الورشه الثالثه عشر القفطان الازرق سطايفيه

stayfiya · 2013-11-28, 21:15

السلااام عليكم

كييييراكم لحباب علااابالي توحشتوني و توحشتو ورشاتي هههه

راني جبتلكم ورشه حلوة هي بالدات هي ساهله للي يركز معاها و

معايا بيانسور

الورشه قفطان مغربي انا رقدت و نضت جاني المودال

في راسي هو القفطان خيطتو لصاحبتي

شريتلو كتان قطيفة لهوا 2 متر

و لا دوبلير ساتان قومي 1.80

راني وريتولكم من قبل

شوفوه

و هاذاك القالون لزرق شريت 5متر و المارون 3 متر

و ليبوني و

قفايل تاع القفطان و لاستيك و فيزلين و

خيط باللونين و 30سم سيرسو نيلون

و قيطان نقفل بيه و كريستالات و وو برك

نبداو على بركة الله

و انتلاو اقراو مليح ربي يعيشكم اوكي

اولا حطي الكتان تاعك و طبقيه على 2 خاطر راحين نفصلو الامام وحدو والخلف وحدو

نرسمو الباترون على الكتان

و نفصلو الطرف تاع الظهر يجي مجمول

و الامام مفتوح

و

صاحبتي هاذي تحب تتكسل

قاتلي ديريلي

لاتخين مالا انا زدت في الطول الخلفي

هو نورمالمون لا تخين جي فيها لفصاله

من خلف انا مايكفينيش الكتان

مالا زدت هكذاك برك

و فصلت ليمونش درتهم صغار

و فصلت السجاف تاع الامام و الخلف

و منبعد درتلهم لافيزلين باش كي نخيط ما يتكسلش و جي خياطه زوينة و واقفه

خوذي رايي يا مخلوقه بصح ميش الفيزلين هاذيك لي تقولها حيط نووون نونونو

موايان برك

حديها مليح تلصق

و قطعي الزايد و انتلاااي كل ما تخيطي حاجه سرفليها و نحيها عليك

و كي تخيطي كل بياسه مع ختها وقبل ما تقلبي اكرونتي الكتان باش كي تقلبي ماجيكش الدورة مشبوحه و مشرشفه

داكوغ

هنا رانا جملنا الجزء العلوي خصونا لي مونش

كي نفصلوهم و نخلصو نحيو الواحد سم من جهة الامام كيما هكذا

و كي نلصقوهم في مكانهم ننقشو من جهة الكتف

و كي نقلبو جي هكذا لخياطة

بعدما نكفو لي مونش حبيت ندير فيهم نقشات على لي كوتي مالا استعملت لاستيك هكذا و خيطت بصح ما شبحتش بزاف

و السيرسو لي قلتلكم نسحقوه

جا وقتو رايحة نستعملو في حواشي

القفطان باش يجي واقف شوي

على الكرش علابالي كي تروحو

للعرس بلاطاي

غي تتغداو تطلقو رواحكم ههههه

و هذا هدفو

يمدلنا لافورم كيما في الكورساج

و كي ندخلوه في مكانو نخيطو مليح باش مايعاودش يخرج و يشيطنا

و ضك الخطوة التاليه

نركبو القالون ساير داير لايك ذيس

و في لي مونش نركبو الكريستالات لي قلتلكم عليهم

هاذو

ونركبو لقفايل لي قلتلكم عليهم تاع القفطان بهاذ الشكل هنا درت 3 بصح زدت 2 اخرين بيناتهم

