حلويات ...هشاشة..طراوة...ولذة

[اسمهان79]

السلام عليكم ورحمة الله وبركاته
اليوم حبيت نحليها نخرجو من الموالح شوية
وصفاتي سهلة بسيطة خفيفة ورااااااائعة والبنة خيااااااااااال
واقتصاااااااااااااااااااااااااااااادية
كلهم مجربين ومعاودين وناجحين ينفعو للأعياد للمناسبات وللأيام العادية من حبي فيهم كل مرة نعملهم نحب ديما حليبي معاه القاطو وكل مرة ندير حاجة ونَوَعْ رجعت دبدوبة غير من الحلويات ههههههه
الوصفة الاولى
1 ) حبة القهوة



المقادير
500غ زبدة طرية ( او لابال ) 3 صفار البيض و بيضة كاملة كاس سكر رطب كاس كوكاو رطب 1 خميرة الحلويات و1 افاني ( من الاحسن نتاع الميزان )
فرينة
الحشوة

باطة كاكابيجو (حلوة الترك) و حلوة الحلقوم نعجنهم مع بعض ونشكل تمرات انا وزنتهم بحجم 3 غ



التزين
شوكولا سوداء معجون المشمش كوكاو مرحي حرش وملمع
التحضير
تخدمي الزبدة مليح بيدك ترجع كيما لكريمة ثم السكر ثم الصفار والبيضة الكاملة ثم الكوكاو الخميرة ولافاني ونشف بالفرينة نشكل كريات بحجم 23 غ نضع تميرات الحشوة في كل وحدة ونغلق



ونشكلها شكل أُفال نقلب الموس ونعمل خط في الوسط وبالطول مثل الصورة



نطيبهم على درجة 180
لما يطيبو ويبردو نغطس جيهة في الشوكولا السوداء المذابة في حمام مائي مع شوية زبدة وحليب وشوية قهوة سائلة ( باش تعطيها لمعان ) نخليها تنشف ثم من بعد نغطسها في معجون المشمش مخفف بماء الزهر ثم في الكوكاو المرحي شوية خشين ونحط شوية ملمع فضي في الوسط بالطول





شكلها باهي والبنة والطراوة روعةةةةةةةةةةةة
ملاحظة (هاذ المقادير تعملك اكثر من 100 حبة )
الوصفة الثانية
2 ) الفلسطينية



قد ما نحكيلكم على هاذ الحلوة ما نعطيهاش حقها تذوب في الفم والبنة اكثر من رااااااائعة في بيتي ما نستغناوش عليها
روعةةةةةةة روعةةةةةة روعةةةةةةةة وكل من ذاقها طلب الوصفة ناجحة 100%
المقادير
250 غ زبدة صول او لابال او ستار المهم تكون بحرارة الغرفة عصير نِصْف حبة قارص وقشور القارص ( ليمون) 4 م ك سكر رطب 2م ك ماء الزهر نصف باكي خميرة الحلويات والفرينة
الحشوة
غرس طري معجون ب العسل والخميرة والسمن الكل بكميات قليلة ونعجنه مليح بالماء لازم يرجع طري ما بين صباعك
التزيين سكر رطب
التحضير
تخدمي الزبدة مليح بيدك ترجع مثل لكريمة ( وهاذا سر في الحلويات لانو كل ما تخدمي الزبدة مليح بيدك يجيك القاطو يذوب في الفم ) ثم اضيفي السكر وخلطي مليح ثم قشور القارص والعصير وماء الزهر والخميرة ونشفي بالفرينة لميها مليح نغطيها وخليها ترتاح نصف ساعة
ثم اطرحيها واطبعي بكأس نتاع تاي باه يجيك الحجم سْوا سْوا خذي القليل من الغرس نتاعك وإطرائه على الأقراص بلا ما توصلي للجوانب مثل الصورة ثم غطي بقرص واحد آخر واضغطي على الجوانب بِإِصبعك



