غراتان بطاطا حطة والبنة خياااااااااال على ضمانتي

[إلهام07]

البسملة1

صباح الخير حبيباتي

تكملة لمجموعة الوصفات اللي طلبتوها ووعدتكم بيها حبيت نحط هذي الوصفة بالذات قبل الوصفات الأخرى ، أولا ماقدرتش نأخرها من روعتها وبنتها وأكيد تحتاجوها في رمضان مع العرضات ، صدقوني ماشي غير تحمر الوجه برك ... ( ثانيا ) إذا عرضتي عجوزتك واللى سلافاتك وقدمتيها يروحو يغليو بالغيرة من طيابك وندبر عليك باش يغيرو مليح أعرضي معاهم رجالهم هكذا كي يذوقو هذا الطبق صدقيني كي يروحو يبقاو يعايرو فيهم بطيابك ..... خلي يموتو بالقلب .

شوفو أنساو أي وصفة غراتان بطاطا أخرى وركزولي في هذي الوصفة راهي أحسن غراتان بطاطا ذقتوه وعلى ضمانتي الشخصية ونتحدى أي وحدة جربو وماتهبلش على طعمو .... راني سميت هذي الوصفة صاروخ أرض-جو لاخاطر أنا راني زعمة مدايرة ريجيم ونخفف في الأكل وهذي راهي مستحيل تتقاوم مهما تكون عندك عزيمة هههههه

قبل مانبدى ماكلاه تقولولي مكلفة ، راني قلتلكم في العنوان راهو قراتان حطة نتاع ضياف الله الله يحمر الوجه ... راني صايمة ومانيش نرقد ونتعب في الخدمة غير ماتقلقونيش رمضان راهو غالبني .

بسم الله نبداو في المقادير :

- حبة بصل كبيرة مقطعة مكعبات صغاااااار
- حبة فلفل حلو مقطعة مكعبات صغار وممكن تزيدو حبة فلفل حار مقطعة مكعبات صغار اللي يحب الحار
- لحم مفروم ( حوالي كاس كبير يعني حوالي 350غ ) او مرقاز او خليط من الاثنين ( اختياري )
- ثوم مفروم ( كمية مليحة حوالي 4-5 فصوص )
- حوالي 1.5 كغ بطاطا منقية ومقطعة شرائح رفيعة
- توابل : ملح ، فلفل أسود ، كمون ، فلفل احمر ، ثوم بودرة
- جبن مبشور : شيدار او غرييار و جبن أحمر حسب الذوق
- القليل من جبن الكامومبير camembert

مقادير البيشاميل اللهلوبية :

- علبة كرام فراش
- علبة جبن طبيعي الحجم الكبير ( 120غ ) او علبتين الحجم الصغير (90غ )
- 2 ملاعق كبار فرينة معمرين مليح
- 2 ملاعق زبدة = اصبع زبدة
- التوابل : ملح وفلفل أسود فقط
- حوالي 2/3 لتر حليب = 3 كيسان كبار حليب تقريبا

التحضير :

1- نقي البطاطا ونقطعها شرائح رقيقة (بصح ماتكونش رقيقة بزاف كيما الشيبش ) باش جي بنينة لازم تكون رفيعة نوعا ما ونقليها بدون ما تتحمر هذا ضروري ، مثل مايظهر في الصورة ( البطاطا نقليها بدون ملح ):

2- نحط في المقلاة شوية زيت يسخن ( حوالي 4-5 ملاعق كبيرة زيت ) ونقلي البصل والفلفل حتى يبدأ يكتسب اللون الذهبي مثلما هو موضح في الصور :

3- نضيف الثوم واللحم المفروم او المرقاز ونقلي شوية ..... أنا طبقتها مرتين لهذا رايحين تلقاو صور مرات مرقاز ومرات لحم مفروم ما دوخوش :

4- نضيف التوابل : فلفل أسود وكمون وفلفل احمر وثوم بودرة ( باش نعطي للحم المفروم طعم المرقاز ) + الملح ومانكثرش الملح لأنو في هذي الوصفة كمية مهولة من الجبن .