و ربطت القفطان بهاذ الطريقه و خيط القيطان مشري

اصبروني نروبوزي شوي عييت

و نكمل

يتبع

اتوتالوغ

stayfiya · 2013-11-28, 21:16

عدنا و العود احمدو

نكملو مع بعضانا الجزء الدخلاني تاع القفطان

راه يبان مخلط بصح حلو عينيكم و وذنيكم مليييح

الصورة تاع هاذ الجزء مالقيتهاش

ماراحلناش

حنا نفصلو كيما روب سواري

تبدى من الصدر

حتى الاسفل وراح نخدمو

الصدر درابي بالنقشات

و لا تخين ثاني نديروها من اسفل

اول ما نفصلو نقطعو طرف الصدر و نعوضو

بقطعه راحين نفصلوها كيما الكورساج ولا لي بوني

و نحطو الباترون على لقماش

و نخليو 1 سم تاع لخياطة و نقطعو

هادو القطع لي رايحة تتحصلي عليهم

و تخيطيهم

و تركبي لي بوني تاوعك

بالمشينه

و تبلاسيها على زوليخة و تخدمي الدرابي نتاعك

تنبيه //

الطرف لي نخدمو بيه الدرابي نتاعنا لاااازم يكون

مائل يعني بالجهة المطاطيه ميش بطول او بعرض

القطعه بل بالجهه المائله داكووووغ

تبداي تخدمي لي بلي نتاوعك

كهذا بالتدريج

خلصنا النقشات

نثبتوهم بالخياطة

و هاذي هي النتيجة

و نوجدو لادوبلير نتاعنا تاع لي بوني

و نركبوها و نقطعو الزيادة و نكرونتيو

خاصة في الوسط

وسط الصدر

و نقلبو و نحدو ملييييح

و نبداو نوجدو الطرف التحتاني

نخدمو دي بانس تحت الصدر

و نلصق الصدر بالجزء السفلي و من بعد نجملوها مع الخلف

و نركبو لاستيك من خلف هكدا

و نكملو نديرو 4 طرق

و جا وقت القالون انا حبيت نغطي

بيه زوائد الخياطة تاع لي بلي و من اسفل عملت فونت

و ماتنسايش تسرفلي و تحدي مليييح

نروحو للبروتالات

ممكن طريقتي بالنسبه للبعض ممله و تافهه

بصح كاين لي مايعرفش يخدمهم

المهم

تفصلي زوج طراف بطول 32 سم هكذاك

و الكتان يكون مائل

تخيطي

و تجي تقلبي ديري مساك في الحاشيه عاودي دخليه في نفس الثقب

و احشريه و ومشي حتى يخرجلك على الكوتي لوخر

و تجبديه طوول و نفس الطريقة بالنسبه للاخر

تركبيهم و هاو ليك كيفاش جي

و هذا شكل القفطان النهائي

زوليخه جاها شوي ضيق ههههههه

ياو مولاتو رق من زوليخه ياه ههههه

و هاو كي لبساتو صاحبتي

و انتهيناااااا اااااه اطول ورشه

عياتني بصح ميش خساره فيكم

اي سؤال مارانيش في الخدمه

هههههههههه

ياو نقصر معاكم

السلام عليكم و رحمة الله و بركااااته

crono · 2013-11-28, 21:25

الله الله على لبرتي تعي:d دائما متالقة نشا الله ولي مافهمش من عندك عمرو ماراح يفهم .كلشي بالتفصيل والشرح.

sirina mouh · 2013-12-07, 16:11

vrement ya3tik saha.nakder nkoun sadika m3akom.rabi ydewemlek sahtek

أم بثينة19 · 2014-04-25, 14:25

دائما متميزة بأفكارك ربي يجزيك
القفطان أكثر من رائع

douda21 · 2013-11-28, 21:32

يعطيك الصحة يالفحلة الله الله عليك الله يبارك زين و همة في انتظار البقية يعطيك الصحة

أم ريحانة22 · 2013-12-04, 21:48

رائة جداااااا بارك الله فيك

bina · 2013-11-28, 22:12

وينو المودال كامل لافينيسيو

ليان نجمة البحر · 2013-11-28, 22:18

الله الله اختي لعزيزة ياااااا لوكان جيت من منطقتك حتى كي نشوفك برك نفرح

mystiq1 · 2013-11-28, 22:46

macha allah alik warcha a ta hauteur , inchallah ki tkmlih khalina nchoufouh

ام امـــــــنــــــة · 2013-11-28, 22:58

فحلة الله يبارك عليك ننتظر التتمة

ندى قدور · 2013-11-28, 23:09

خموس عليك يا الشاطرة كي نشوف اسمك نعرف باللي جديد كاين يعطيك الصحة ...........في انتظار باقي الورشة

lady31 · 2013-11-28, 23:28

وياااا سطافية راكي كما ام أكلثوم وحشتوني وحشتوني وحشتوني هاهاها واه توحشناك و خدمتي حاجة 444444بزاف الله يعطيك الصحة

أم رتاج سرين · 2013-11-29, 00:54

ماشاء الله االله يبارك راكي فووووووووووووووووووووووووووووررررررررررررررررررررر ررر
خياطه ونص وخمسه وعشرين يييييييياااااه لوكان جتيى قريبه والله مانطلقك

اميمة سعداوي · 2013-11-29, 01:20

لا اخيتى وحشتونى انتاع وردة الغالية الله يرحمها وانت سطايفية قاعده نقلب فى مواضيعك حتى نعست برك الله فيك اصباح نحمل هدا الموضوع وبربى نفصل واحد الله يثبت اجرك نحبك بزااااااااااااااااااااااااااااااااااااااف كم تقول بنتى