وخذي كاس نتاع تاي واحد آخر يكون اقل بشوية من الكأس الاول واطبعي مرة اخرى فوق القرص المحشي بالغرس وحاولي انك تعدلي بإصبعك الدائرة شوفي الصور اكيد راح تفهمي اكثر


خذي ابرة واثقبيهم بيها وهاذا سر باه يجيك الغرس طري وما جيكش الحبة منفوخة لاني مرة جربتو بمول السيليكون صح جاء بنين وخفيف لكن الحبة من الداخل جاتني فارغة يعني هاذي احسن طريقة



طيبتهم بدرجة 180 ثم مباشرة في سكر رطب يكون مغربل من قبل سايسيهم باه ما يتكسرولكش حطيهم في بلاطو وزيدي ذرذري عليه السكر بواسطة الصفاية او سيار الرطب وخليهم حتى للغد ولميهم



والله يا اخواتي قد ما نحكيلكم على البنة والطراوة ما تقدروش تتخيلو الطعم حتى جربوهم روعةةةةةةة بكل ما تعنيه الكلمة والله والله والله راح يحبوهم اولادك خاصة ان نعرفو فوائد التمر كثيرة وكاين أطفال بزاف ما يحبوهش انا عن نفسي خاصة في وقت الامتحانات نعملو نحطو في علبة وفوق الطاولة واللي يجي يأكل بلا حساب جربيه اختي وأدعيلي دعوة خير

الوصفة الثالثة
3) حلقات بالكوكاو والجلجلانية

هاذ الحلوة ثاني بنيييييييينة وتهبللللللللل ذوق الكوكاو والجنجلانية روعةةةةةةةةةةة
المقادير 500 غ زبدة النوع اللي تحبي المهم بحرارة الغرفة
كاس كوكاو رطب كاس جلجلانية ( سمسم ) محمصة كاس ماشي مليان سكر رطب فنجان عسل4 بيضات 1 خميرة الحلويات 1 فاني والفرينة
الحشوة
معجون المشمش
التزيين
عسل ومعجون المشمش وكوكاو مرحي متوسط ومحمر مليح وكمية من الجلجلانية المحمصة
التحضير
نخدم الزبدة مليح باليد ثم السكر والعسل ثم البيض الكوكاو والجلجلانية الخميرة والفاني ونلم بالفرينة نخليها ربع ساعة ترتاح ثم نطرحها ما بين زوج بلاستيك ونطبع بمول دائري مشرشف ثم وثقب في الوسط

ونطيبهم على درجة 180 لما يبردو نلصق كل زوج بالمعجون ونخليهم يشدو رواحهم ثم نغطسهم في خليط من العسل والمعجون ثم في الكوكاو المحمر مليح مخلط مع شوية جلجلانية

ملاحظة ( الحبة تغطيها كلها بالكوكاو )
انا هنا للاسف كمية الجنجلانية اللي كانت عندي كلها استعملتها في العجين يعني غطيت الحلوة غير بالكوكاو لكن السمسم يعطيها بنة رااااااااائعة وذوق خاص

طرية وبنينة وهشوشة امممممممم وفي نفس الوقت باهية في الشكل نتاعها

الوصفة الرابعة
4 ) الغابة السوداء





امممممممم بنتو راهي في فمي يهبل يهبل
المقادير



500غ زبدة ( انا استعملت لابال ) فنجان نتاع التاي عسل تقريباً كاس سكر رطب ما شي مليان 4بيضات 1خميرة كميائية 1 م ص فاني 2 م ك كاكاو 1م ك نَاسْكافي ( قهوة سريعة الذوبان) فرينة
الحشوة
250 زبدة طرية بحرارة الغرفة ضربيها مليح بالباتور ثم زيدي 250 غ 12 م ك سكر رطب وخلطي ثم 12 م ك عسل ( العسل اللي استعملتو خدمتو بطريقة ام انس رااااائع رااااائع حقاً بارك الله فيها ويعطيها الف صحةةةةةةة) المهم نخلط مليح مليح ثم نضيف 2 م ك نيسكافي ونخلط
التزيين
نتيلا. شكولاطة مبروشة ملمع ذهبي
التحضير
تخدمي الزبدة مليح بيدك ثم السكر ثم الكاكاو الناسكافي خلطي مليح ثم البيض ويكون بحرارة الغرفة الفاني والخميرة ونشف بالفرينة نخبها ترتاح شوية ثم نطرحها ما بين زوج بلاستيك ونطبع دوائر ( هنا الإختيار يرجع ليك تحبي ديريهم كبار او صغار ) انا نفضل الحجم الصغير



