أخ الزوج ؟ هل انا المذنبة أم هو ؟

[مشكلتي]

بسم الله الرحمن الرحيم

السلام عليكم و رحمة الله

أرجوا من الاخوة و الأخوات تقديم مساعدة لي و اعتبروني كأخت لكم

نبدأ بإذن الله

انا متزوجة وعلاقتي باهل الزوج طيبة الكل يشهد بأنني طيبة ولله الحمد

وأعاملهم بمعاملة حسنة و ابادل السيئة بالحسنة و لله الحمد

ولكن بصراحة ان تدنى لي احد بقول فاحش او انقص من كرامتي فأمحوه من قلبي و عقلي نهائيا

نتكلمو على اخ زوجي الذي يصغرني بسنتين

وكنت اعتبره اخا لي و اقدم له المساعدة و ادرسه ولم اتوانى بتقديم اي شيء له باعتباره اخي ثم اخي

وفي يوم من الايام اذا بي امازحه في امر و قلت له يا اخي الاكل اكلته كله ولم تترك لي شيئا

واذا به يصدمني ويقول اذهبي والا ضربتك بالصحن



طبعا انصدمت وقلت له هل تمزح ام تتكلم بجدية واذا به ينظر الي بنظرة غريبة و غير معتادة ويعيد الجملة اذاهبي والا ضربتك

فقلت له انا لن ارد عليك لانك صغير علي واذا به يمده يده و يفعل فعلا مشينا ( كلام فاحش )

فانصدمت و اذا بي انفجر بكاءا و اصعد لغرفتي و ابكي حرقة

ومنذ ذلك اليوم لم اتكلم معه ولم يتكلم معي وقد مر على الخلاف 4 سنوات تقريبا

و لم يكلم احد منا الآخر

ما رأيكم اخوان هل انا مذنبة ؟ انا بصراحة كنت انتظر على الاقل اعتذارا منه او مبادرة بالحديث فأسامحه

ولكن للآن لما يراني يغير نظره و اذا وجدني بمكان لا يدخل اليه بتاتا


بصراحة انا لكم استطع ان اكلمه لانني اخاف ان يذلني اكثر

ما رأيكم اخواني؟ اعرف ان الكثير سيقول بالعامية المداسرة هي لي توصل لهذه الامور

ممكن صغر سني و قلة خبرتي آن ذاك هي التي اوصلتني لهذا الامر

لكن ما اطلبه منكم هو من المذنب و اجابتكم تكون على حسب روايتي لانني والله سرتدها كما وقعت

وذلك لاعرف المذنب الحقيقي و اخلص ضميري من العذاب

و بارك الله فيكم

[هـــدوء]

قل منك بسنتين عزيزتي يعني مش صغير راح محسوب قدك .
يعني راجل هو ثاني و انت أنثى تحوم حوله .
ممكن تلعبي معاه و تقصري بنية سليمة
بصح هو يأولها امور أخرى .
و الله أعلم وين راح خيالو و انت دوري عليه .
هذا الاخ نفر منك و حب يبعدك عليه كما كان لازم من البداية.
ماتحوسيش عليه.ماكيش ملزمة تصادقيه و لا حتى تآخيه
إجابة على سؤالك أنت المذنبة لانك ما قادرتيش روحك و درتي حدود للتعامل معاه .
.

[nihal159]

4 سنين و أنتي ضميرك يعذّب فيك و تنتضري في الإعتذار؟؟؟؟؟؟؟؟؟ كنت أتوقّع أن الحادثة صرات لبارح.
كان لازم عليك تخبري راجلك؛ هو لي يجيبلك حقك و يعلّم خوه الأدب.
ماتعمريش راسك بواحد قليل أدب و ماعندوش أخلاق؛ كون جا يحشم و فيه ريحة لحياء مايقولش كلام فاحش لمرت خوه.

[مسرورة بحياتي]

اخ زوجك ولكن ليس اخوك ويجب ان لا تتعدى العلاقة اكثر مما يجب صحيح ان نيتك حسنة ولكن هو سيفهمها انك معجبة به وتتحرشين به ، خصوصا انكم متقاربون في السن ، فهو لن يراك بمثابة اخت له ، حذاري ان تسمحي لابليس ان يلعب براسوا ويروح تخمامو بعيد ، اجبدى روحك نهائيا ولا تنتظري لا اعتذار ولا هم يحزنون ..

