غريبيتي للحبيبات لي هبلو عليها تفظلووووووو

[أم محمد تاج]

بسم الله الرحمان الرحيم
اللهم صلي وسلم على الحبيب المصطفى وسلمه تسليما

حبيباتي حطيت غريبيتي للبنات تاع الكوزينة وهبلو عليها وكامل داو الوصفة وكي حطيت صور لي قاطو تاع عرس بنت خالتي ثاني هبلو عليها بزاف بنات وكل يوم طلب على طريقتها وطريقة تشكيلها وتهاونت وتفنيت والصراحة المنتدى لي زاد عليا ثقييييل يقتل ويهبط الموووراااال فقلت اليوم ربي يستر يا يفوت موضوعي يا نخييييييب
هيا بسم الله

هاي ليكم الصور النهائية للغريبية



وهنا راه الفلاش لي ردها صفرا بنات بزاف قالولي درتيلها ملون اصفر راه غير الفلاش هي بيضاء



حبيباتي الطريقة بالتفصيل الممل:

اولا ماننساش فضل الشاف ام كوثر الله يعطيها ماتتمنى اول غريبية صلحتلي هي تاعها وبيها تفننت وحرفت ( تخرجت من مدرسة ام ياسيييين) وخرجتلي احلى غريبية

1-كيلة سمن المدينة ذايب ونردو للثلاجة يعاود يجمد ليلة كاملة او اقل شي اربع ساعات وكي نجي نخدم نحيه بفترة باش ترجع تطرا
2- ثلاث كيلات فرينة انا نستعمل سيم ونقليها على طريقة الحبيبة لايدي الله يعطيها ماتتمنى يعني نحط الفرينة في بلا تاع زجاج ونسوي الوجه مليح بالمغرف ونحطها في الفور سخون ونعسها حتان تعمل تشققات يعني كي شغل ضربها زلزاااال

هاي ليكم طريقة تحماص الفرينة
نسوي الوجه مليح بالملعقة



نحطها في الفرن وهنا كي خرجتها شوفو اللون والتشققات




3- كيلة ناقصة غير زوج اصباع سكر قلاصي انا نستعمل المرجان وهو المخير
4- رشة فاني
5- ملون ابيض حسب الكمية لي راح تخدميها

حبيباتي بواسطة الباتووو او العجانة نحط السمن الطري والسكر قلاصي والفاني والملون الابيض ونخبط مليح مليح حتان تطلع وتبياض عندنا نحيها ونضيف الفرينة تاعي هي على الاغلب ثلاث كيلات بالتمام والكمال ماتزيدي ماتنقصي وساعات نطيح في الفرينة تشرب وساعات ماتشربش ونزيد غير شوي برك عادي تقدرو تزيدوها مايش مقلية
هنا لخلايع ههههههههههه راح تجيكم العجينة مرملة ومستحيل تتلم ويهبطلكم المورال وخلالالالالالالات ويبدا العرق يهبط هههههههه احكمو غير بالشوي وحكو بين يديكم مليح مليح ضرك تطلق وترجع عجينة روووووووعة طرية وسهلة التشكييييييييل خسارة ماصورتش المراحل بصح راني دائما نخدمها ونوعدكم نحط كامل المراحل كي تطرا عندكم شكلو حرابش هك



وبواسطة طرف كاغط تاع باطة الدواء مثلا فصلو مستطيل هو لي راح تقيسو عليه المقروظات باش يجيو قد بعضاهم وقصوها مقروضات وبواسطة السكين اعملو خطوط كالتالي



حطوهم في السنيوة وخليو شوي من العجينة البيضاء لونوها بالون الوردي وحلوها رقيقة واطبعوها بالاشكال لي تحبو الصراحة كي خدمت للنسا حبو طابع الفراشة والورقة لي خدمت بيهم بزاف بزاف
والفراشات حطوها على المقروضة ومع الطياب تلصق وحدها
نجيو للطياب حبيباتي
نشعل الفووور قاوي ويسخن مليح ومبعد نقص خلالالاص يعني على الاخير حتان تحبس البوطو وكي نجي نحط السنيوة تاعي نحل يخرج هذاك الصهد ونحط لغريبية طيب 45 دقيقة على مهلها وتخرج احسن غريبية