5- الآن نبدأ نحضر البيشاميل على طريقتي صدقوني روعة وماشفت حتى واحد يدير كيفها لأنها ببساطة بيشاميل لهلوبية من أفكاري المجنونة ههههه
شفت بزاف مواضيع طلب مساعدة في البيشاميل وجاوني رسائل عليها قلت نصور الخطوات ونضرب عصفورين بحجر واحد

طريقة تحضير البيشاميل اللهلوبية :

-نحط الكاسرول على نار هادئة جدا جدا ( نحطها على الكانون الصغير ونقص خلاااااص للنار ) ونحط فيها الزبدة تذوب

- في نفس الوقت نحط الحليب نتاعي يسخن

- نضيف الفرينة ( تكون مغربلة طبعا ) ونحرك بالمضرب اليدوي لمدة ثواني فقط مانطولش بزاف وحنا نحرك ثم نضيف الحليب باش ماتتحرقش الفرينة ( لازم الخليط يكون مثل الصورة يعني لاهو يابس ولا هو جاري بزاف)

- نضيف حوالي كاس متوسط من الحليب الساخن ( مانحطش حليب بارد على خليط الفرينة والزبدة سخون باش الخليط مايكعبرش والبيشاميل نتاعنا تنجح )... نحرك بسرعة رايحين نتحصل على خليط يشبه العجينة الطرية

الصور شوية ماشي ملاح لاخاطر نخدم بيد ونصور بالاخرى ...... عذرا

- نضيف مرة أخرى كاس متوسط من الحليب الساخن ونحرك بسرعة .... نتحصل على خليط ثقيل مثل الصورة

- نبقى نضيف الحليب ونحرك حتى يغلي باش نزيد الحليب مرة أخرى ونشوف القوام لما يغلي إذا مليح نتوقف وإذا ثقيل بزاف نزيد الحليب غير بالشوية هنا

لازم الخليط المتحصل عليه يكون جاري شوية ماشي عاقد بزاف باش القراتان نتاعنا مايجيش ناشف فيما بعد بالعكس يبقى فيه صلصة طرية ورطوبة ماشي كيما القراتان العادي كي يطول ينشف

ماتشحوش في الحليب لازم كمية زاكية من البيشاميل باش يجي الطبق بنين وماش يناشف

- نضيف الآن الكرام فراش والجبن الطبيعي ونحرك حتى تغلي ونطفي رايح القوام يرجع أثقل شوية وكأنه كريمة ماشي بيشاميل وريحة الجبن الطبيعي تفحفح من البيشاميل تحفة وهذا هو السر اللي يخلي البيشاميل نتاعنا مميزة وفريدة وبنينة وكريمية وماتنشفش في الطياب

- نضيف القليل من الملح و رشة فلفل أسود ونخلط و لما تهز الغلية نطفي عليها

هذا هو قوام البيشاميل نتاعنا راااائع كأنها كريمة

6- التركيب :

- نصفف نصف كمية البطاطا في صينية الفرن ونرشها برشة خفيفة من الملح ويستحسن أن نستعمل صينية عميقة شوية وماتكونش كبيرة وواسعة بزاف باش الغراتان ماينشفش من الصوص في الفرن

- نحط طبقة من اللحم المفروم أو المرقاز ( نصف الكمية )

- نحط قطع من جبن الكامومبير ومانكثرش بزاف لانه مالح....... حتى اللي مايحبش الكامومبير في هذي الوصفة يعجبو ونصيحة استعملو جبن كامومبير كيما اللي في الصور فوق أو أي نوع مايكونش ريحتو قاوية

- نصب البيشاميل ( نصف الكمية أو أقل شوية من النصف باش نخلي كمية مليحة تكون من فوق وتغطي الوجه كامل نتاع القراتان )

- نحط كمية من الجبن المبشور ونحاول نحط الكمية الأكبر على الوجه باش يتحمر مليح من فوق

- نكمل بنفس الطريقة نحط طبقة بطاطا المتبقية ونرشها بالملح ثم اللحم المفروم والكامومبير ثم البيشاميل ثم الجبن المبشور وندخلها للفرن حتى يتحمر الوجه فقط ونخرجها

وهاهي واجدة خارجة من الفرن سخووووونة تغلي ومحمرة والله العظيم تشهي تشهي ومانحكيلكمش على الريحة اللي تهز الكوزينة كي تكون الطيب ممممم

قلتلكم طبقتها زوج مرات ومازالت الجماهير تطالب بالإعادة ههههههههههه

وهذي من داخل شوفو راهي ماجيش ناشفة والسر في البيشاميل نتاعنا :

شكون نسربيلو صحن ؟

وهذي المرة الثانية من بنتها نصور ونعاود

عن قرب للتعذيب الأجبان سايحة والطعم والريحة مممممممممم روعة والبيشاميل مانشفتش والأهم حتى كي تصبح وتعاودو تسخنوها تلقاوها ماشي ناشفة كيما العادة

