غريبية جديدة بالكاوكاو وقاناش الشكولا

[chez biba]

كيما وعدتكم أخواتي هاذي كيفية جديدة للغريبية بديكور جديد لكن كل وحدة تقدر تعتمد وصفتها الخاصة تاع لغريبية فقط تنقص السكر



مقادير لغريبية:
كيلة سمن
نصف كيلة سكر رطب
كيلة كاوكاو محمص ومرحي رقيق
مستخلص الفانيليا
فرينة حسب الحاجة
مقادير القاناش:
علبة شكولا
2 ملاعق أكل كريمة سائلة
2 ملاعق أكل كاوكاو غبرة
حبات فضية للتزيين

في إناء خلطي السمن مع السكر والفانيليا جيدا حتى تتحصلي على كريمة

أضيفي الكاوكاو واخلطي

ثم شيحي بالفرينة

حتى تتحصلي على عجينة طرية نوعا ما

خذي كرية من الحشو (انا وزنتها كل كرية 26غ) هكذا باش يكونو الحبات كامل متساويين، حطهيها في الطابع الخاص بعد ما تشريه بشوي فرينة باش ما تلصقش لعجينة

هكذا حتان تكملي كل الكمية

دخليها للفرن على درجة 180درجة لمدة 10 دقائق فقط
خليها تبرد جانبا وفي هاذ الأثناء نحضر وقاناش الشكولا Ganache au chocolat
ذوبي الشكولا على حمام مائي مبعد نحيها وضيفي لها الكريمة السائلة مع الخلط جيدا (انا استعملت الخلاط الكهربائي) كي تحكم شوي روحها ضيفي لها كمية الكاوكاو وحطيها في الكيس الحلواني Poche à douille وعمري وسط لغريبية وزيني بالحبات الفضية
قدميها في les caissettes



ملاحظة: يمكن تستعملي نوتيلا مع اضافة القليل من الحليب خطراش غبرة الكاوكاو تشيحها

هذا هو الطابع لي استعملتو

[omayoub2]

merciiiiiiiiiiiiiiii

[**افنان**]

ماشاء الله بارك الله فيك
منظرها يشهى

[omjoujou]

يعطيك الصحة يا لفحلة ربي يباركلك في هذوك اليدين

[rosadiamant]

يعطيك الصحة اختي

[دائمة الشكر]

اممم تشهي اختي بيبا بارك الله فيكي على الوصفة

[it's me]

روعة يعطيك ااصحة

[حياتي نبع امل]

ماشاء الله يعطيك الصحة

[ام و ابنة]

ما شاء الله تبارك الله زين وهمة
الله يعطيك الصحة و يجازيك خير

[أم محمد تاج]

رووووعة بيبا الحبيبة رووووعة وانا من عشاق الغريبية سلمت يداك
لك مني احلى تقيييييم

[ام خيرو]

ماشاء الله

[أم ياسين الزهراء]

روعة حبيبتي روعة والله يعطيك الصحة بصح انا عندي مشكل كينديل الشكل يطيحلي ادا عندك الحل قوليلي راهي في قلبي نجربها

رووووووووووووووووووووووووووووعة

[chez biba]

المشاركة الأصلية كتبت بواسطة أم ياسين الزهراء

روعة حبيبتي روعة والله يعطيك الصحة بصح انا عندي مشكل كينديل الشكل يطيحلي ادا عندك الحل قوليلي راهي في قلبي نجربها

رووووووووووووووووووووووووووووعة

الله يسلمك يا غالية، ممكن تخليها طرية بزاف هي لازم تكون متوسطة يعني حاكمة روحها لا طرية لا يابسة وكي تخدميها خليها ترتاح شوي حتى نصف ساعة وطيبيها
انا الشكل كيما درتو كيما قعد، والأخوات لي يلقاو مشكل مع العجينة كي تلصق في الطابع اخدمو بالورق الشفاف Papier film راهو يساعد بزاف لكن الخطوط ما يجيوش بانيين مليح...

[fadila34]

ما شاء الله توحفة ربي يبرك فيك ويعطيك الصحة
وممكن نعوض القناج بحجا اخر وشكرا

[chez biba]

المشاركة الأصلية كتبت بواسطة fadila34

ما شاء الله توحفة ربي يبرك فيك ويعطيك الصحة
وممكن نعوض القناج بحجا اخر وشكرا

الله يسلمك اختي فضيلة،ًراني كتبت في الملاحظة انك تقدري تستعملي نوتيلا ومع الذوق تاع الكاوكاو تجي هايلة
اما اذا حابة حاجة اخرى فهذي مسالة أذواق مثلا
مكسرات مرحية مع حلوة الترك والمعجون
لي مادلان لي يتباعو قتتيهم وضيفي شوي كاكاو وكاوكاو مرحي رقييييق ولمي بالمعجون شوي سائل
واستعملي نفس طريقتي في التزيين
ولا تقدري تحطي في الوسط معجون فقط وتزيني بمكسرات مرحية خشين
اذا كاش ما تفكرت نحط لك