قاطو بالشكولة وجوز الخند رووووعة

sheherazed · 2015-06-01, 18:17

البسملة1

إن شاء الله تكونوا بخير؟أنا راها فيا حمى المواضيع هادو ليام مالا غير ساعفوني وماديروش عليا
البارح جربت قاطو كانت عطاتني ختي الوصفة واللي جابتها من الفايسبوك ومولات الوصفة الأصلية إسمها "أم رامي" مالا ما عرفتش إلى هي نفسها الشاف تاع منتدانا ولا شخص آخرللأمانة باش ماشي نسرقوا الوصفات ونزيدوا ننسبوهم لينا
المهم وبلا مانكثر الهدرة (بسلامتي نحب نحكي حياتي)راح نعطيكم الوصفة ونأكدلكم بلي نااااااااجحة وتحمر الوجه
المقادير:
400 غ فرينة،250 غ زبدة طرية،150غ جوز الهند،150غ سكر مسحوق ،2 بيض،كيس خمارة كيميائية ،فاني ومبشور ليمونة الطريقة:
تخلطي كامل المكونات مليح حتى تتحصلي على عجينة طرية بزاااااف وتلصق وهنااااا بكمن السر!لازم تكون طرية باش القاطو يجي هشوووووش وخفيف

بعد ما توجدي العجينة جيبي المول تاع السيليكون وبداي تعمري ولكن ماتعمريش بزاف لانو القاطو فيه الخمارة والبيض يعني ينتفخ،ونصيحتي لازم يكون عندك زوج مولات باش تربحي الوقتوتاني لازم توسعي خاطرك لانو فالاول يعييييك على خاطر العجينة طرية بزاف وتغبن بصح نووووورمال توالفي
وهادا شكل المول

بعد ماتوجدي القاطو إلى الفرن واللي يكون مسخن مسبقا على درجة 200 ومالازمش تبعدي عينيك عليه لانو ما يفوتش عشر دقايق طياب

وهدا شكلو بعد ماطاب

كي طيبي كامل القاطو وجدي الشوكولاطة واللي تكوني دوبتيها على حمام مائي ،أنا استعملت شكولا الوجدان راااااائعة وهادي الصورة تاعها

في هاد المرحلة تبقاي تحطي فالمول بالمغيرفة صغيرة وكي شغل تدهني المول بصبعك باش توصل الشكولا لكامل الأطراف ومن بعد تحطي الحبة تاع القاطو فوقها وإلى الثلاجة باش يجمد (أنا كنت كل 5دقايق نجبدو)

وهادا شكلو النهائي

نتمنى يعجبكم لاني والله غير عييت باش حطيت الموضوع وحملت الصورمن البارح وأنا معاه

وما تنساوش تعطيوني آرائكم والتقييييييم إلى نستاهل طبعااااااا

ملاحظة:ماقدرتش نديكوريه لانو ياحسرااااه على الوقت،والله غير رجل داخل ورجل برة

في أمان الله

سماح 88 · 2015-06-01, 18:26

يعطيك الصحة اختي بصح مخرجتش الصور عاودي حملي شوقتينا

sheherazed · 2015-06-01, 18:29

اقتباس:

المشاركة الأصلية كتبت بواسطة سماح 88

يعطيك الصحة اختي بصح مخرجتش الصور عاودي حملي شوقتينا

الله يسلمك حبيبة

خلاص راني حملتهم تقدري تشوفيهم

ام هاديل وياسين · 2015-06-01, 18:32

يعطيك الصحة الله يبارك اختي هادي الحلوى جربتها شحال من مرة وكل الي داقوها غندي

عجبتهم نزيدك فكرة اخرى اختي تقدري تحطي نصف شكولة بيضة ونصف الثاني سوداء تخرجلك حبة القاطو تحفففة

sheherazed · 2015-06-01, 18:55

اقتباس:

المشاركة الأصلية كتبت بواسطة **ام هدول**

يعطيك الصحة الله يبارك اختي هادي الحلوى جربتها شحال من مرة وكل الي داقوها غندي

عجبتهم نزيدك فكرة اخرى اختي تقدري تحطي نصف شكولة بيضة ونصف الثاني سوداء تخرجلك حبة القاطو تحفففة

Lah ysselmek hbiba w Rabbi ykhallik

IH mm ana mwalfa nkhallat les deux couleurs f les gâteaux lokhrin w yjiw hbaaaaaaal

Merci hbiba