[سيرين راجي]

واش يكونلك حتى تهدري معاه بلا حواجز انت درتيه خوك بصح ماهوش خوك لازم تتحجبي منوا وتعامليه كغريب ماكيش ملزمة باه تهدري هو الي لازم يطلب السماح قوليلوا سلام وخلاص واذا ماردش دبر راسوا

[محمد جديدي التبسي]

أخ زوجك يعتبر رجل اجنبي عليك لازم يشوفك غير بالحجاب
لا تنتظري منه اعتذارا ولا معنى للومك له وحسرتك كل هذه السنوات
حتى السلام من عندو مش لازم
تعلمي دينك واعرفي حدود علاقتك مع الناس..ربي يفتح عليك

[siliine]

علاقتك به مثل علاقتك باي شخص غريب عنك فانضري انت كيف تكون سواء كنت مدنبة ام هو المهم تفاديه ولا تعامليه مثل اخيك لانه ليس كدلك لمثل هدا الواجب ان تكون للزوجة بيت منفرد

[رندة.]

الحادثة عندها 4 سنين وأنتي مازال راكي تحوسي شكون المذنب؟؟
أنتي الي وصلتّي روحك لهذا الأمر، شكون قالك أخ زوجك راهو خوك!!
ما تعتذري ما تنتظري اعتذار منه وأنساي الموضوع القديم هذا نهائيا، وخلي العلاقة بيناتكم السلام عليكم وعليكم السلام هذا ماكان ماتقعدي معاه ماتحكي معاه ما تاكلي معاه.
ربي يوفقك ان شاء الله

[زبدة ذايبة]

وزوجك على دراية بهذ الحادثة أم أنه آخر من يعلم.

التعدي على حدود الله يورث المصائب يا أختاه.

أنت تقولي خويا والله عزوجل في تشريعه ينفي الأخوة بينك وبينه.

الأخوة انت اللي نسجتي حبالها وصدقتيها.

أخ زوجك أجنبي عنك.
وزيد بزيادة كاين تقارب بينكما في السن.

داخلتي معاه لدرجة أنه يقولك كلام فاحش بدون أدنى حياء أو احترام.

يداك أوكتا وفوك نفخ.

ومع هذا مازال ضميرك يؤنبك.

ومازال عندك الشك أنك ظلمتيه!!!!!!؟؟؟؟؟؟

أربع سنوات من الصراع ومن التساؤل.

من المفروض تحطي حد لنفسك.

الطيبة لاتعني الابتذال.

داس كرامتك برجليه وأنت زوجة أخوه.

وكي يشوفك يخرج.

حافظي على نفسك وكرامتك.

ماعندك حتى صلة بيه.

المعاشرة بالمعروف وبالحد الذي شرعه الله عزوجل.

ماكالاه تخلطي في النخالة.

عندك زوجك تخدميه وتهدري معاه وتقريه وتعلميه وطيبيلو وتغسليلو حوايجو وتضحكي معاه.

خوه ماعندو ماداك ليه.

ومايهمكش

يرضى مايرضاش

يزعف مايزعفش.

واحد مايحاسبك عليه.

تتحاسبي على رضى زوجك فقط.

اعتبريه وكأنه غير موجود.

مع أنك تتحملي ما حدث معك.

اللهم لا شماتة.

لكن هذي توصيك على الأمور الجاية.

أطوي صفحته. ولاتعيريه اهتماما.

حضوره كعدمه.

وماتزيديش تخلطي بدون مراعاة حدود الدين والشرع والعرف.

لأن العرف عندنا يمنع المرأة تتداخل مع أخ زوجها إلا في حدود ضيقة جدا.

[nilly]

يا صاحبة المشكلة انتي واضح طيبة جدا والتمست صدق في طرح مشكلتك عكس الاخرين يحكون مثلما يريدون لحتى يبانو مظلومية دايما

بصراحة انتي طيبة ونية وقلبك ابيض وكسرتي الحواجز بينك وبين افراد اهل زوجك بصح هما ماشي طيبين كيفك وماشي كتربيين كيفك هدا الولد لانك مديتلو الوجه ولانه شافط طيبة فصغرتي في عينه ولا يحقرك ومدرلكش قيمة فهمتي دركا شوفي الولاد صغار كي يدخلو دار اول مرة يخجلوا بصح كي الواحد يمدلهم وجه يوليو يغلبوك هدي كيما ناس الاشرار ثاني يشوفو واحد دارلهم قيمة يعفسو عليه هادي هي نصيحتي ليك كونوا طيبة فقط مع طيبين لان طيبة مايقدروهاش الاشرار دير في بالك شرير يشوف الطيب غبي ومايشوفوكش تخافي ربي بل يشوفوك غبية لدلك كوني طيبة فقط مع الطيبين وكاين شي ناس يكونو طيبين بصح كي جرحهم شخص يوليو يقولو نبدلو والمشكل كي يتبدله يتبدله مع ناس كامل حتى مع الطيبين ولدلك انتي عدلي شوي من شخصيتك وخدي درس ولكن كوني طيبة مع طيبة لانك ادا اصبحتي شريرة مع طيبين معناه انتي شريرة ولدلك هدا طفل لوكان قلتلي راجلك وقتها بصح دركا فات الوقت املا نحيه من راسك وماتهدريش معاه وديريه كي شغل ماتعرفيهش وبلاك تهدري معاه ومتفكريش فيه نهائي فهمتي واد شفتي اهل زوجك صافا با كوني حدرة معهم وقبل ماتعرفي ناس كوني حدرة حتى يبان ليك نيتهم واهتمي بنفسك وسعادتك

