موضوع مميز كواليس العيد الأضحى متأخرة

زينب 83 · 2015-10-03, 11:41

السلام عليكم ورحمة الله و بركاته

كنت حابة نحط كواليس عيد الأضحى من مدة لكن الظروف و ضيق الوقت منعوني ، اسفة على التأخير أخواتي

اعلم انه الكواليس تقريبا متشابهة في كل بيت جزائري لكن رغم ذلك حبيت نشاركم بكوا ليسي انا زينب 83

طبعا بعد تنظيف البيت تنظيف عميق و أعداد الحلويات و كسوة الاطفال ، في يوم عرفة جبنا ضيف عزييييييز على قلبي لي هو كبش العيد ربي يتقبله منا و من جميع المسلمين

يوم العيد و بعد الصلاة جاء زوجي ربي يحفظه و هبط الكبش للخارج بما اننا نسكنو في عمارة كل السكان يخرجو كباشهم للخارج الصراحة جو رائع جدا يتعاونو في الذبح و السلخ و زيد يغسلو كلشي برى و يطلعولنا كلش نظيف حتى الرجل لي عمرو غسل يعاند جيرانه و طبعا حنا النساء مستفيدات هههههه

بعد الذبح اول حاجة يبعثها زوجي هي الكبد شويت منها قسم باه نكسرو بيه الصيام

و هذا المطلوع درتو للغداء إلزامي ، حنا اول حاجة نتغداو و بعدها نروح للأشغال

اولا نروح للرأس شوطتو عادي و مباعد غسلتو بالماء و الصابون و قسمتو و خبيتو في المجمد

و هاذي الكرشة غسلتها من داخل بالفرشاة مليح و بسطتها بالسكين بعد ما نغطوها في ماء يغلي و خل

و مباعد قسمتها نص قسمتو صغير ندير عليه حمص امممممم و النص التأني درتو عصبانة

درت فيها ارز مغلي ، قطع لحم صغييييرة ، قطع كرشك صغييييرة ، قطع من المصران بعد ما غليتهم ، حمص ، زيتون اخضر مقطع ، كسبر ثوم يابس و ثوم طازج ، بصل مفروم ، دبشة مفرومة ، ملح

و هذو المصارن قلبتهم و غسلتهم مليييييييييح ، نحتاجهم للمرغاز

هنا نكون كملت الأشغال ، الكوعين مدهم زوجي برى و الجلد بعثتو لاختي راح دير بيه وسايد ، و الرئة لقيناها شوي مريضة و الكبد نص كليناه و نص خبيتو قفي المجمد

الصراحة العشاء ماتعشيناش كلينا فواكه فقط
في الليل وجدت الغداء تاع الغد ، عاداتنا نطيبو الكتف لكن انا درت من الفخذ ،مانحبش الكتف هههههه

و هاذي الجزرة راهي شاحت و الحمد لله ، نحينا ثلث الصدقة و الباقي قسم كالآتي

هاذا لحم السن تاع العمود الفقري بنين و ماشي مشحم يحبو زوجي

هاذو لزوم الشخاشخ و البرابش تقريبا للضيوف

و هذا للمرق مثل لوبيا و عدس

و هاذا للقديد

انا القديد نتبلو بالملح و الثوم المجفف و التوابل و نخليه يبات فيهم ليلة كاملة بعدها يطلق كامل الماء نتاعه و يشرب البنة ، نخيطو على شكل سلسلة و نعلقو ييبس و هكذا ماراحش يحكم لي مكان خاصة للناس لي يسكنو في العمارات ، هاو هنا تقريبا يبس

و هذا كوتليت نحيت لو كامل الشحم

و هاذو لزوم الشواء والستيك

و هاذو للشوربات و الطواجن

و الحمد لله حمدا كثيرا طيبا مباركا فيه

هذا كان عشانا لليوم الثاني
انا ماديرش الشحم في الشواء ، الكوليسترول لي في اللحم يكفي هههههه

و هذا غدانا لثالث يوم شخشوخة حاااااااارة

الان بعد هاذي الكواليس البسيطة في بيتي ، نروحو لدار لأهلي و اللي كانت فيها تقريبا نفس الكواليس ، الفرق الوحيد انو اختي جاوها ناسها في العيد و حبيت نشاركم كواليس الضيافة و قبلا نشكر غالياتي في الكوزينة لي مايبخلوش عليا بالمساعدة ربي يجازيهم كل خير

بما اننا في عيد الأضحى ، اول شيء لاز يذوقو من أضحيتنا

حطيت عصير

و معاه لحم و كبدة متبلين و مشويين

مقبلة بالعجينة المورقة محشية بالتونة و الفطر

كيش البوراك

بعدها حطيت تحلية و هي عبارة عن طبقات من الفواكه المقطعة و صوص الفراولة و كريم ديبلومات و عجينة مورقة طيبتها رقييييييقة و مقرمشة و قطعتها جات التحلية بطعم الميلفاي بالضبط امممممممممممم

[URL=https://www.m5zn.com/out.php?code=16011346][/URL

*

و الفواكه

و مباعد القهوة و الحلويات

الصراحة ماحبيتش نكثر عليهم بزاف بالاكل لانو علابلي بلي في العيد الناس كامل شبعانة

و هاذو عطيناهم لأهل خطيب اختي كي عادوا مروحين

و هذا واش جابو هوما و معاهم نوع حلويات نسيت ماصورتوش و طبعا مع الهدايا و الحمد لله
و حتى حنا عطينا لكل وحدة هدية و الصراحة فرحوا بزاف

هاذي كانت بعض من كواليسي لعيد الأضحى لهذا العام حبيت نشاركم بيها لاني أحبكم يا رب يكون تقبل منا و غفر ذنوبنا اعاده الله علينا باليمن و البركات

مرام 92 · 2015-10-03, 11:58

يسعدني ان اكون اول وحدة ترد عليك راني خونت مروصو تاع شوا هههههههههههه
بارك الله فيك دائما متالقة في مواضيعك ربي يتقبل منا و منكم و الف مبروك لاخت و ربي يخيلكم لبعضكم

فرح 97 · 2015-10-03, 12:04

بارك الله فيك اختي لكن اين الموضوع

ام سراج وملاك · 2015-10-03, 12:34

ماشاء الله عليك اختي زينب صراحة كواليسك رائعة استمتعت وانا نشوف فيها تقبل الله منكم قربان العيد وجعل الله كل ايامكم اعياد ونقول لاختك ربي يهنيها ويزين سعدها رووعة واش حطيتو لاهل زوجها ربي يتمملها بالف خير في انتظار بقية الصور بفارغ الصبر ليا عودة في موضوعك ان شاء الله

moumoucha · 2015-10-03, 12:45

ما شاء الله كواليس هايلة ربي يهني اختك و يباركلك في عائلتك

الرجاء الاماني المجد · 2015-10-03, 14:53

الله يبارك ربي يهني اختك زنوبة

idron0 · 2015-10-03, 12:56

بارك الله فيك

زينب 83 · 2015-10-03, 13:10

بارك الله فيكم غالياتي

fatisousou · 2015-10-03, 13:10

السلام عليك
رغم العيد فات بصح والله كان جوزت معاك شكرا لك لعقوبة العام الجاي وانشاء الله اختك ربي هنيها ويسعدها بالذرية الصالحة مشكورة مع تحياتي لك وللاسرتك