طيبتهم على درجة 180 خليهم يبردو مليح
ومن جيهة وجدي لاكرام أٌبوغْ طلعني الزبدة الطرية بالباتور ثم زيدي السكر الرطب والعسل وخلطي مليح وديري ناسكافي باه تتحصلي على الذوق واللون المناسب
لصقي حبات القاطو نتاعك بلاكرام ديري ثلاث طبقات خليهم بجيه يشدو شوية



ثم أطليهم بالنتيلا غطي الحبة كلها



وخذي موس نتاع اللي نقشرو بيه البطاطا وابرشي فوق كل حبة شوكولا سوداء ثم رشي القليل من الملمع الذهبي او السكر رطب او تخليها هكذاك
وممكن تبرشي شوكولا بيضاء وترشي الكاكاو بالصفاية



الطعم اكثر من رائئئئئئئئع صدقوني ويحمر الوجه وبنيييييييين بنة خيااااااااال جربوه مش رايحين تندمووووووووو
بالحجم الصغير راح تقطعلك حولي 40 حبة
الوصفة الخامسة
5) قاطو الرخامة



الشكل رائع والبنة اروع
المقادير
500 غ زبدة طرية 3 بيضات وصفار بيضة كاس سكر رطب كاس نتاع التاي حليب الغبرة وكأس نتاع التاي عسل وكأس نتاع التاي نشاء 1 فاني 1 خميرة كميائية ونشف بالفرينة
التزيين
معجون المشمش شوكولا بيضاء وشكولا سوداء شوية كوكاو او اي مكسرات عندك
التحضير
نخدم الزبدة باليد مليح مليح ثم البيض ثم كل النواشف اللي في المقادير والعسل ونشف بالفرينة
نخليها ترتاح غير شوية ثم نطرح ونطبع أشكال بيضوية او ريشات او.........



طيبي على درجة 180 ثم لصقي كل زوج مع بعض بالمعجون وخليهم ينشفوا شوية
خذي قدرة ديري فيها الماء وحطي على النار ذليلة وحطي فوقها مقلا وفي هاذيك المقلا حطي طرف شيكولة بيضاء وطرف شيكولة سوداء بجنب بعض مثل الصورة وغطائهم وخليهم يذوبو بلا ما تحركيهم ثم خذي عود أسنان واعملي حركة من اليمين الى اليسار ثم اليسار الى اليمين ( يعني رايحة جاية بالعرض ) الصور توضح اكثر



خذي الحبة نتاع القاطو واغطسي السطح نتاعها في وسط خليط الشوكولا الشكل راااااائع شوفي



خليه تنشف مليح ثم اعملي معجون المشمش على الجوانب ثم في المكسرات اللي عندك او نواد كوكو كيما تحبي
بصحتك الا جربتيه يستاهل



الوصفة السادسة
6) قاطو الأرز





يستاهل انك تغامري وتجربيه تحفةةةةةةةة
المقادير



نصف كاس زبدةذائبة وباردة نصف كاس زيت نصف كاس سكر رطب نصف كاس أرز مرحي رطب ومسَير زوج مرات يرجع كي الفرينة نصف كاس نشاء نصف كاس حليب نيسلي 1 فاني 1 خميرة كميائية و الفرينة
التزيين
الاختيار يرجع ليكي في التزين بالطريقة اللي تحبي انا هنا استعملت نيسلي كراميلزي لصقت بيه واستعملت السكر الرطب والسكر الملون والحلوة الملونة بكل أنواعها
التحضير نخدم كل من الزبدة والزيت باليد مليح ثم السكر النشاء والأرز ونيسلي عادي الفاني والخميرة واكيد نشف بالفرينة لكن نضيف الفرينة غير بالشوية ونخلط لانو فيه الأرز وراح تتلملك بسرعة
ملاحظة
( اذا شفتي بلي العجينة يبستلك زيدي غير شوية حليب عادي وعاودي لميها )
ماتخليش العجينة ترتاح نطرح في نفس الوقت ما بين زوج طراف بلاستيك ونطبع الشكل اللي تحبي انا طبعت دوائر وقلوب ونصف الأشكال اللي طبعت قطعتهم على زوج لزوم التزيين



