موضوع مميز صور حلويات الفاكهة + طريقة طي المناديل

إلهام07 · 2014-10-01, 11:07

البسملة1

صباح الخير عليكم حبيباتي

طولت عليكم بطريقة طي المناديل والسبب أنني كي نحطلكم الطريقة في قسم الأشغال اليدوية ، كل الاخوات اللي في قسم الطبخ اللي طلبو الطريقة مايشوفوهاش خاصة وأنني من قبل حطيتلكم طريقة طي لمناديل بشكل الفراشة والاناناسة وأعتقد معظمكم اللي طلبتوها ماشفتوهاش
لذلك فكرت أن أحتال على القوانين ونحطها مع صور حلويات

قلت أكيد القرعاجات هذو يحبو يشوفو صور حلويات الفاكهة جبناهم من عند خالتي الله غالب جات بعيدة كنت حابة نروح عندها نتعلمهم

المهم ، أتفرجو وماتقولوليش حطي الطريقة مانعرفش
إن شاء الله كي جي مناسبة ونتلاقى معاها نقوللها تعلمني ونحطهملكم

هذو الصور :

نأتي الآن إلى تزيين مائدة العيد بهذو السارفيات راهم ساهلين ماهلين خلاص وأكيد الشكل جديد زينو بيها موائدكم في العيد وأبهرو ضيوفكم :

أولا وقبل مانبدى نحب ننبه أنو هذا النوع من السارفيات لازم تستعملو سارفيات هذوك اللي ماركة مليحة يعني ماشي الرخاس نتاع الباكي فيه 100 منديل ب60دج لالا لازم هذوك اللي يتباعو غاليين ونوعية مليحة الباكي يدير حوالي 110-130دج.
أيضا ومن الأحسن تستعملو سارفيات ماشي موردين لالا من الأحسن سارفيات اللي يجيو لون واحد uni . في الصور اللي تشوفو فيها المراحل استعملنا سارفيات موردين هذوك طبقناهم لعرس بنت عمتي وهي اللي أصرت على سارفيات موردين وراكو تشوفو الفرق لما طبقناهم لعرس بنت خال بابا جاو أحسن كي عادو لون موحد .

نبداو بسم الله :

لكل وردة نستعمل زوج سارفيات لازم يكونو لونين مختلفين باش جيكم باهية ويبان المودال
الصور توضح

نفتح السارفيات ونحطهم فوق بعضاهم ( ماتضحكوش أختي راهي راقدة في الفراش وطبق فيهم بردت )

شوفو كيفاش تحطوهم فوق بعض لازم الوجوه في زوج من برا والظهر لداخل راهي طبقتها فقط باش تبانلكم أنتوما ماطبقوهاش

ضرك نطبقهم على زوج كيما الصورة

تقصو الحاشية نتاع الجهة المغلوقة راهي حلتهالكم في الصورة بيدها باش تعرفو واش من جهة تقصو ( قصو حوالي 1 سم فقط )

الآن نبدى من الجهة الضيقة نطبق في السارفيات كيما الفونطاي

نحكمها من الوسط مثل الصورة ونربطها بهذاك الشريط اللي قصناه وحاولو تخدمو برفق باش ماتقطعوهش

نعقد 2 مرات

الآن من الجنب نبدى نفتح في هذوك الطبقات ولكن برفق لأنو تتقطع بسهولة

كيما على بالكم لي سارفيات هذوك الملاح فيهم 2 طبقات اللي جي من برا ملونة والدخلانية جي بيضاء ورهيفة ..... لاحظو أنو في الأول فتحناهم زوج زوج ثم نبدى نفتح في الطبقات الرقاق لازم نفتحها كامل ومليح باش جيكم مشرشفة وباهية

نزيد نفتح الجهة الثانية بنفس الطريقة

حاولت قدر الإمكان نكثر صور باش تفهمو

نوقفها على جبنها يولي هو القاعدة باش تفهمو هذي هي الصورة السابقة

الجهة التحتانية نفتحها مليح باش التشرشيف يطلع لفوق وتتكون عندنا قاعدة مبسطة ومن فوق نخليها .
هنا خلاص واجدة فقط اضغطو شوية عليها بالاصبع نتاعكم في الوسط باش تتعدل وخلاص

الآن نقص شوية من طول الأطراف باش مايبانوش وماتقصوهمش على الشح خليو شوية ماتبانش

هاهي خلاصت ساهلة ماهلة

شوفو هذو نتاع عرس بنت خال بابا :

هذو نتاع عرس وحدة قريبتنا أيضا

وهذو نتاع وحدة عروسة

كيما لاحظتو القاعدة نتاع السارفيات هو اللي كان الجنب نتاعها ممكن ماتفهموش وتبانلكم معقدة لكن حاولو مع الصور طبقوها ضرك تفهمو
السؤال الذي يطرح كثيرا : كي تحبو تسمي بيها كيفاش ديري ؟ فقط أستعمليها مباشرة بدون ماتفتحيها وأرميها وخلاص

من قبل حطيتلكم هذو الطرق للطي للأخوات اللي طلبوهم :

https://www.djelfa.info/vb/showthread.php?t=1345812

https://www.djelfa.info/vb/showthread.php?t=1438609

وهذا شكل الاوزة

كاين بزاف طرق لطي المناديل بصح أختي ماحبتش تسجل في المنتدى كل مرة انا اللي نكتب الموضوع و نحط الطريقة هرجتني .

