ماذا افعل معها و هي طفلة

[مشكلتي]

السلام
راح نطرح عليكم مشكلتي ممكن تعتبروها صغيرة مي هي فريمو تقلقني و نتمنى تعاونوني
انا راجل عندي 28 سنة متزوج من عام و 5 اشهر من مرأة عندها 23 سنة
مشكلتي هي ان زوجتي طفلة بأتم معنى الكلمة فالاول كنت نحسب بسكو فارقت الاهل و تبدلت عليها الحياة بصح عقليتها صغيرة مثال ك
1- تخاف من الظلمة مرة راح تريسيتي فالليل ماكنتش فالدار رجعت صبتها ميتة بالبكاء حتى خلعت لكشما يصرى فيها
2-تخاف من القطوط و الحشرات و بمنى اخر "من كل اشكال الحيوانات " لدرجة مايتصورهاش انسان
3- كي تبغي حاجة و نقولها لا تبقى تلح و تلح "تعيش تعيش تعيش تعيش " حتى نقول هيه و اذا ماقلتش هيه تموت و معلاباليش واش يصرى
4- تصرفاتها مع باباها كي يزورنا ماهمش تصرفات تاع وحدة متزوجة "تقعد في حضن باباها و تحكي و ماكاش خلاص الحاجز هاداك مع خاوتها الذكورة تحكي معاهم بطريقة لوكان انا تحكي هكدا معايا اختي نتشوكا ؟
5- تظال تلعب مع الاولاد الصغار و تتمسخر معاهم و كل يوم تقول "جارتنا ولدت توأم لوكان تخليني نجيب واحد ..فالسبيطار اليوم واحدة ولدت و ماتت على الطابلة لوكان تخليني نجيب ولدها ..ولد اختك يهبل علاه ماتجيبوش يبات معانا .. توحشت ولد خويا جيبهولي .والخ..."
6-و الكارثة تسيبورتي الريال و ماش عادي بجنون كي تربح البارسا داري تتقلب علاه كيفاه و يعششو "و لوكان نقوللها انا واش دخلني تقولي كيفاه "
7- كل يوم جيبلي حاجة نقولها لا تقول مالا ماتحبنيش ؟
8-كي الطبخ كي اعمال المنزل كي تصرفاتها .......كارثة طبيعية ؟؟؟
9- تقري لولاد تاع بريمار كي تصرى حاجة لتلميذ تقوللي ذرك بعد نروح عندو لولاد اللي يقراو عندها كل فاكوننس نصيبهم عندي و بدات شو الحكاية تقلقني ؟
10- انا نخدم شرطي و مرات نخرج فالليل و هي ماتقدرش هاد الشي " علاه تخليني حدي .مالا نروح نروح . ماتزيدش تهدر معايا .تروح ذرك بعد لا نفتل روحي ...."
11-الحاجة اللي تهبلني تجي تصيبني نتفرج الجزيرة ولا العربية و تشوف الحرب و الدم تبدى تبكي تبكي تبكي حتى نبدل ندير للمدام تتفرج الجزيرة ولا طيور الجنة ....
كي نقولها على حاجة تبدى تبكي حتى قبل ما نعيط عليها و نكون صريح هادي نقطة ضعفي كي نزعف نقول واش داني
صحابي واح يقولي اضربها واحد يقولي خليها تبكي حتى تسكت وحدها واحد يقولي سايسها
كيفاش ندير راني نسايس فيها كي بنتي وانا مازلت ماولدت
بالاك في بالكم المشكل صغير مي يهمني رئيكم قبل ماتتطور مشكلتي و تتهدم داري و انا معنديش الزهر
و بارك الله فيكم و اعتذر على ازعاجكم
رئيكم يهمني

[فارس الجزائري]

