السلام عليكم
واش راكم غزالات المنتدى ان شاء الله راكم باحسن حال
حبيت نحط الوصفة هاذي مليحة خصوصا نحنا في الشتاء و الواحد منا يحتاج اكلة سخونة تدفيه
المهم هذه فكرة امي الغالية ادعولها يا لغزلات تشفى و تصير تمشي بلا ألم
المهم و بدون اطالة
العجينة كل وحدة و طريقتها هي خبز الدار عادي لكن نحنا ما نكثروش فيها الزيت و انا نستعمل محسن الخبز معاها
نجهز العجينة و حسب افراد العائلة كل وحدة تعرف واش تحتاج نعجنوها و نتركوها تتخمر
نحضر الحشو انا قليت البطاطا مقطعة رقيقة باش نختصر الوقت قسمت الفلفل على زوج و حطيته فوقها باش يتقلى يذبل فقط ساهل طيابه ثم صفيته من الزيت هو و البطاطا و قطعته
و حطيت البصلة تتقلى وحدها تكون مقطعة تذبل شوية اضفت ليها شوية ماء و تركتها تنضج في عقلها و لما دخلها الطياب اضفت ليها شوية ثوم و هريسة الي ما تحبش الحار تستغني عنها و خليتها تكمل طيابها
على فكرة ملحوا كل شي على حدى لكن كونوا حذرين باش لما يتخلطوا ما يجيش الخليط مالح شط بط يقتل القط هههههههههه
و حطيت السجق اي المرقاز بعدما نزعت عنه هاديك الغطاء تاعه باش يصير كما اللحم المكفت قليتو مع الثوم و بهارات و و هريسة نحنا نحبوا الحار بزاف
بعدما تقلى مليح و طاب قليت بشكل خفيف حبة طماطم كنت قطعتها دوائر ثم اخلطت كل المقادير مع بعضها بصراحة الهريسة الي عندي ماشي حارة
استعنت بفلفل مخلل عندي حار
و اضفت لهم مغرف للنكهة من حشو بقالي من المحجوبة خدمته بالسلق و الجزر و البصل و البهارات و الشحمة و المرقاز
ممكن تضيفي الجبن اختياري
و بعدها نقرص العجينة و نخليها ترتاح شوية و نحلها ماشي غليظة و ماشي رقيقة نفرش الدائرة الاولى في البلاء و ندهنها بالحشو و نحط فوقها الثانية و نغلقها و نعمل ثقب في الوسط باش نتجنب انتفاخها اثناء نضجها في الفور
نخليها تتخمر ثم ندهنها بالبيض مخلط مع شوية خل لتفادي رائحة البض المزعجة ممكن ننثر عليها سانوج او جلجلان هذا اختياري انا ما رشيت عليها والو كنت مزروبة
المهم حطيها تنضج في الفور و بصحتكم
( تقرير عن مشاركة سيئة )، و الموجودة أسفل كل مشاركة .
2014-12-13, 22:08
خبر الدار محشي ابتكار امي الغالية
العرض المتطور
