.jpg)
تاكدي يكون على السنتمتر
![](https://imagizer.imageshack.com/img901/2905/UrBjgt.jpg)
اول قياس ناخذوه هو
دوران الرقبه tour d'encolure
![](https://imagizer.imageshack.com/img910/8091/GaADb9.jpg)
محيط الصدر tour de poitrine
لازم الشريط يكون داير على اكبر منطقه في الصدر
و هنا ما تزيريش المتر بعدما تاخذي القياس ثبتي الشريط
عند الظهر و طرفي الشريط يكونو على ابرز منطه في الصدر باش تتحصلي
على قياس صحيح
![](https://imagizer.imageshack.com/img661/4330/9z8yEa.jpg)
ثاني قياس قياس محيط الخصر tour de taille
نفس الطريقه لكن هنا تكون اصغر منطقه في دوران البطن
![](https://imagizer.imageshack.com/img540/9888/2HRZ4h.jpg)
ثالث دوران معنا راح يكون محيط الحوض tour de bassin
و هو راح يكون في اكبر منطقه تحت الخصر دائما شريط
القياس مايكونش مشدودعلى الاقل فراغ صغير حق
ما يفوتو صباعك خلف الشريط
![](https://imagizer.imageshack.com/img912/2262/BVqnJZ.jpg)
ومالازمش نزيدو
من عندنا من اجل الفضفضه لأنو كاين تعديلات
واجبه من بعد نشوفو واش نزيدولهم و كيفاش
نقسموهم و نتعرفو على مواضعهم في الباترون
نكملو مهمتهنا لي هي اخذ القياسات
و نروحو لعرض الكتف من الامام la carrure
![](https://imagizer.imageshack.com/img538/2944/m7TPKr.jpg)
و هنا من الخلف رايح تكون اكبر بقليل بما انو الظهر
محدب نوعاً ما
![](https://imagizer.imageshack.com/img537/6673/JuJ7wA.jpg)
طول الكتف longueur d'epole
تحطي الشريط من اعلى نقطه في الكتف مكان التقاء
الرقبه بالكتف و نمدد الشريط الى زاوية الكتف مكان التقاء الكتف بالذراع
![](https://imagizer.imageshack.com/img673/7759/Rdn0DN.jpg)
ارتفاع الخصر من امام longueur buste devant
نبدا من اعلى الكتف نمرر على ابرز منطقه في الصدر و نكملو لوسط الخصر
![](https://imagizer.imageshack.com/img538/6467/IKP1HA.jpg)
نفس الشيئ من خلف longueur buste dos
من اعلى الكتف مرورا بالظهر الى وسط الخصر
![](https://imagizer.imageshack.com/img673/9817/5yRJ8w.jpg)
(اكيد هنا نحتاجو قياسات مضبوطه لذلك لازمنا نحددو قيس
الامام وحدو و الخلف وحدو لانو الامام يكون اكثر من الخلف مدام فيه الصدر)
من بعد ناخذ قيس المسافه بين الحلمتين écart des saillants
نحتاجو القيس هذا في تحديد مكان البانس فيما بعد
![](https://imagizer.imageshack.com/img912/6476/MnX7vw.jpg)
ارتفاع الصدر hauteur des saillants
يكون من الكتف الى ابرز نقطه في الصدر و هذا يحددلنا خط الصدر
ارتفاع الحوض hauteur de bassin
يكون من جنب يبدأ من الخصر الى اعلى ارتفاع في الحوض
هذا القياس هو لي يحددلنا خط الحوض في الباترون
![](https://imagizer.imageshack.com/img633/2448/cWHDRO.jpg)
عمق الرقبه profendeur d'encolure
هنا نحتاح لمسطره نضعها على حافة قاعدة الرقبه
و نقيس من اعلى الكتف الى حافة المسطره
![](https://imagizer.imageshack.com/img538/986/BEpsw1.jpg)
يبقى الطول الكلي من الكتف الى الاسفل longueur total
![](https://imagizer.imageshack.com/img661/8931/NlApb7.jpg)
هاذ القياسات نستعملها في رسم الباترون الاساسي و الكورساج
و كاين قياسات خاصه بالذراع و السروال ...الخ نتطرق لها لاحقاً
بعدما كملنا القياسات نعاود نتمعن في طريقه اخذها و نجرب مبدئيا
حتى نتحصلو على قياسات دقيقه و نهائيه
دمتم في رعاية الله و حفظه الى اللقاء
دعواتكم