قراتان البطاطا بالسلق والمرقاز ... روووووعة للسخافين

[إلهام07]

البسملة1

هذي المرة صح رايحة نرجع "مدام بطاطا " من كثرة وصفات البطاطا اللي حطيت واللي مازال ماحطيتش ، بصح أشفاو راكم انتوما اللي طلبتوهم ماتحصلوهاش فيا


قلت نكتب الموضوع قبل مايقطعو النت علينا ... أما وصفة الغاتاتوي إن شاء الله هي الوصفة الموالية مافهمتش علاه كاين طلب كبيرعليها هي ووصفة المقرونة حيرتوني مع انها وصفات صيفية خفيفة وشهية بصح ماشي وقتها في رمضان
واقيلا رمضان راهو غالبكم

المقادير ( اليوم دوخو ) :
- بطاطا حسب افراد الأسرة انا استعملت حوالي كيلو
- ربطة كبيرة سلق وإذا صغيرة ديري زوج
- حبة بصل متوسطة
- سنينات ثوم وكثري لاخاطر السلق واللحم المفروم يحبو الثوم
- مرقاز او ممكن تعوضيه بلحم مفروم ( الكمية انت ومقدورك )
- التوابل : ملح ، فلفل أسود ، فلفل احمر ، ثوم بودرة ، كمون
- أجبان انت والموجود عندك انا استعملت شوية : كامومبير ، جبن أبيض ، جبن مبشور
- ملعقة كبيرة مايونيز + زوج ملاعق كرام فراش + شوية هريسة حسب الذوق
- بيشاميل وخليها شوية جارية ( زوج مغارف زبدة وزوج مغارف فرينة وثلاث كيسان حليب وملح وفلفل اسود وشوية ثوم بودرة للبنة انا نزيد فيها شوية كرام فراش باش ماتنشفش من بعد كي يبرد الغراتان )

الطريقة :
- نقلي البطاطا ونقطرها مليح من الزيت بالورق الماص لأنو المرقاز مزيت باش نتفادى الدهون الزائدة .
- في مقلاة نحط زوج مغارف زبدة وشوية زيت ونقلي البصل المقطع حتى يذبل مليح مليح ثم نضيف السلق المقطع اخضر ماتفوروهش مايجيش بنين كي يتقلي في الزبدة يجي بنين وخاصة من بعد كي تضيفو الثوم والتوابل يجي ممممممم وتروح منو ريحة الحشيش
- قليو مليح السلق حتان ينشف من الماء ويبدى يلصق في المقلاة تعرفو تقلى مليح ، هنا زيدولو الثوم مقطع واللحم والملح والتوابل المذكورة كامل وكثرو شوية توابل باش يجي بنين لأنه التوابل راهي للسلق واللحم
- إذا كان رايحين ديروها بالمرقاز كيما أنا ماطيبوش المرقاز خليوه نيء من بعد نحطو قطع فوق البطاطا والسلق يطلق الصوص نتاعو يجي بنين خير من يطيب مرتين ينشف وتروح البنة نتاعو في المقلاة .
- اللي رايحين يديرو لحم كثرو شوية كمون وفلفل احمر وثوم يجيكم طعم المرقاز في اللحم نتاعكم
- نزيد نقلي شوية وماتنشفوش اللحم يعني قليو شوية برك وطفيو على النار راهو يزيد يطيب في الفرن .
- بعد مانطفي النار نضيف الكرام فراش والمايونيز والهريسة ونخلط مليح ونخليها جانبا ( اللي ماعندوش ممكن مايحطش بصح إضافتها تزيد في البنة والكريمية نتاع القراتان )
- في صينية الفرن : نحط البطاطا ومن فوقها السلق ومن فوقها المرقاز وقطع من الجبن ( انا حطيت جبن أبيض وكريمة كامومبير )
- نصب فوقها كمية وفيرة نتاع بيشاميل وكيما وصيتكم خليوها شوية جارية
- نزيد فوقها جبن مبشور وندخلها للفرن ماتديش وقت طويل
اترككم مع الصور :








شوفو من داخل كيفاش كريمية وماشي ناشفة ........ من اروع الاطباق يعجب كل أفراد أسرتي ويقضيو عليه في ظرف قياسي

صدقوني راهي من أروع مايكون بنينة وكريمية ماجيش ناشفة وبنة السلق مع المرقاز أو اللحم والجبن روووووووعة وتحمر الوجه قدام الضياف راهي بنة لاتقاوم وحتى اللي مايحبش السلق تعجبو لانو السلق كي يتقلى مليح في الزبدة تروح منو هذاك الطعم نتاع الحشيش
درتها زوج مرات مرة يالمرقاز ومرة باللحم لحسو الصحون
في الأخير نقوللكم جربوها وإذا ماجربتوهاش انتوما الخاسرين خخخخخخخ
ماتحسبونيش ناس ملاح نونونونونو حطيت الوصفة في رمضان خصيصا باش ندي دعاوي الخير

تحياتي .................. لهلووووووووبة

[ام اياد]

بارك الله فيك لهلوبة و ان شاء الله يرزقك ربي بولد الحلال قولي امين

[فريال88]

واو تشهي لهومة ربي يعطيك حسب نيتك ان شاء الله يارب

[ام خالد اسلام]

امممممممممم شهيتينا الهام توحشنا اطباقك وخفة دمك

[zouboda]

بالتوفيق ان شاء الله

[أم شيماءْ]

امممممممممممممممممممممممممممممم تسيلم اديك يا مبدعة

[فايزة1207]

ربي يفرحك الهام ويجيبلك ولد الحلال ما شاء الله عليك

[ام اياد 2013]

يعطيك الصحة لهلوبة الزيتة وصفاتك روعة بارك الله فيك اختي

[Jona♥dz]

امممممممم روعة روووعـــــة

يعطيك الف صحة خيتي الهام ربي يجازيك كل خييييير ،،


حنونة ماعليش تميديلي وصفة قطايف عصافيري لي درتيهم ؟؟؟

صحآآآ فطووركـ

[ام حسا الدين]

ربي يعطيك ولد لحلال ان شاء الله
ويحفضلك كل عزيز وغالي

[fatalim]

طبق روعة خصوصا للحوامل بارك الله فيك

[حياتي كلها امل]

يعطيك الصحة الهام وربي يحققلك كل الي تتمنايه وربي يحفظك من كل سوء ويحفظلك كل عزيز وغالي .

[Doudina]

Rabi yahafdak w yeb3atlek Walid el hlal. Merci beacoup y'a lahoma. Llokan tzidilna wasafat makrout el kares
w sable ta3 kares.

[om mouez]

ممممم شهيتيني الله يبارك باينة بنينة نموت على كل حاجة فيها السلق ربي يجازيك كل خير ويعطيك ماتتمني حنونة

[أمّ عبد الله]

جزاك الله خيرا أختي إلهام

توحشناك وتوحشنا أطباقك ,,, فِي ميزان حسناتك