طريقتي في صنع المحاجب + شرح لعجينة الكيس المبلل

الوهرانية 1 · 2012-11-20, 17:46

السلام عليكن حبيباتي الغاليات نتمنىيلقاكم موضوعي هدا وانتن في كامل الصحة والعافية
اليوم خيرت لكن المحاجب بطريقتي ونتمنى تساعدكن
المعروف ان حبة المحاجب متقدريش تتحكمي فيها اكثر او تشكليها بحرية والسبب الحشو الي بداخلها لان العجينة ادا تشمخت تنثقب ليك والحشو يصبح في خبر كان والحبة تجيك مستطيلة مثلثة لكن مربعة مستحيل واحيانا تحشمي تقدميها بسبب شكلها لعوج
المهم حبيبتي اليوم نقدملك هاد الحل ونتمنى يساعدك تابعي معايا

قبل كل شيء كنت حطيت لكن طريقة الكيس المبلل الدي نعتمد عليه في كل المعجنات وبعض الاخوات ما فهموهش اليوم صورت لكن بطريقة اوضح
تابعي اختي
حطي في قصعة سميد رقيق مع شوية فرينة وملح وماء دافيء

اعجني بيدك حتى تتلم مع اضافة الماء تدريجيا حتى تصبح هكدا

الاخوات الي سالوني عن الكيس وكيفية تبليله هو كيس عادي

وهنا تابعي كيفاش نشمخوه نغطسوه كامل في صحن به ماء فاتر

ومباشرة وهو يقطر نديرو فيه العجينة

ونغلقه مليح

هاهو كيفاش يصبح

نقلعو الكيس ونعجن من جديد يعني نلقاو العجينة مبللة ندخلو ليها هاداك الماء

ونرجعو نديروها في الكيس لكن المرة هادي نعصرو الكيس

وشوفيها كي تولي من غير دلك وتعب

نقطعوهم كويرات صغيرة وكويرات كبيرة
ولكل كرة كبيرة كرتين صغيرتين
يعني 10 كريات كبيرة= 20 كرة صغيرة
بالصور

الكرات الصغيرة نحلها ونخدمها رقاق او تريد هاهو

نبدو الان تحضير المحاجب
انا استعملت حشوة البصل الطاطم المصبرة الزيتون مقطع الجبن فلفل اسود وملح
البصل قطعته في الربو يجي رقيق احسن

كي طاب زدت عليه الزيتون والطماطم

في الاخير درت الجبن

نفتح كرة عجينة بالزيت نحط فوقها ورقة تريد او رقاق ونحط الحشو

نحط ورقة اخرى من الفوق

نغلقها بهدا الشكل

نحطها في الطاجين كيما راكي تشوفي اختي تصبح ساهلة تتحكمي فيها والحبة تجي كبيرة

كي تنشف من الفوق اقلبيها

وها هي الحبات جاهزة

وسهلة باش تطويها كيما تحبي

وتجي مورقة من الداخل

ربما طولت في الشرح لكن في الواقع هي سهلة وخاصة ادا حضري الرقاق من قبل
صحة وعافية عليكن

terrou · 2012-11-20, 17:53

Meeeeeeerciiiiiiiii

it's me · 2012-11-21, 09:42

Rabi ykhalik sahalti 3lina dlik
merci

الوهرانية 1 · 2012-11-21, 10:57

اقتباس:

المشاركة الأصلية كتبت بواسطة it's me

rabi ykhalik sahalti 3lina dlik
merci

العفو اختي الكريمة رانا كامل نستفادو من المنتدى

الوهرانية 1 · 2012-11-21, 11:23

اقتباس:

المشاركة الأصلية كتبت بواسطة terrou

Meeeeeeerciiiiiiiii

العفووووووووووووووووووووووووو اختي

hannaria · 2013-09-16, 18:53

okhti allh ykhlike ki na7iti la 3djina l mara lawla nzidou ndiroulha l ma w na3adjnou wala lala

w zidi barke goulil gadahe nkhaliha fi l kisse

w na9dare ndire kowayrate kbare barke mandirache hadouke sghare

hadi awale mara ray7a ndirhome 3labiha rani nssa9si

rabi ya7afdake.....merci a la vance

oumraja · 2012-11-20, 18:06

ya3tik 1000 3afia oukhti rw3a

الوهرانية 1 · 2012-11-21, 11:22

اقتباس:

المشاركة الأصلية كتبت بواسطة oumraja

ya3tik 1000 3afia oukhti rw3a

انتي الاروع تحياتي

om asma · 2014-05-19, 23:07

يعطيك الصحة على هذ المحاجب الهايلين وعلى طريقة العجن بلا تعب

تالا تسنيم · 2012-11-20, 18:27

ربي يسترك و يحفظك حنونة..................... بارك الله فيكي .................. طريقة و لا أسهل.............

الوهرانية 1 · 2012-11-21, 11:21

اقتباس:

المشاركة الأصلية كتبت بواسطة تالا تسنيم

ربي يسترك و يحفظك حنونة..................... بارك الله فيكي .................. طريقة و لا أسهل.............

الله يخليك اختي وشكرا ليك على المشاركة

سعاذ · 2012-11-20, 19:53

بارك الله فيك

الوهرانية 1 · 2012-11-21, 11:20

اقتباس:

المشاركة الأصلية كتبت بواسطة سعاذ

بارك الله فيك

الله يبارك في ايامك

أم رقية نسرين · 2012-11-26, 16:43

يعطيك الصحة ما شاء الله

اسمحيلي ختي بالنسبة للكسرة تاع الخميرة و لا كيما تقولو المطلوع كي نبل العجينة نحطها في الكيس المبلل و نخليها و من بعد نعاود نجبدها و نعصر الكيس و نحها فيه و نطيبها ؟؟؟ أرجو منك أن تفيديني جزاك الله خيرا لأنّي ديما كي نديرها ما تجينيش مليحة خلاص تجي شغل مجلدة و تطوط
قوليلي ربي يعيشك

أم رقية نسرين · 2012-11-26, 16:47

بصح راني ما فهمت والو في الرقاق :d ديري مزية كون تشرحيلي