وهنا كي طابت ورشيت عليها رشة بريو دوري او ارجونتي في زوج ملاح



نجيو ضرك للصح تاع الصح راح تحاولو تنحيو الغريبية من السنيوة وراح تجيكم تتفتت ولاصقة ووووو هاذي الخلعة الثانية هههههههههه خليها في السنيوة ماتمسيهاش كي تبرد مليح رديها للثلاجة تحكم روحها روووعة رووووعة ونحيها وخليها تدفا ونحيها واذا ماتنحاتش فوتيها بالخف على النار خفيفة ضرك تتنحى بسهولة بصح صدقوني كي تحطيها في الثلاجة تتماسك رووووووعة ومستحيل تتفتت وحتى تسافري بيها مايصرالها والوووووووو


وهنا لعيونكم احلى غريبية






ملاحظة حبيباتي: انا ليلة من قبل نحمص الفرينة ونذوب السمن والفرينة نغربلها ونخليها تبرد مليح والغدوة من ذاك غير نخلط ونشكل لازم الفرينة تكون باردة ومغربلة والسمن نحيه يطرا لازم .


دعوة منكم تكفيني للترحم على روح امي الحبيبة الغالية

[foufamara]

يسعدني نكون اول وحدة تعلق ما شاء الله دائما متالقة
سؤال حبيتي تقولي تحمريها كما سميد في الطمينة في الفرن قبل ما تبداي تخدمي

:1 9:

[أم محمد تاج]

المشاركة الأصلية كتبت بواسطة foufamara

يسعدني نكون اول وحدة تعلق ما شاء الله دائما متالقة
سؤال حبيتي تقولي تحمريها كما سميد في الطمينة في الفرن قبل ما تبداي تخدمي

:1 9:

انا الاسعد حبيبتي نورتيني وشرفتيني
حبيبتي حطي الفرينة في بلا تاع زجاج من الاحسن وسويه بالمغرف مليح وحطيه في الفرن سخووون كي تتشقق نحيها

[om djawad]

روعة يعطيك الصحة

[ام رويدة]

بيضا روووعة وصفرا روووعة...يعطيك الصحة والله تحفة...ما شاء الله تبارك الله
ربي يرحم الوالدة ويجعل مثواها الجنة وجميع موتى المسلمين...ااامين

[دائمة الحمد]

يعطيك الصحة ام تاج والغريبية تاعك شكلها يشهي

وتعودنا منك على روعة الوصفات ماشاء الله عليك
ربي يرحم الوالدة ويجعل مثواها الجنة

[om wassim]

يعطيك الف صحة هبلتني هاذ الغريبية بصح نخافها ربي يرحم الولدة و يسكنها فسيح جناته
بارك الله فيك ام تاج تحفة قليلة فيها

[الماسة النادرة]

روعة ام تاج لكن علاش مديريش مدونة ولا صفحة على الفايس. بوك تم تخلدي اعمالك انا وحدة نشجعك على هذي الفكرة لانو اعمالك حرام تروح بين الصفحات لازم تبقى وتتنضم باش الكل يستفاد وانتي تدي اكبر عدد من الحسنات ونرجع مرة اخرى نشكرك

[ام النجمين]

44444444444444444444 تهبل

[idron0]

جزاك الله خيراً

[nessma 23]

و الله لعظيم راكي فنانة تستاهلي كن التقدير

[عابرة سبيل74]

امممممممممممممممممم شهتينا يعطيك الصحه روعه

[om asma]

بارك الله فيك ربى يجعلها في ميزان حسناتك ربى يرحم والدتك ويجعل مثوا ها الجنة

[Aya69]

يعطيك الصحة حبيبتي ربي يفتحلك أبواب الخير ان شاء الله بإذن الله نطبقها
ربي يرحم الوالدة ويجعل مثواها الجنة وجميع موتى المسلمين...ااامين

[Aya69]

ام تاج يا لغالية مقولتيناش باه لصقتي الفراشة وشكرا ربي يجازيك كل خير ان شاء الله