طيبيهم على درجة 180
لصقت الانصاص بنيسلي كراميلزي



زيني كيما تحبي وقدميهم لعايلتك وأولادك بالصحة والراحة



وصفات بسيطة.وناجحة ورائعة ولذيذة جربيها وراح تدعيلي اكيد من قلبك
نتمنى تعجبكم وتنال رضاكم
في أمان الله حبيباتي
دعوة خير تكفيني
دعوة بالشفاء لكل مرضى المسلمين

[*سيرين نور عيني *]

يارب العالمين اشف كل مريض شفاء لا يغادر سقما
ربي يحفضك ويفرحك دايما متالقة تبارك الله نحب الحلويات الخفيفة نجربهم باذن الله

[الرجاء الاماني المجد]

روععععععععععععة يعطيك الصحة

[OME INES]

يسعدني ان اكون اول من ترد علي موضوعك الرائع فجزاك الله خيرا

[ام إسراء]

ربي يشفي كل مريض شفاء لا يغادر سقما وحلويات في القمة مشكورة والشيكولة لي استعملتيها في الحلوة الرخامية اي نوعية وجزاك الله كل خير

[الرجاء الاماني المجد]

الله يبارك اسمهان روووووووووووووووعة

[ibtihal18]

ماشاء الله ربي يعطيك ما تتمني و ربي يشفي جميع مرضى المسلمين
ربي يوفقك
بارك الله فيك ابداع حقيقي

[acila15]

وااااااااااااااااااااااااااااااااااااااااااااااااا او واااااااااااااااااااااااااااااااااو حبيبتي وصفاتك قمة دمتي لنا و ربي يشفي كل المسلمين و يعطيك على حساب نيتك يا رب

[فهيمة 7]

اجمل تحية وارقى العبارات الى سيدت الطبخ والمبدعة دائما
عزيزتي اسمهان شششكرا على كل هذا العطاء
حلويات لذيذة واقتصادية فعلا من مقاديرها والاشكال تحفة واصلي بوركتي
لك مني احلى تقييم
وهاذي عرضة باش نتهواو جيبي لقاطو وارواحي ممممممممم

[طيور الجنان]

اسمهان راكي دوختيني من المالح للحلو و الوصفة اللي نشوفها نقول هاذي هي دوك عجبوني كامل يعطيك الصحة و ربي يبارك فيك يستاهلو التجريب ماشي مجاملة و الله غير صح.

[أم شيماءْ]

ياسلام عليك اسمهان فنانة يا كشرودة واحلي تقييم لعيونك

[انا هي رزيقة]

يا مامي هذي ماشي حلويات !!!!!!! هبلتينا يا فنانة و االله ايدياتك يتلفو في حرير يرحم الام لي سعاتك يا الفحلة و با رك الله لك في بناتك يا رب . االلهم اشفي مرضى المسلمين يا رب و يشفي ابن اخيك ان شاء االله

[رحمةز]

رب يجازيك كل خير
وصفات راااااااااااااااااااااائعة مثل صاحبتها

[ريتاج 09]

الله يبارك روعة راكي فنانة
اللهم اشفي كل مرضى المسلمين

[oumhana]

ربي يباركلك في يديك وصحتك و عينيك ما شاء الله انت فنانه باتم معنى الكلمة. ربي يقدني ونجرب خاصة تاع الشكيكولا لي مخلطه هي تحفة شكرا وربي يثقل بيهم موازين الحسنات و يرزقك صحة لبدان .