صاحبي مدام تسيبورتي الريال توشيها ما نتفاهموش ههههههههههه
ــــــــــــــــــــــــــــــــ
وعليكم السلام
خيرا إن شاء الله
المهم في القضية أنها تعي معنى الحياة الزوجية وتأدي واجباتها
أما الباقي فهو عادي بل بالعكس أراه شيئ جميل لو تفعل مثلها
فأنت بنزولك لمستوى تفكيرها تستطيع الأخذ بيدها وتطوير قدراتها الإدراكية
عليك أن تكن معها في تبيين حقائق الأمور وتعطيها دروس من خبرتك وإن شاء الله مع الوقت ستنضج وتصبح كبيرة بل أتوقع أنها ستكون إمرأة ذات خبرات كبيرة فلا تتعجل الأمر وإصبر عليها ولا تنسى أن تعطيها من خبراتك والوقوف إلى جانبها حتى تأخذ من الحياة ما تحتاجه لمستقبلها
عش معها طفولتها وإستمتع معها صدقني ستجد الأمر فيه سعادة لك ولها
بالتوفيق إن شاء الله

[sara2012]

واش راح نقولك خويا مرتك راها فووووووووووووووووووور
صراحة ان مانعرفش فالحوايج هادو نتمنى ذوي الخبرة يعاونوك
ربي يهنيكم

[راجي الصّمدِ]

السلام عليكم ورحمة الله وبركاته
حافظ على زوجتك الكريمة
فهي نادرة
والله الموفق

[*جوري*]

ربي يعينك اخي بالاك كانت مدللة في دار باباها
انصحك اخي انك تتكلم مع ابوها او اخوها و هو بدورو يهدر مع امها او اختها و يفهموها
و لكن انت ماتكبرش الحكاية قلهم برك انصحوها
او اذا عندك اختك قريبة منها تفهمها و هي مع الوقت رايحة تتبدل

[- بصمة خير -]

المشاركة الأصلية كتبت بواسطة زمردة17

ربي يعينك اخي بالاك كانت مدللة في دار باباها
انصحك اخي انك تتكلم مع ابوها او اخوها و هو بدورو يهدر مع امها او اختها و يفهموها
و لكن انت ماتكبرش الحكاية قلهم برك انصحوها
او اذا عندك اختك قريبة منها تفهمها و هي مع الوقت رايحة تتبدل

خلصت خاصية الشكر ماعلاباليش لاه

و لكن كلامك عجبني

ربي يوفق

[- بصمة خير -]

المسألة ماتلزمش الطلاق على ما أظن

و لكن بما أنك انت اللي فاهم و واعي انت اللي لازم تعرفلها المفتاج تاعها و كيفاه تتعامل معاها و تهدر معاها

شوي صعيبة و لكن كي تعرف كيفاه تتعامل معاها تسهال الامور

ربي يوفق

[nesrina10]

اخي مارانيش نشوف فيها مشكل كبير بالاك شويا فشوش ودلع ومازال ماوالفتش برك اصبر عليها وزيد ادا تقوم بواجبها كزوجة وتقوم باعمال البيت ولو القليل هاي فيها امل تتسقم
على حساب الشوفة ساكنين وحدكم من رايي كان سكنت مع الاهل مدة 3اشهر او اكثر تحط الطفلة من روحها وتحشم من اهل البيت .
المهم اصبر عليها مادامها ذات خلق ودين وهاد المشكل تاع وقت برك
ربي يبارك ليكم و عليكم

[anoire-bec]

اظن ان زوجتك لم تختبر الحياة من قبل
اتمنى ان تجد الجواب الشافي
بالتوفيق ان شاء الله رغم ان زوجتك رائعة

[الزهرة السمرة]

نقووولك هادي فوووووووووووووووووور ماعندهاش حقد ولا غل خليها على طبيعتها أحسن

[hmz.hmz1]

يبدو لي ان زوجتك هي البنت الوحيدة في عائلتها و هي صغرى بالطبع هذا ماجعل الجميع يعاملها بدلال و على اساس انها صغيرة تلك الحالة تطبعت بها زوجتك في بيت ابيها و لم تستطيع التاقلم مع الجو الجديد بيت و زوج و مسؤولية لذلك و جب عليك ان تشعرها بالفارق و لو بالتدريج احكي لها بعض المشاكل العائلية و لو البسيطة و اطلب رائها و كيفية حالها بالنسبة لخوفها من الظلام و ما شابها اسالها ان كان في بيتكم احد الابناء و انطفأ الضوء او اقتربت منه حشرة و انت غير موجود كيف تتصرف معه عاملها من خلال تصرفاتها بان تضعها في حالات تكون هي المسؤولة عن شخص و الله يوفقك اخي و يصبرك و يهدي زوجتك