والله البنة كيما تبان في الصور أو أكثر يم يم يم

وأخيرا مانقوللكمش جربوها ولكن نقوللكم إذا ماجربتوهش رايحة

مع تحياتي ............... لهومة

[samia28]

4444444444444444444444444444
hayla hayla haylaaaaaa
ya3tikkk saha tchahi

[oum yahya]

Mmmmmmmmmmmmmmmmmmmmmmmmmm

[ام طيري الجنة]

اممم يعطيك الصحة كنت رايحة اليوم نطبق الوصفة نتاعك نتاع بطاطا بلاكرام فراش و كي شفت هذي تلفتيهالي باش نبدا ؟؟؟؟؟؟؟؟؟
بارك الله فيك و في ميزان حسناتك و صح فطورك

[إلهام07]

الله يخليك أختي سامية ........شكرا على المرور

المشاركة الأصلية كتبت بواسطة ام طيري الجنة

اممم يعطيك الصحة كنت رايحة اليوم نطبق الوصفة نتاعك نتاع بطاطا بلاكرام فراش و كي شفت هذي تلفتيهالي باش نبدا ؟؟؟؟؟؟؟؟؟
بارك الله فيك و في ميزان حسناتك و صح فطورك

صراحة في زوج بنة وحدها وكل وحدها ذوقها مختلف مع انهم في زوج بطاطا بصح الصراحة هذي خير وحدها ذوق نتاعها خيال

[ام طيري الجنة]

المشاركة الأصلية كتبت بواسطة إلهام07

الله يخليك أختي سامية ........شكرا على المرور


صراحة في زوج بنة وحدها وكل وحدها ذوقها مختلف مع انهم في زوج بطاطا بصح الصراحة هذي خير وحدها ذوق نتاعها خيال

اذن غادي نبدا بهذي ان شاء الله لكن ماراهش عندي اللحم مرحي عندي صدر دجاج ممكن نرحيه و نستعمله في مكان اللحم مرحي و اش رأيك اختي

[idron0]

يعطيك الصحة 44444444

[حـــــــــــــــــوِيتَة]

[SIZE="6"]امممممممممممممممممممممممممممممممممممممم شريرة ما هذا يعطيك الصحة غيرتيني وانا اصلا نغير منك ويعجبني طيابك مي مازال ما ضقتوش هههههه

عندي شؤال واني خسمانة

شوفي انا حابة نجرب العجينة المورقة نتاعك مع انو لي نديرها انا مليحة بصح انتاعك املح المهم حابة نضاعف الكمية نتاعك قولي زبدة التوريق نقسمها ثاني على 3 مرات ونخدم كيما انتٍ
جاوبيني اختك ريتاج من الشلف
ورمضان كريم

[صفوة عايش]

تسلم الايادييييييييييييييييييييييييييي

[mayayasmine]

ربي يباركلك ويعطيك الصحة سيدتي على هذه التحفة

[ريتاج تيارتية]

اممممممممممممممم تهبل يعطيك الصحة لهلوبة واش نقولك الله يسلم دوك اليدين اطباقك رائعة وكلامك عسل موااااااااااااااااح
صح فطورك حبيبتي

[إلهام07]

أم طيري الجنة هي اكيد ثاني بالاسكالوب جي مليحة بصح الصح الصح باللحم الفمرفوم جي خيييييييير دبري راسك وشوفي واش يخرجك
اصلا سواء الوصفة نتاع بطاطا الكرام فراش او هذا الغراتان في زوج تحف والله مانحط وصفة غير لا تاكدت باللي راهي top


أخت HussienSND
نعم ديما تقسمي على 3 كمية الزبدة وشوفي ماشي شرط طبقي وصفتي المهم طبقي النصائح اللي في الموضوع باش تخرجلك كيما نتاعي
وشكرا بزاف على الكلمات الجميلة عزيزتي ومانيش شايفة حتى سبب باش تغيري اصلا باينة باللي حتى انت شاف أصلا يغيرو غير اللي قلوبهم حارين اما وحدة خايبة ما تتأثرش

[ام ايمان 11]

ياماشاء الله عليك يامبدعة هذا من كرمك علينا يارب يجعلها في ميزان حسناتك
غراتان رووووووووووووووووووووعة رووووووووووووووووعة و تسلم الايادي

[أنا هي]

ماشاء الله ماشاء الله

مثل ما تعودنا منك لهومة

ربي يسلم ايديك ويحرمها ع النار

[بنوتة الصحراء]

واش نقولك عيب عليك نشفتني لنا ريقنا بهدا الطبق الرائع
يعطيك الصحة