قاطو الديناصور, اسم غريب ادخلو تشوفوه

[lilii7179]

انا متاكدة ان معظم اللي راحين يدخلو للموضوع علا جال كلمة ديناصور هههههههه

التسمية راجعة لمولاة الوصفة زميلتي في الخدمة ربي يحفظها, نهار مدتهالي قاتلي اولادي يسميوه قاطو الديناصور, و ولينا كامل فالخدمة هزينا الوصفة و سميناه قاطو الديناصور . انا شخصيا نديرو ديما فالعيد الكبير خاطر ساهل و ما يديليش الوقت.

باش ما نطولش عليكم هو عبارة عن قاطو يشبه لكعك النقاش في الشكل بصح مختلف شوية, اقتصادي, زاكي, ساهل و صدقوني يذوووووووب فالفم.

المقادير( هاذ الكمية تخرج 80 حبة متوسطة)

1 كغ فرينة

500 غ مارغرين طرية

100 غ سمن طري( انا استعملت مدينة)

لا فاني

2 مغارف كبار سكر احرش

½ كاس ماء زهر

الحشو

غرس منقي و مرحي

حفنة جلجلانية محمصة

للتزيين سكر قلاص

تسقيه ب ماء زهر و شوية مرغرين باش يجي طري

اللي تحب تحط قرفة فالغرس ممكن تحط قضية ذوق.

طريقة التحضير : خلطي الفرينة مع السكرو لا فاني و زيديلهم المارغرين و السمن و خلطي مليح حتان يدخلو فالفرينة.زيدي ماء زهر و كملي بلي بالماء حتان تولي عجينة طرية . السر باش يجي يذوب فافم ما لازمش تعجنوها . يعني تلميها برك . خليها ترتاح و من جهة اخرى اخدمي حرابش صغار نتاع الغرس ( ادهني يديك بالزيت باش تجيك ساهلة)

هزي العجينة, اخدمي كويرات سطحي كل كويرة في يدك و حطي الغرس . اغلقيها كيما لي شوسون و وقفيها و انقشيها من الجهتين. الصور توضح احسن. دخليهم للفور ما لازمش يحمارو يطيبو وردي . كي يخرجو سخونين غبريهم بسكر قلاص ( ما تنسايش بلي العجينة ما فيهاش سكر تقريبا يعني الحلاوة تعتمد على الغرس و السكر قلاص فقط)

و نخليكم مع الصور , هاذو يدين اختي ادعيولها ربي يفرج عليها

ما تنساونيش بتعليقاتكم و دعواتكم

[أم الحبايب 26]

يعطيك اصحا ليلي يبان يذوب فلفم ربي يفرج على ختك

[om_nour]

اللَّهُمَّ إِنّا نَسْأَلُكَ بِأَنـَّا نَشْهَدُ أَنـَّكَ أَنْتَ اللهُ لاَ إِلَهَ إِلاَّ أَنْتَ، الأَحَدُ الصَّمَدُ، الّذِي لَمْ يَلِدْ وَلَمْ يُولَدْ، وَلَمْ يَكُنْ لَهُ كُفُواً أَحَدٌ، أَنْ تَجْزِيَ آبَاءَنا وَأُمَّهَاتِنا عَنـَّا خَيْرَ الْجَزَاءِ.

. اللَّهُمَّ اجْزِهِمْ عَنـَّا خَيْرَ الْجَزَاءِ وَاغْفِرْ لَهُمْ وَارْحَمْهُمْ كَمَا رَبـُّونا صِغَاراً. اللَّهُمَّ مَنْ كَانَ مِنْهُمْ حَيّاً فَمَتِّعْهُ بِالصِّحَّةِ وَالعَافِيَةِ عَلَى طَاعَتِكْ، وَمَنْ كَانَ مِنْهُمْ فِي دَارِ الْحَقِّ فَتَوَلَّهُ بِرَحْمَتِكَ وَأَنْزِلْ عَلَيْهِ شَآبِيبَ رَحْمَتِكَ..

اللَّهُمَّ مَنْ كَانَ مِنْهُمْ مَرِيضاً فَشَافِهِ وَعَافِهِ يَا رَبَّ العَالَمِينَ، وَأَسْبِلْ عَلَيْهِ ثَوْبَ الصِّحَّةِ وَالعَافِيَةِ يا أَكْرَمَ الأَكْرَمِينَ.. اللَّهُمَّ اغْفِرْ لِوَالِدَيْنَا وَوَالِدَيْ وَالِدَيْنا.


اللَّهُمَّ اجْعَلْنَا بِهِمَا مِنَ البَارِّينَ الْمُشْفِقِينَ العَطُوفِينَ.. وَاجْعَلْنَا قُرَّةَ عَيْنٍ لَهُما فِي الدُّنْيا وَالآخِرَةِ.. وَارْزُقْنا بِـرَّ أَبْنائِنا وَبَناتِنا يَا أَرْحَمَ الرَّاحِمِينَ.

اللَّهُمَّ اجْعَلْ رِضَايَ فِي الدُّنْيا عِنْدَ مَوَاضِعِ أَقْدَارِكَ.

[0ibtissam]

يعطيك الصحة وجزاكي الله خير بزاف عجبني ان شاء الله نجربو

[طالبة النجاحْ~]

شكلو باهيييي يعطيك الصحة اختي
شكرا علي الوصفة

[ام هدول]

يعطيك الصحة الوصفة عجبتني اقتصادية وساهلة ربي يفرج على ختك وجميع المومنين

[radia25]

عندك حق انا داني الفضول نشوف هاد القاطو على جال اسمو
يعطيك الصحة على الوصفة

[نوال المتفائلة]

يعطيك الصحة بإذن الله نجربوه

[أم عبد الكريم]

يعطيك الصحة .......

[zinanihel]

ههههههههههههههههههه تسمية رائعة ويبان بنين يعطيك الصحة

[lilii7179]

نورتوني بمروركم الطيب,شكرااااااااااااااااا

[ماريا.م]

يعطيك الصحة ليلي ، باين يذوب في الفم
اسموووو يخلي الواحد يدخل بالسيف ههههه

[lilii7179]

المشاركة الأصلية كتبت بواسطة ماريا.م

يعطيك الصحة ليلي ، باين يذوب في الفم
اسموووو يخلي الواحد يدخل بالسيف ههههه

انا نهار طلبت الوصفة الذوق نتاعو اللي عجبني, خاطر نموت على قاطوات الغرس و على كعك النقاش و هذا جاني fondant و بنين, كي طلبت الوصفة و قاتلي زميلتي وسمو قاطو الديناصور حتى انا ضحكت .

[ام حمزة22]

السلام عليكم

يعطيك الصحة على المجهود اامبدول بارك الله فيك

القاطو يران بنين انا نحب الحلويات لي ما فيهاش بزاف السكر

ربي يحفضك ويخليك دلئما متالقة ويحفض اختك ويرزقها ويحققلها كل امانيها

[amina senouci]

يعطيك الصحة