اطباق رمضانية ........من اوع ما يكوووووووووون

اسمهان79 · 2015-06-16, 19:02

السلام عليكم ورحمة الله وبركاته
رمضان كريم وكل عام وانتم بخير وهانيين ان شاء الله
ما نطولش عليكم ونخليكم مع البنة
دجاج محشي بالخضار امممممم من اروع ما يكون

رولي الدجاج بالسلق بنةةةةةةةة

صحن البطاطا

الوصفة الاولى

بسم الله
اول شيئ اعملي صوصو بيضاء واللي هي شوية بصل ثوم ملح فلفل اسود معدنوس افاح وزيت 1 م ص فرينة 1 م ص موطارد و1 م ك خل او عصير الليمون يعطيو نكهة خاصة للمرق انا عملت فيه 2 جنحيح نتاع الدجاج وقليت مليح ثم امرقي وخلي الدجاج يطيب

من بعد نحي الجنحين واقليهم في الزبدة والزيت وخليهم بجيه

عملت ربع صدر دجاج وزدتلو شوية لحم مرحي ورحيتهم مع بعض ثم اضفتلهم صفار بيضة ملح فلفل اسود افاح 1 م ص نشاء وثوم بودرة وخلطي كلش مع بعض
وجدي خليط الخضار واللي هو حبيبات جلبانة مغلية زيتون اخضر مقطع شرائح معدنوس ودبشة شوية ارز مغلي في الماء والملح ونصف حبة طماطم مقطعة مكعبات صغار ملح وفلفل اسود وثوم بودرة و1 بياض البيض وخلطيهم مليح
اطرحي الدجاج فوق ورق بلاستيكي ثم حطي الخضار على الجنب وخطي بالجزء الاخر وحاولي تغلقي مليح على الجوانب تتحصلي عل شكل مستطيل هاذ الكمية عملتلي زوج مستطيلات

ثم اقليهم في الزيت عل الجهتين

من بعد حطيهم في مقلات خاصة بالبانيني او هاذ الجهاز الخاص بيها فقط لزوم التزيين هاذا ما كان

من بعد لوحيهم في المرق مدة 20 د حتى المرق يخثار مليح
قطعيهم بهاذ الشكل وقدميهم مع الاجنحة المحمرة والخضار اللي بقاتلك

صدقيني راه بنين بزاااااااااف ويفرح عايلتك وخاصة لاصوص هبااااااال
الوصفة الثانية

خذي شراااااااائح الدجاج او سكالوب دو داند تبليهم بالملح والفلفل الاسود ولاموطارد وعصير القارص وخليهم مدة 4 ساعات او اكثر
في هاذ الوقت قطعي السلق وذبليه في شوية زبدة مع الملح والفلفل الاسود حتى يذباااااال من ضيفيلو شوية صوص الطماطم كيما اللي راني حاطتها في تحضيرات رمضان اللي يحب الطريقة هاذا هو الرابط
https://www.djelfa.info/vb/showthread.php?t=1805269
ونحط معها طرف فرماج شاف من الاحسن اللي مخدوم بالزيتون الاخضر بنتو رهييييبة وشوية فرماج مرحي وخلطي مع بعض ثم حطي في كل طرف سكالوب طرف من جبن الشرائح ثم شوية من الحشوة على الجنب ولفي عليها

وجدي صوص البيشاميل وكل واحدة وطريقتها في تحضيرها
البيشاميل
وهاذي اسهل طريقة لتحضير البيشاميل والبنة راااااااائعة
خذي كاس حليب كبير حليب بارد وحطي فيه 4 او 5 م ك فرينة ملح فلفل اسود شوية مبشور جوزة الطيب ثم مرحي او بودرة 2 حبات فرماج مثلثات وخلطي كلش بارد في بارد من بعد حطي على النار وبقاي تحركي حتى يثقال الخليط نحي من على النار ولوحي طرف زبدة وحركي حتى تذوب واللي عندها كرام فراش سائلة ممكن تضيف شوية تزيدها في البنة والله طريقة سهلا خلاص وتجي روعةةةةةةةةة
نرجع للوصفة ادهني المول نتاعك وفرغي شوية بيشاميل ثم حطي الرولي اللي وجدتي حطيهم بجنب بعض

وفرغي عليهم البيشاميل ورشي الفرماج المرحي وغطي بالورق البلاستيكي ثم الالمنيوم ولوحي يطيب تقريبا ساعة ثم نحي الغطاء وحمريه مليح من فوق وقدميه بالصحة والهناء لذيذ لذيذ وما يتشبعش سخون ولا بارد

الوصفة الثالثة

خذي حبات بطاطا قطعيهم دوائر بهاذ الشكل والجوانب ما ترميهمش
اقليهم في الزيت مع الدوائر

وجدي الدجاج مقطع الى شرائح ثم قليه في فلزيت مع شوية بصل ثوم فلفل اسود افاح كمون زنجبيل وشوية هريسة قلي مليح حتى تشوفيه طاب قلي على نار ذليلة ثم نحي من على النار وضيفيلو صوص الطماطم والفرماج المقطع الى طراف صغار وقطع البطاطا اللي قليتي الطراف اللي بقاو من الدوائر

وقطع ليزونشوا كيما في الصورة

وممكن الستغناء عليهم واذا استعملتيهم متستعمليش الملح خلاص لانهم هوما في الاصل مالحين بزاف
ادهني مول ومن الاحسن اللي يتفتح على الجنب بشوية زبدة ورشيه بلاشبلير وحطي البطاطا في الاسفل وحاولي تلصقيها في بعضاها وثم حطي على الجوانب دوائر البطاطا واحدة فوق ختها تتحصلي على شغل طبسي كيما في الصورة

ثم فرغي الحشوة نتاعك ورشي الفرماج المرحي والى الفور

ما يطولش بزاف في الطياب لانو كلش راه طايب

وقدميهاااااا بالصحة حبيبتي
نتنمى نشوف تطبيقاتكم في هاذا رمضان ان شاء الله ما تندموش كي جربوهم
في امان الله حبيباتي