مشاركتي في مسابقة شاف كوزينتنا*** الطبعة 3 ****المقبلة*****

basmala farah · 2013-04-21, 23:37

: dj_17:
حبيباتي صلو على النبي صلى الله عليه و سلم اللهم أدمها نعمة و إحفظها من الزوال
انشاء الله تعجبكم مقبلتي و أطلب من كل من تعجبها مقبلتي أن تدعو لي دعوة خير لي و لأبي الله يشفيه
أولا حبيت نقولكم بلي أنا تعمدت نخدم مقبلة بسيطة و في نفس الوقت فخمة و تحمر الوجه قدام الضيف مع مراعاة ميزانية كل عائلة
طبعا ما كثرتش عليكم المستلزمات و تقريبا كلها متواجدة بالبيت يعني كي تروحي للسوق ما تبقايش دوري إذن تشري غي حاجة ولا زوج و ترجعي طبقيها هههههههه
نبداو بسم الله الرحمان الرحيم
أنا إستخدمت أوراق الديول و ما تقولوليش غير متواجدين في الأسواق يعني مام لي يسكنو في المناطق النائية يقدرو يطبقوها ما عليهم غير يصنعو أوراق الديول راهي أختنا أم كوثر حطت طريقة صنعهم ههههه يعني تشرو غي المرقاز و إلى المطبخ
أنا إستخدمت 3 أوراق ديول كنت كل مرة ندهن واحدة بالدهان و نزيد فوقها الأخرى و هكذا حتي كملت 3 ورقات فوق بعضها و قطعتها بشكل دائري
السر في هذه المقبلة نها تجي بنينة و خفيييييفة و مقرمشة يم يم يمي بصراحة في الليلة لي درت فيها المقبلة كانو عندي ضياف اصحاب زوجي و حطيتهالهم كلهم عجبتهم و زوجي فرح بزاااف بيني و بينكم شكرهم و اعجابهم بمقبلتي زادني ثقة بنفسي و بقدراتي جربوها ماغاديش تندمو راهي تحمر الوجه و سهلة التحضير

أخذت دوائر الديول و حطيتها في قوالب القنيدلات أو المادلان و ضغطت عليها حتى تأخذ شكل القالب

النصف الأول دخلته للفرن يطيب بلا ما نحشيه خليته يأخذ اللون الذهبي يم يم

بينما كان يطيب كنت نحضر في الحشوة لي هي
قطعت المرقاز قطع صغيرة و مررتها في البيض ثم الخبز المطحون و قليتها
السر في تمريرها في الخبز المطحون هو أنها تبقى طرية من الداخل و ما تجيش ناشفة و في نفس الوقت تكون مقرمشة يم يمي

و قليت البطاطا مكعبات صغيرة و قليتها

وبعدما طابت حشيتها بالمرقاز المقلي المغمس في لاشابلير و قطع البطاطا المقلية و قطع الجبن و زينتها بالقصبرو المايونيز و اللوبيا خضرا و الشوفلار مفورين

أما النصف الثاني حشيته قبل ما نطيبه
الحشوة فيها مرقاز قطع صغيرة مغمس في البيض ثم لاشابلير و مقلي + شوية كرام فراش + بيشاميل و دخلته الفرن

بينما راهو يطيب غمست حبات مرقاز كاملين في البيض و لاشابلير

وربطتهم من الطرفين بعود خشبية على شكل هلال و قليتهم باه يأخذو شكل الهلال

و يااااااااا سلام على الرائحة يم يم يميييييي

لما خرجت قوالب الديول المحشية من الفرن نزعتها من القوالب الحديدية وأصبحت بشكل سلة أو قفة و درتلها يد لقفة تخيلو باه ههههه بالمرقاز
أصبحت قفة حقيقية و زينتها كما يلي

ثم خدمت العجينة المورقة و بردتها و حشيتها بحبات مرقاز نصف طياب و قطعتها دوائر

و في صينية إلى الفرن

لما طابو قدمتهم على شل باقة ورد
طبعا من المتداول عندنا اننا نعمل اسياخ المرقاز يعني brochette لكن تبادرت اللى دهني فكرة خطيييييرة نفس فكرة الاسياخ لكن بحلة جديدة فشكلتها باقة ورووود اهديها لكل من تعجبها مقبلتي

أدخلتهم في أعواد خشبية و زينتهم بأوراق النعناع و البيطراف كما في الصورة

وأيضا قطعت العجينة المورقة مربعات و فتحتها في الأطراف و حشيتها مرقاز نصف طياب و شكلتها مراوح و إلى الفرن

وشكلت دائرة بالمرقاز و درت في الوسط حبة بيض

وهاهي مقبلتي جاهزة يم يم يمي

أتمنى أن تنال أعجابكم ما تنساونيش بدعوة خير لي و لأبي رافقتكم السلامة
اهدي مقبلتي لكل العضوااات بدون تفضيل اقول كلكن اخواتي في الله

*رفيقة الدرب* · 2013-04-21, 23:46

األف ألف ألف مبروك يا بسملة الحمد لله لي طلعلك الموضوع يا حبيبتي عجز لساني عن التعبير إجتهدت و وفقت تبارك الله مقبلة في القمة ما شاء الله يا معسكر و شاراكي داسة بنيات ساجيات و يحمرو الوجه يا أرض إحفظي ما عليك
يارب إحفظ أناملها و احفظ زوجها و بناتها و اشف أبيها آمين يا رب العالمين

basmala farah · 2013-04-22, 00:30

اقتباس:

المشاركة الأصلية كتبت بواسطة dadou mascarienne

األف ألف ألف مبروك يا بسملة الحمد لله لي طلعلك الموضوع يا حبيبتي عجز لساني عن التعبير إجتهدت و وفقت تبارك الله مقبلة في القمة ما شاء الله يا معسكر و شاراكي داسة بنيات ساجيات و يحمرو الوجه يا أرض إحفظي ما عليك
يارب إحفظ أناملها و احفظ زوجها و بناتها و اشف أبيها آمين يا رب العالمين

شكرا حبيبتي على الدعاء