ماتنساونيش بدعاوي الخير .....بعد غد راهو عرفة .

تحياتي لهومة

fadilasor · 2014-10-01, 11:09

وااااااو رائع يعطيك الصحة ياالهام

ام محمد و ملاك · 2014-10-01, 11:09

ما شاء الله فحلة و نص يعطيك الصحة و العافية انا من متتبعيك بارك الله فيك

*زهرة اللوتس* · 2014-10-01, 11:11

ربي يعطيك ما تتمناي و ربي يجازيك عنا كل خير

pharma-93 · 2014-10-01, 11:11

الله يبارك خمسه وخموس عليك لهومه صح كل صبع بصنعة اتحفينا دايمن بابداعاتك

ام دعاء2004 · 2014-10-27, 14:52

اقتباس:

المشاركة الأصلية كتبت بواسطة pharma-93

الله يبارك خمسه وخموس عليك لهومه صح كل صبع بصنعة اتحفينا دايمن بابداعاتك

الله يبارك ما شاء الله ربي يحفضك

omomnia15 · 2014-10-01, 11:30

الله يبارك في ذوك اليدين انت واختك ويعطيك واش راكي متمنية انت واختك

*عاشقة الجنة* · 2014-10-01, 11:33

يعطيك الصحة الهام عندي شحال وانا نستنى ف لي سارفيات ههههههههه

قوليلي هديك تاع الزمباية للتزيين فقط ولا تستعملي هدوك لي سارفيات
يعني تنحي بالوحدة و تستعمليهم ولا تزيين فقط؟؟؟؟؟؟؟؟؟؟؟

ام حمزة22 · 2014-10-01, 11:41

الله يبارك ما شاء الله ربي يحفضك ويخليلك اختك

حياتي نبع امل · 2014-10-01, 12:10

بارك الله فيك و يجازيك عنا كل خير

dalila setif · 2014-10-01, 12:31

بارك الله فيك ربي يعطيك ما تتمناي ربي يحفظلك والديك و يخليهم تاج راسك يا رب يا رب

إلهام07 · 2014-10-01, 12:27

مشكورات غالياتي ......... المهم تكونو استفدتو

عاشقة الجنة : هذيك الزمباية للاستعمال كي تخدميها وتكملي تعمريها من داخل بلي سارفيات وتحطيها في وسط الصينية اللي يحب يهز منها وحتا الزمباية نفسها هذوك لي سارفيات راهم محطوطين برك مركبين تركيب يعني يتنحاو بسهولة تستعملي منها حتى تخلاص القاعدة فقط لاصقة في بعضاها بخيط الباقي تستعملي منها عادي وكي تحبيها تبقالك منين تشوفيها من داخل فرغت زيدي عمريها هكذا ماتخلاصلكش

*عاشقة الجنة* · 2014-10-01, 18:36

اقتباس:

المشاركة الأصلية كتبت بواسطة إلهام07

مشكورات غالياتي ......... المهم تكونو استفدتو

عاشقة الجنة : هذيك الزمباية للاستعمال كي تخدميها وتكملي تعمريها من داخل بلي سارفيات وتحطيها في وسط الصينية اللي يحب يهز منها وحتا الزمباية نفسها هذوك لي سارفيات راهم محطوطين برك مركبين تركيب يعني يتنحاو بسهولة تستعملي منها حتى تخلاص القاعدة فقط لاصقة في بعضاها بخيط الباقي تستعملي منها عادي وكي تحبيها تبقالك منين تشوفيها من داخل فرغت زيدي عمريها هكذا ماتخلاصلكش

ربي يحفظك يا الغالية
جامي بخلتينا ولا خبيتي علينا وصفة ولا معلومة

ربي يفتح بيبان الخير في وجهك
و يسهل أمورك ويرزقك بالزوج الصالح

يا رب

tonia · 2014-10-01, 12:56

الله يبارك ما شاء الله ربي يحفضك

أم إناس · 2014-10-01, 13:19

ماشاء الله أشكال متحوفين ومتقونين
بصح قولي بقدها شرات الكيلو تاع المندرين. والقرص ههههههه
المناديل روووووووعه ولازملها صبر. يعطيكم الصحه يالفحلات