قراتان البطاطا و الدجاج + قراتان السلق بالكبدة

الواثقة بالله 23 · 2012-12-09, 19:42

السلام عليكم أحبتي في الله

رح نبدا بقراتان البطاطا بالدجاج و الصوص بيشاميل هاد القراتان شفتو في فيديو تاع حورية المطبخ في رمضان جربتو عجبني خلاااااص و عجب خاصة الأطفال تاع العائلة و من تم وليت ديما نطيبو لذلك ننصحكم بيه لأنو بنين و سهل التحضير و بمكونات بسيطة

نبدااااااااو

الخطوة الأولى بطاطا اقسميها طرونشات "دوائر " متوسطة الحجم ملحيها و حطيلها فلفل اكحل و حطيها تفور " حورية المطبخ مفورتهاش حطتها هكاك لكن كي طيبيها خير "
دجاج استعملي فخاد أو صدر كيما تحبي و ممكن سكالوب حطيه يطيب في الماء مع الملح و الفلفل أسود و ورقة رند و سنات ثوم يطيب نص طياب فقط ثم اقسميه مربعات متوسطة الحجم
اقسمي البصل جوانح مع شوية زبدة و شوية زيت و الثوم لي طاب مع الدجاج و خليهم يدبلو ثم زيديلهم المربعات تاع الدجاج
السوس بيشاميل : الوصفة تاع حورية المطبخ روعة وليت ديما نستعملها حتى كي نطيب لزانيا أو أي طبق لازملو سوس بيشاميل
حطي ملعقة و نصف كبيرة معمرة مليح زبدة طرية و معاها نفس الكمية فرينة و حركي ملييييييح حتى تصبح مثل العجينة زيديلها كمية تاع حليب ملح و فلفل أسود و لانواد ميسكاد "جوزة الطيب" انا مستعملتهاش قالك حرام والله اعلم ثوم مفروم و فرماج أبيض أو قرييار او روج او ايمونتال او خليط منهم كل و ابقاي حركي حتى تبدا تتقال و تصبح مثل الكرية طفي علاها و زيديلها قصة معدنوس مقسوم رقيق

المرحلة النهائية صبي شوية صوص بيشاميل في صحن الفرن فوقها دوائر البطاطا فوقها خليط الدجاج مع البصل أنا أضفت من عندي زيتون أخضر و زيتون أسود يعطيها طعم روعة ممكن الناس لي يحبو الفطر تاني يزيدوه ثم دوائر البطاطا و فرماج أبيض ثم صبي الصوص بيشاميل و فوقها ارحي شوية فرماج روج

دخليها تطيب من تحت ثم شعلي علاها من فوق انا زربت طفيت قبل ما يحمار الفرماج مصبرتش هههههههههه

القراتان الثاني هو تقريبا من الوصفات الأولى لي تعلمت نطيبها ههههههههه عندي سنواااااااات ملي شفتو في حصة طبخ تاع شميشة المغربية و ديما نطيبو لأنو بسيط و مغذي و لذيذ يعني ننصح بيه البنات لي قاعدين يتعلمو طياب و ننصح بيه كذلك الأمهات لانو مغذي و كذلك النوعية هادي يحبوها الأطفال الصغار

المهم نبدا حطي بصل يذبل في مقلة مع شوية زيت و ثوم و لحم مربعات صغيرة أو لحم مفروم أو دجاج قطع صغيرة انا اليوم استعملت كبدة الدجاج مع شوية طماطم مصبرة انا اليوم استعملت طماطم حب احسن من المصبرة اكيد عملت حبة كبيرة خلطيهم جيدا ملح و فلفل اسود حتى تطيب الكبدة ثم حطيه في صحن زيديلو شوية معدنوس مقسوم رقيق

و زيديلهم سلق تكوني ديجا دبلتيه في مقلاه وحدو مع الملح و الفلفل اسود فقط بلاما تفوروه لانو كي يدبل خلاص مش محتاج يكون فاير قبل زيدي معاهم جبن مثلثات مقطع حطيهم كل في بيراكس مدهون مليح و سويهم ثم كسري بيضات اضربيهم مع ملح و فلفل اسود و صبيهم فوقهم و ارحي فوقهم فرماج روج و دخليهم الفرن حتى تشيح العضام و حمري الفرماج من فوق و طفي
اممممممممممممم سهلة و بنينة و ننصح بيها الناس لي تعاني من فقر الدم سلق و كبدة مليانين بالحديد

شهية طيبة أحبتي

souheila dz · 2012-12-09, 19:54

ممممممممممممممممممممممممممممممممممممممم باين بنينة لازم نجربها يعطيك الصحة بصح........
علاه "جوزة الطيب..حرام لا أظن

الواثقة بالله 23 · 2012-12-09, 20:09

اقتباس:

المشاركة الأصلية كتبت بواسطة souheila dz

ممممممممممممممممممممممممممممممممممممممم باين بنينة لازم نجربها يعطيك الصحة بصح........
علاه "جوزة الطيب..حرام لا أظن

أهلا غاليتي جربيها بنينة خلاص

جوزة الطيب قريت مرة انو الاكثار منها حرام لكن القليل معليش لانها مثل المسكرات و المخدرات منعرف يمكن صح انا من باب الابتعاد على الشبهات وليت منستعملهاش عندي موضوع على جوزة الطيب ممكن ترجعيلو

نورت الصفحة أختي