شاركونا ... جازاكم الله خيرا

[زينب 83]

انا حليت هذا الموضوع باقتراح من الأخت ام اروى وان شاء الله يلقى صدا عندكم ، وتشاركونا

ان شاء الله كل اخت عندها و صفة صحية او بديل صحي لشيء مضر تشاركنا بيها و نحاولو نطبقوها و الناجحة منها نجمعو ها وهكذا يكون عندنا اكبر عدد من الوصفات و نحاولو نعدلو في أسلوب حياتنا و نحافظو على صحتنا و يكون الأكل الصحي هو الأصل و الباقي نخلوه ساعة على ساعة
يا رب تسمعو هذا النداء و تشاركونا ،و الله هدفي هو التقليل و لو قليلا من نسب الأمراض اللي تصيبنا كل يوم نتيجة إهمالها لصحتنا

نعم للتقليل من المقالي ، لا للمواد الحافظة ، لا للملونات الاصطناعية ، التقليل من اللحوم و خاصة الحمراء ، التقليل من الدهون ، ادخال الخضر و الفواكه في وصفاتنا، محاولة التقليل من السكر ...........

اعلم انه ممكن يكون صعب في البداية لكن نحاولو نعمرو الكأس قطرة قطرة حتى ننجحو ان شاء الله

شوفو أخواتي انا مانكذبش عليكم و نقولكم راني نأكل صحي 100/ لكن نحاول يكون اغلب الأكل صحي مثلا لا اشتري المشروبات الغازية ، و لا العصير الاصطناعي ، ما نشريش المعلبات و التونة نشري لي معلبة في الماء ، نحاول نشري الدجاج العضوي و كي مانلقاش نشري العادي لكن نأكل غير الصدر و الأفخاذ و ننزع الجلد ، اكثر من الأسماك كي تكون الماديات مليحة ، نقلل من اللحوم الحمراء و اللحم المفروم نرحيه في المنزل و بلا شحمه ، ما نستعملش الشحوم أبدا ، ما نقليش أبدا ، كلشي مشوي او في الفرن ولا مرقة ، ما نستعملش الملونات .
الحلويات و الطورطات و ووووووو.، نديرهم مرة في الأسبوع فقط وباقي الأسبوع نحاول ندير بريوش بلا زيت او مسكوتة ناقصة زيت او خبز الدار ، نحاول ندخل القمح الكامل و النخاله في مخبوزاتي ، نحاول نشري الحليب بدون دسم او ناقص و الاجبان كيفكيف ، العجاءن نديرها يوم الجمعة وباقي الأيام نحاول نكثر الخضار البقول . ........وهكذا يعني مرة على مرة نخلط شوي لكن ماشي دائماً ، ولادي في مكان الحلوى نحاول نعطيهم مكسرات و لا تمر حسب الموجود ......


راني تكلمت بزاف الان قد جاء دوركم إليكم الكلمة


أرجو تثبيت الموضوع باه يستفاد منو اكبر عدد ممكن من الاخوات

[أم أروى]

السلام عليكم ورحمة الله وبركاته
بارك الله فيك اختي زينب لفتح الموضوع

[أم أروى]

كما قلت نعم للخضر نعم للحبوب الكاملة نعم للفواكه
نقلل من اللحوم ونعوضها بالبروتين النباتي
اما الحليب ومشتقاته هناك دراسات جديدة تنفي ان الحليب هو المصدر الوحيد للكالسيوم
ووجدوا ان الكالسيوم موجود في كل الخضر والفواكه لذا سنصحح معلوماتنا و باذن الله سنحيا حياة صحية طيبة

[أم أروى]

رانا نشوفو ونسمعوا الاغلبية تحب الحلو من سكريات و كيكات
نقوللكم كولوا ثلاثة او خمس حبات زيتون أخضر وراح يقلل عندكم شراهة اكل الحلويات

[زينب 83]

شكرًا ام اروى و الله راكي مكسب لينا ربي يحفظك ان شاء و يدوم عليك الصحة

[أم أروى]

المشاركة الأصلية كتبت بواسطة زينب 83

شكرًا ام اروى و الله راكي مكسب لينا ربي يحفظك ان شاء و يدوم عليك الصحة

العفو اخيتي
سأضع كل ما أستطيع ان افيد به و إن شاء الله سأستفيد أيضا معكم
ربي يحفظك زينب
ننتظر اثراء الموضوع من الاخوات ومنك انت ايضا

[زينب 83]

ان شاء الله اختي تصبحين على خير

[~أمة الله~]

السلام عليكم ورحمة الله وبركاته
جزاكما الله خيرا أختاي زينب وأم أروى ، رانا نستفادو معاكم
مُتابعة للموضوع ...