[تاج الوقار16]

شر البلية ما يضحك

ضحكت كثيرا والله

ولكن ان كانت لك سعة صدر فعليك بتربيتها

وقد يحتاج ذلك منك قدرة تحمل ومدة على الترويض اخشى ان تتعبك

حاول وان فشلت

لك بالزوجة الثانية

لا تتخلى عنها لعيوبها ولكن ايضا
لن تبقى ماسورا معها فقط

ربما ستغير من ضرتها وتتعلم

[اسيا 86]

المشاركة الأصلية كتبت بواسطة تـاج الوقار

شر البلية ما يضحك

ضحكت كثيرا والله

ولكن ان كانت لك سعة صدر فعليك بتربيتها

وقد يحتاج ذلك منك قدرة تحمل ومدة على الترويض اخشى ان تتعبك

حاول وان فشلت

لك بالزوجة الثانية

لا تتخلى عنها لعيوبها ولكن ايضا
لن تبقى ماسورا معها فقط

ربما ستغير من ضرتها وتتعلم

يخي هدرة يخي باين بلي تغيري نتيا

[اسيا 86]

مرتك عقليتها فوررررررررررر وزيد حساسة كي تبكي بزاف نتا اهدر معاها بالعقلية و فهمها بلي متحبش هادو التصرفات الصبيانية بصح انا نشوف بلي هادو الطوايش حلاوتها بلاك نتا سيريو بزاف نقولك حاجة مسكينة راهي تدلل عليك برك ماتكسرش خاطرها و نفسيتها و ادا كان تعنق باباها وش تفشش عليه خرمن يروح عليها وتندم لاقدر الله ماتعقدتش روحك عيش اللحظات الجنونية مع مارتك ولاكن وعيها ماتهملش دارها وحاجياتك ربي يدوم الفرحة كاين بزاف لي يحسدوكم على هدا التفشاش كاين لي غير يدخل لمرتو يلقى النكد ماتخليش صحابك ياثرو عليك بلاك في قلبهم راهم يتمناو يعيشو مع امراة تضل تضحك وتقصر ماشي شنايفية و اذا كانت تعامل الاطفال بلطف ماشي معنتها تلعب معاهم بلاك عندها غريزة الامومة قاوية وكي ما زال ربي مارزقكمش بالذرية تتعامل معاهم هكاك فهمها في عقليتك وماتخسرهاش ربي يفرحكم

[حسينة 36]

راك مليح تخليها تتفرج وتشججع الريال انا راجلي ما يحبنيش نتبع لماتش لاني مشجعة من الدرجة الاولى نحيتها كامل للرجال يسمحولو المشجعين
راني نحسدها في هاذ النقطة هههههههههههههههههههه نضحك برك
المهم زوجتك واضح انها طيبة وما عندهاش الحقد حسب كلامك واحمد ربي مشاكلك في هذا المجال برك حاول تنزل لعقليتها وتفكر كيفها وتمهدلها الامور الي ما تحبهاش بالشوية حتى تتقبل لانها باين مدلله ومفششة فوق الازم وزيد باين ما تحملت حتى مسؤولية من قبل في الدار وراك تقول راهي مربية تاع البريمار من المفروض تكون واعية فهمها انك ما تحبش الزايد في دارك لانك تحب الراحة والهدوء وما تحبش شكون يزورها من بعدك بخلاف الاهل

وربي يعينك عليها هاذ الطفلة ههههههههههههههه

وزيد ربي مازال مرزقكمش الذرية الصالحة نهار الي يجيبهم ربي اكيد راح تتغير وتتحمل مسؤوليت اولادها