عصير البرتقال المجمد

[إلهام07]

البسملة1

صباح الخير حبيباتي

شفت طلبات الوصفات اللي في موضوعي كواليس تلبازي خلعت ماقدرتش نرد يا خراشي دخت واش هذا كامل .... قلت ندير روحي ماشفتش خير مالا قلت مشوار الالف ميل يبدأ بخطوة نبدى نحط في الوصفات من اليوم وياربي .

ماكنتش حابة نحط وصفة العصير مع أنني معتمدتو أنا و وأسرتي منذ شهور لأنه توجد الكثير من وصفات العصائر في المنتدى ماشاء الله ولكن نزولا عند رغبة الكثيرات رايحة نحط وصفة العصير المجمد أو كما يطلق عليه تلقاوه اسمو العصير العجيب أو العصير السحري .
الفكرة في هذا العصير هي أنو لما نجمد الفاكهة ومن بعد نرجع نزيل التجميد ونعصرها رايحين نستخرجو منها أكبر كمية ممكنة من العصير لأنو كيما لاحظتو الخضر والفاكهة لما نجمدها ونرجع نخرجها من المجمد كي يزول التجميد تطلق الماء والعصارة نتاعها لذلك رايحين نستفادو من هذه الخاصية.

الفكرة بسيطة جدا جدا وتعطيكم عصير سهل ولذيذ وسريع يعني مانطيبو في كوكوط ماوالو تبعو معايا المقادير لواحد لتر من العصير :

المقادير :

* برتقالة واحدة كبيرة ( انا رجعت نعوضها بزوج برتقالات صغار باش نسهل عملية البرش )
* ليمونة واحدة ( يستحسن ليمون أصفر )
* 1 علبة ياوورت طعم الفراولة ( اختياري )
* سكر حسب الذوق ( انا نحط نص كاس سكر )
* 3 كؤوس متوسطة من الماء الساخن جدا لدرجة الغليان ( استعملت الكاس نتاع القازوز اللي في الصورة )

الطريقة :

* نغسل الليمونة والبرتقالة جيدا ونحطها في المجمد لعدة ساعات حتى تتجمد كليا ( حوالي 6 ساعات ، كل ماكان البرتقال أصغر يحتاج لمدة أقل ممكن 4 ساعات ). عادة منين نشري برتقال ويكون فيه حبات صغار نغسلهم ونحطهم مبارة في المجمد ومنين نحتاج نعمل عصير نجبد.

* كي نحب نعمل عصير نجبد البرتقال والليمون ونحطو في ماء بارد 2د فقط .

* نحط الماء نتاعي يغلي في كاسرول.

* في إناء عميق نبرش الليمونة والبرتقالة في الجهة الخشينة ( لما تكون البرتقالة كبيرة رايح تكون عملية البرش صعبة شوية لكن إذا البرتقال صغير يجيكم ساهل للبرش أنا اول مرة بانتلي عملية البرش صعبة ومن بعد تعودت خاصة كي رجعت نعمل برتقال صغير ولات جيني عادي وندير ديما ضعف الكمية ) .

* نضيف السكر .

* نضيف الماء الساخن ونحرك حتى يذوب السكر ( لازم الماء يكون يغلي يعني يعمل فقاقيع كبيرة لأنو البرتقال والليمون جامدين بمجرد مانحط الماء المغلي ونحرك نلقاه برد لذلك لازم الماء يكون سخون بزاف ويغلي ).

* نترك الخليط يرتاح لمدة نصف ساعة ( نصف ساعة كافية لا ضرورة باش تزيدو وقت ) حتى نستخرج كل عصارة الليمون والبرتقال . كي تذوقوه رايحين تتفاجؤو أنو رجع طعم عصير كأنو عصرتوه باليد ولكن الفرق أنو يعطيكم كمية أكبر لأنو لما نعصر حبة برتقال واحدة مستحيل تعطينا 1 لتر من العصير .

* نصفي العصير ونعصر مليح باش نستخرج كل العصارة.

* هنا خطوة اختيارية أنا أضفت علبة ياوورت طعم الفراولة ( أفضل النوع اللي في الصورة ) لأنو الياوورت يخثر العصير ويعطيلو ريحة ونكهة مليحة إضافة إلى أنو الياوورت حلو لما نضيفو في العصير يحليه وبالتالي لا نحتاج لكمية كبيرة من السكر.

* نخلط جيدا بالمضرب اليدوي ونذوق إذا محتاج سكر نزيد ( مانضيفش السكر من قبل حتى نضيف الياوورت لأنو هو يزيد يحلي العصير ).

* إذا محتاج العصير إضافة ماء ضيفو ماء بارد.

* نحط العصير في قارورة وإلى الثلاجة حتى يبرد لأنه دافي ومازال غير صالح للشرب .

* يقدم باردا بالصحة والهناء ....... عصير منعش ولذيذ .