[tokio hotel]

سلام اختى حتى انا كما انت اى حاجة مصنعة مضرة نحاول على قدر الامكان ناكل الصحى كنت نتبع مريم نور و الدكتورة نسب الربيع و لينا حتى هادو كانو يمدو وصفات صحية و بدائل وكنت نكتبهم و عندى كتب فى هاد المجال لكن عندنا مكاش امكانيات
المعجنات نشرى انتاع القمح الكامل رجعت تتباع هى و الشوفان ندير كسرة الشعير و نحاول نقص من الخبز
المارغرين من اخطر الاشياء على صحتنا حلوياتى اغلبها بالزيت العصائر و المشروبات الغغازية ممنوعة ما تدخلش بيتى ابدا
الزيت ماهوش خطير على الصحة مشكلتو فى السعرات الحرارية و اكيد ياخد بكمية معقولة الخطير الدهون المهدرجة الموجودة فى المارغرين و الشكولا
نستعمل زيت الزيتون بزاف كل عام نشرى 20 لتر كى نتفكر معلومات جديدة نحطهالكم عندى بزاف لازم نبحث عليهم

[لميس اميرة]

المشاركة الأصلية كتبت بواسطة tokio hotel

سلام اختى حتى انا كما انت اى حاجة مصنعة مضرة نحاول على قدر الامكان ناكل الصحى كنت نتبع مريم نور و الدكتورة نسب الربيع و لينا حتى هادو كانو يمدو وصفات صحية و بدائل وكنت نكتبهم و عندى كتب فى هاد المجال لكن عندنا مكاش امكانيات
المعجنات نشرى انتاع القمح الكامل رجعت تتباع هى و الشوفان ندير كسرة الشعير و نحاول نقص من الخبز
المارغرين من اخطر الاشياء على صحتنا حلوياتى اغلبها بالزيت العصائر و المشروبات الغغازية ممنوعة ما تدخلش بيتى ابدا
الزيت ماهوش خطير على الصحة مشكلتو فى السعرات الحرارية و اكيد ياخد بكمية معقولة الخطير الدهون المهدرجة الموجودة فى المارغرين و الشكولا
نستعمل زيت الزيتون بزاف كل عام نشرى 20 لتر كى نتفكر معلومات جديدة نحطهالكم عندى بزاف لازم نبحث عليهم

اختي الزيت الوقت هادا من اخطر ما يكون و صدقيني اخي عمل رسالة تخرجو في مصنع للزوت قالي لوكان تشوفو الزيت من واش يصنعوه و واش يزيدولو و الاواني لي يخدموها فيه ما عادش تاكلوه

و اقراي عليه مليح الزيت قبل ما يوصل عندنا يمر على درجات حرارة عالية جدا تخليه مضر و من اهم المواد المسرطنة

احسن و اظمن زيت هو زيت الزيتون المعصور بطريقة جدودنا

[tokio hotel]

ام اروى من بكرى معروف بلى لحليب ما فيش هاديك الكمية الهايلة من الكالسيوم وزيد الجسم ما يمتصهاش كاملة
ملعقة كبيرة جلجلان كل يوم تاخد كفايتك من الكالسيوم لهاك اليوم الجلجلان الكامل يعنى الى بالقشرة

[ام محمد و ملاك]

عصير الطماطم يتفوق على مشروبات الطاقة في مساعدة الجسم على الانتعاش بعد ممارسة النشاط الرياضي.
وفسّر الباحثون ذلك باحتواء عصير الطماطم على مواد كيميائية أساسية تساعد العضلات على الانتعاش، وتعيد معدلات الغلوكوز في الدم إلى مستواها الطبيعي بعد التمدّد والإجهاد.

وتحتوي الطماطم على مضادات أكسدة، بالإضافة إلى مركب الليكوبين الذي يعطيها لونها الأحمر وينتمي لعائلة الكاروتينات، وتضطلع هذه المواد بدور مهم في الوقاية من أمراض القلب والسرطان.

[tokio hotel]

اختى سارة نزيدك معلومة على الصماطم فائدتها تكون احسن عندما تتعرض للحرارة كى تشويها شوية ماشى كما نطيبوها احنا ههه

[ام محمد و ملاك]

المشاركة الأصلية كتبت بواسطة tokio hotel

اختى سارة نزيدك معلومة على الصماطم فائدتها تكون احسن عندما تتعرض للحرارة كى تشويها شوية ماشى كما نطيبوها احنا ههه

عندك الحق اختى هل تعلمين ما ينقصنا فعلا هو الثقافة العذائية انا ديمال نقول والدينا بكري ما علموناش الله غالب التكنولوجيا ما كانتش متطورة كيما درك بالاضافة الى الابحاث العلمية لكن حنا اليوم رانا قاريين و متعلمين و مثقفين و الامكانيات كلهاا متوفرة لازم ربيو ولادنا على هدذا الثقافة

[tokio hotel]

اختى جدودنا كانو ما قاريينش لكن بالفطرة يعرفو واش ينفعهم وا ش يضرهم و احنا رغم التقدم العلمى الى وصلنا ليه راكى تشوفى الامراض الخطيرة الى انتشرت و خاصة عندنا فى الجزاير