ما حدث من ناصر الخليفي..

[AbuHossam]

الحقيقة ان تصرفات "ناصر الخليفي" مش غريبة عليا ، هي بس حلقة أكبر في سلسال ممتد من السذاجة الإدارية ، والسبب فيها هو هوسه الشديد بالتفوق على ريال مدريد لأنه عارف كويس إن دي آخر قلعة رياضية من الأندية الغير ممولة من ملاك مليارديرات قدرت تخرج من أزمة الكوڤيد 19 بدون أي تبعات اقتصادية تذكر

الأمر اللي مخلي ريال مدريد قادر على منافسة باريس سان جيرمان في الميركاتو بكل قوة ومخلي للريال كلمة ٤وية داخل أروقة اليويفا

واللي جنن جنون "الخليفي" أكتر هو مشروع السوبرليج اللي بيحاول من خلاله "فلورنتينو بيريز" يعيد موازين القوى الاقتصادية والشرائية بين الأندية الكبرى في أوروبا إلى حالة توازن وده يعرفك ليه برشلونة ويوڤنتوس كانوا دايسين في الموضوع بقوة خصوصاً انه هيعوضهم عن تبعات أزمة الكوڤيد ، وطبعاً مشروع زي ده عكس سياسة باريس سان جيرمان ورغبتهم في الفوز بقمة القوة القوى الاقتصادية لواحدهم

طبعاً مروراً بإن ريال مدريد أصبح على وشك خطف نجم الشباك في باريس سان جيرمان وهو الفرنسي "كيليان إمبابي" واللي تقريباً "الخليفي" جعل رئيس فرنسا يتدخل عشان يقنعه بالتجديد ناهيك عن الأرقام الفلكية اللي بيعرضوها عليه لأن خسارته مش هتكون سهلة أما خسارته لصالح ريال مدريد فهي كارثية بكل الأشكال

تخيل في وسط كل ده تبقى كمان مستني فريقك يطلع ريال مدريد من قلب السانتياجو برنابيو في محاولة لإضافة الانتصار ده لرصيد انتصاراتك في معركتك مع ريال مدريد ، بس يا أخي النية مش سالكة وهما 17 دقيقة بس و"بنزيما" كان عامل الريمونتادا التمام🤷🏻‍♂️ .. غالبا باريس سان جيرمان بقا غاوي ريمونتادات خصوصاً من فرق إسبانيا😅

الحقيقة لو هتكلم عن باريس سان جيرمان في عهد "الخليفي" هو فريق معاه فلوس كتير جدا لكن بدون أي مشروع يذكر ، تحركات الفريق في الميركاتو كلها تحركات عشوائية ساعية للاعبين أصحاب الأسماء الكبرى بس مش أكتر ، مش للاعبين محددين حسب خطة ودراسة لأن الفريق محتاجها مثلا

حتى "بوتشتينو" أكاد أجزم ان التعاقد معاه جاء لأنه مدرب كويس لكن مش لأن هو مناسب للفريق والمجموعة الحالية ولا لا ، تعاقد مبني على السيرة الذاتية وسمعة المدرب فقط لاغير ، أكتر من انه تعاقد مبني على الدراسة المستفيضة لأن "الخليفي" معين كلاون رياضي اسمه "ليوناردو"

تصرفات "الخليفي" بعد مباراة أمس هي تصرفات انسان بائس ويائس كان فاكر ان الواقع بيتغير بالاموال بس هنقول .. You Cannot Negotiate With The Tiger 🤷🏻‍♂️

صباحكم فل ♥️

تحليل: Mohamed Alaa