* ملاحظة :
- هذا العصير مع انه يستخدم البرتقالة والليمونة كليا بالقشرة إلا انه مافيهش طعم المرورة .
- إذا استعملتو ليمون اخضر نبرش شوية من القشرة نحتفظ بيها في المجمد لأنو مرة ونكمل نبرش باقي الليمونة عادي ولازم هنا نضيفو الياوورت ومانستغناش عليه في الوصفة لانو رايح يخلصنا من مرورة الليمون نهائيا وراني ناكد عملت هذا العصير حوالي 10 مرات بالليمون الاخضر والأصفر ومايجيش مر نهائيا .
- إضافة الياوورت في العصير تخليكم تقتصدو في السكر + تخثر العصير وبالتالي يرجع زاكي
- ممكن تعملو كميات كبيرة و تنقصو في كمية الماء وتعملوه مركز وتحتفظو بيه في المجمد بماانو راهو موسم البرتقال والليمون وراهم رخاس.

أترككم مع الصور :

ممكن نعمل بنفس الطريقة عصير ليمون وحدو بدون برتقال ( انا كانت عندي ليمونة كبيييييييييييييييرة واعطاتني تقريبا واحد لتر عصير ممكن تعوضوها بزوج ليمونات متوسطين )
ممكن تعملوه بدون ياوورت :

أو مع ياوورت حسب الرغبة :

هااااااااه واش قلتو 1 لتر عصير طبيعي يكلفك حوالي 40-50دج وبنين وطازج ولا تشريه 100دج وكامل نكهات صناعية وملونات وعطور ؟





وااااااااااااااي خلصت الوصفة الأولى

هبلتوني على الوصفة لو كان ماجربوهاش ............

تحياتي .......................... لهومة

[zouzou42]

واو انا اول واحدة ترد عليك الهام 4444444444444444444444444 لعشي نديرو ان شاء الله
حبيت نسقسيك على حساب ما فهمت نبرش كل البرتقالة ماش القشرة فقط

[إلهام07]

المشاركة الأصلية كتبت بواسطة zouzou42

واو انا اول واحدة ترد عليك الهام 4444444444444444444444444 لعشي نديرو ان شاء الله
حبيت نسقسيك على حساب ما فهمت نبرش كل البرتقالة ماش القشرة فقط

نعم نبرش البرتقالة بالكامل والليمونة أيضا

[<نَجْمَاتْ>]

ربي يحفظك يا إلهام. وأكيد أكيد رايحة نجربو شكرا ياطيبة

[sarafouad]

wasafatek haaaaaaaaaaaaaaaaaaaaaaaaaaaaaaaayla daymen

[fleur de lili]

merci ilhem si tres gentille de ta part
ya3tik saha..tu merite le non du champion de cordon bleu et chef 5 etoiles

[إلهام07]

مشكورات على المرور

المشاركة الأصلية كتبت بواسطة oum lina

من فضللك اختى كمية السكر 2/3 يعنى 2 او 3 كوؤس

لالا 2/3 كاس يعني ثلثي الكاس يعني شوية أكثر من نصف الكاس

المشاركة الأصلية كتبت بواسطة fleur de lili

merci ilhem si tres gentille de ta part

المشاركة الأصلية كتبت بواسطة fleur de lili

ya3tik saha..tu merite le non du champion de cordon bleu et chef 5 etoiles

ربي يحفظك اختي .......... هذا من ذوقك راني مازالني نتعلم

[oum lina]

شكرا اختى الهام وصفة رائعة رايحة نجربوا انشاء الله

[oum lina]

من فضللك اختى كمية السكر 2/3 يعنى 2 او 3 كوؤس

[أم ياسين الزهراء]

اممممممممممممممممممم واممممممممممممممممممممم

[ام الياس04]

سلام يعطيك الصحة على العصير هايل.ممكن نخلي البرتقال و القارص مدة اطويلة في المجمد كي نحبو انحضرو العصير نجبدوهم ونبرشوهم

[tong2]

الله يعطيك الصحة حبيبة
روووووووووووووووعة

[دائمة الشكر]

شكرًا حبيبتي الهام يعطيك الصحة كنت حابة تحطي الوصفة وحطيتيها شكرًا شكرًا شكرًا

[إلهام07]

المشاركة الأصلية كتبت بواسطة ام الياس04

سلام يعطيك الصحة على العصير هايل.ممكن نخلي البرتقال و القارص مدة اطويلة في المجمد كي نحبو انحضرو العصير نجبدوهم ونبرشوهم

غذا كان هذا سؤال فالغجابة هي نعم في دارنا البرتقال مايتقطعش ديما كاين نشري يوم على يوم ومنين نشريو نحي الحبات الصغار على بالي حامضين نخبيهم وتقى مدة باش نجبدهم وعادي تخدمي بيهم عصير اي وقت تحبي

المشاركة الأصلية كتبت بواسطة tong2

الله يعطيك الصحة حبيبة

المشاركة الأصلية كتبت بواسطة tong2

روووووووووووووووعة

الله يسلمك أختي هذي مدة ماتلاقيتش ردودك غن شاء الله راكي لاباس

المشاركة الأصلية كتبت بواسطة دائمة الشكر

شكرًا حبيبتي الهام يعطيك الصحة كنت حابة تحطي الوصفة وحطيتيها شكرًا شكرًا شكرًا

ههههههههههههه فقت بيك حسيتك تحوسي عليها :d

[ام نوردين]

بارك الله فيك وشكرا على الوصفة وسامحينا على التعب الله يجازيك كل خير