[بلال88]

مزاح وتدريس وكأنه أخوك!!
هذا ليس أخاك هذا أجنبي عنك تماما ولخطورته الكبيرة يقول النبي صلى الله عليه وسلم: "الحمو الموت" لأنه قريب منك وليس من محارمك. والتساهل في هذا الأمر لا شك عاقبته ستكون وخيمة.
وفي التعامل مع الرجال عموما يجب أن تتحلى المرأة بكمية كبيرة من سوء الظن ودعك من أفكار البراءة وغيرها من الأفكار الساذجة فتفكير الرجل دائما يقفز الى أبعد الحدود.
وسبحان الله كيف انقلبت الموازين!! الذنب هو ماكنت عليه قبل المقاطعة وليس بعدها فأنصحك أن تصححي نيتك واعتبيريها توبة إلى ربك.
وحتى ان عاد اليك واعتذر فاقبلي اعتذاره لكن أبقي مسافة بينك وبينه في حدود السلام وفقط.
والله الموفق

[كاميلا]

سلام اختي نعطيك نصيحة من الاخر طلعيهم من راسك اهل زوجك بكل لا نت بتهم ولا هم عائلتك راك حتا صلة الرحم متربطكش بيهم لايوجد رحم بينكم باستثناء زوجك واولادك حتا اخته مش اختك فمابالك اخ زوجك
طيب عملتي مليح كي قطعتي علاقتك بيه وستمري في هدا وجبدي روحك محبيتيش تشعليها بين الخاوة هادي تحسب ليك
هادي نتيجة من نتائج النية اللي تدخل بيها العروسة لدار اهل زوجها كي تدخل يقولولها هادي امك وهدا بابك وهادو خاوتك ومن بعد كي تمشي بنيتك تطيحي في المشاكل
شخصيا عندي اخ زوجي قل عليا ب 5 سنين نعاملو كيما خويا بحيت شابحة العقلية ميقدرش يدخاص وفي نفس الوقت معاملة حسنة ا
انا نقلك 4 سنين انساي يا حبيبتي خوه وختو وكلش افرضي الاتحترام وخلاص
من واجب الزوجة فرض احترامها من الاول مدخصيش ومتعمريش راجلك على ماليه هدا في حد داتو راكي بنت اصل اما انك مهرج جابو راجلك باش تنحيلهم على بالهم لالا الا امو او خاوتو حاكمتهم الضيقة ولهبال يروحوا يتمهبلوا بعيد عليك
ك

[nassimab82]

السلام عليكم
اسمحلي أختي نقولك الصراحة هي أنو أنتي الغالطة
أنا بيني و بين أخ زوجي غير الخير و لكن علاقتنا ماتزيد فوق السلام عليكم
كيف الحال و عمرنا إلا قعدنا مع بعضنا إلا في وجود كل العائلة
يعني زوجي و زوجته و أمه و أخته أو كل واحد منا يروح في حال سبيله
المداصرة ماهيش مليحة خصوصا مع أهل الزوج أمه و أخواته البنات فما بالك
بالاخوة الرجال
لازم ديري قدر لروحك و حدود ما تسمحي لحتى واحد يتخطاها و لو كانت
أمه أو أبوه أو أخت زوجك ، هما ماراهمش لا أمك و لا أبوك و لا اختك انتي
و ماتقوليش يحبوني كي بنتهم لانك مراكيش بنتهم
العلاقة لازم تكون في حدود الاحترام و الواجب فقط يعني ديري واجك اتجاهم
و ما تحوسيش حاجة أخرى عند راجلك تهدري و تضحكي معاه
و أخوه ما تهدري معاه ما تحوسي عليه سواء اعتذر أم لا

[oum imane83]

الحمو هو الموت ...اخ الزوج اجنبي ولازم وضع حدود للتعامل مند البداية ..فهو ليس بالاخ للممزاحته والقسرة معاه ...

هو بمثتبة الاخ يعنب بكون الاقدر والاحترام سلام سلام وخلاص وميجب خاصة تجنب الخلوة ..

[redeye]

أنت الخاطئة اختي
اتقي الله في زوجك واعرفي ان لك في التعامل مع الرجال الاجانب عليك حدودا علبك احترامها حتى لا يصبح الأمر خيانة