*مقروط البليدة *من مطبخ ام آية

[islam1aya]

سلام غالياتي
عواشركم مباركة ربي يتقبل منا ومنكم صالح الاعمال
كل منقطة في الجزائر الحبيبة تشتهر بنوع مقروط معين وكلهم روعة خاصة مقروط الشرق ومقروط قسنطينة
جبتلكم وصفة تع مقروط تشتهر بيه مدينتي ومسقط راسي مدينة البليدة مدينة الورود المشهورة بالحلويات التقليدية
الزمان كانو يديروه على شكل خبزة كما نديرو لبراج ويعمروه باللوز ويجي عالي ويدروه تديه لعروسة في المحبس تع النحاس يسربوه في الصباح تع لعروسة
نخليكم مع المقادير
راه ناجح 100في 100
كيلو سميد متوسط استعملت مولا وتقدري ادير سيم متوسط
2كيلو سميد خشين استعملت مولا الي في الصورة راه هايل هذه الايام برك شوية اسمر ههه
كيلة ليدام 3ارباع الكيلة سمن وربع الكيلة البقية نكملوها بالزيت
كيلة تع ماء ماء الزهر مخلوطين وزيدي عليهم نصف قارورة اكستري الماء الزهر راني صورتو
ملعقة صغيرة ملح لازم الملح هذا من اسرار النجاح تع المقروط خلطيه الملح مع الماء والماء الزهر





طريقة التحضير
نخلط السميد مع بعضو

نكيل 3كيلات تع سميد انا كيلت بهذه الغرفية

هنا كيلة سمن 3ارباع الكيلة

هنا كملت ربع الكيلة الي بقات بالزيت
تبعو معايا اوكي

نبسوه مليحنغطيه ونخليه يبات ليلة كاملة

نبلوه بالكيلة تع الماء +ماء الزهر +الملح +اكستري الماء الزهر
نخلط غير بالاصابع بسرعة بلاكو تعجنوه غير بالاصابع
شوفوه جاري شوية مايخلعكمش بعد بضعة دقائق يشرب كيلتو تع الماء ونلموه

الحشوة تحبو تع اللوز او الكاوكاو او تع التمر
انا درتهم لثنين
اذا درت الي بالللوز او الكاوكاو ديرو 4كيلا مكسرات بكيلة سكر عادي وزيدو قرفة وفتلوه غير بشوية ماء الزهر

وحشوة التمر درولو شوية قرفة ماتكثروش +شوية زيت وخدموه مليح

انجو للتشكيل
نعمل حربوش نحشيه ونصاوبوه
بع ماننصاوبوه يكون هكذا لازم نقرصو بزوج اصابع كما الصورة حتى نرقوه ونعلوه مليح


نطبعوه

ثم ب2الايادي نطلعوه مليح ونطلع الجوانب الي راهم خارجين
لازم نطلعوه مليح


نقطعوه

ونصاوبو الحبات كما نصاوبو مقروطاللوز لازم نطلعو الحواف نلوزوه فوق الطاولة
نرصوه في السنيوة تع البقلاوة تكون ثقيلة ولازم نقبلو الحبات من جيهة الحشوة باش ماتتحقرناش الحشوة في الطياب وندينوهم الحبات لبعضاهم في السنية نخلي غير فراغ صغير قيس ماتتنفخ الحبة
ندخلوه يطيب في الكوشة على نار عالية في الرف الفوقاني كامل
وكل مرة دورة السنيوة

غير يحكم روحو ويبدا يحمار شوية برك طفولو من التحت وهبطوه للاسفل واشعلولو من الفوق وخلوه يزيد يطيب في غرضو ماتحمروهش بزاف
فور خروجه من الكوشة نعسلوه لنصف الحبة في سنيوة ونخلوه يبات نهار يومين 3ايام في عسلو امممم

شوفو حدو تع العسل
بالنسبة للعسل انا نخدمو في البيت اجي روووووعة
الطريقة 2كيلو سكر
في قدر غامق نحط اربع ملاعق سكر في القدر من 2كيلو سكر اتعنا نكرملوهم في اقدر مع التحريك المستمر بلاكو تحرقوه يولكي كرامال بني غامق
ثم نفرغ عليه حوالي رتل ماء ونحرك حتى يذوب الكرامال
ثم نظيف السكر الباقي ونخلط بالملعقة الخشبة يغلي 5دقائق ونظيف ملعقة ونصف صغيرة تع شب مطحون ونخلط شوية ونطفي
عليه ونظيف عليه اكستري تع العسل
2كيلو سكر اعملي 2كيلو عسل عمرلي قرعة تع 2لتر تع عسل وذقه هايل خير من الي يباع اجي قارص
كنجي نعسل المقروط نحط الكمية تع العسل في كسرونة ونديرلها شوية ماء الزهر ندفيه غير شوية ونعسل بيه


شوفو كيفاش يشرب عسلو ويطرا في عسلووووووووو بزاف بزااااف


تقدرو ترشقوه بحبة لوز او فصة ارجونتي متوسطة الحجم
نقدموه في حاويات ذهبييين
وبصحتكم

اكستري تع الماء الزهر

حبيت تشاركوني الفرحة تع اية اليوم دارو في المسجد حفلة توزيع الجوائز لحفظة كتاب الله وحفظت
سورة العلق وسورة العاديات وهاهي فرحة بهديتها
ربي يحفظ اولادنا واولاد المسلمييين وربي يرحم اطفال وشهداء غزة

ان شاء الله اجربو المقروط البليدي وينال اعجابكم اكييييييييييييد لانه رائع
ملاحظة بنات كجوتنحوه من السنيوة باش مايتكسرش حطو شوية السنيوة فوق نار هادئة فقط قيس ماتذوب شوية العسيلة لانها تكون شوية حاكمة روحها
ترقبو ا حلوة الخوخ وحلوة الاميرة في الغد ان شاء الله
ماتنساونيش بدعاوتكن يا غاليات اتعبت في الموضوع وراني خليت حلوياتي واشغالي وحطيتهولكم الي ماتردش وتدعيلي نعضها هههه
مع تحيات اختكم ام اسلام اية ويوسف

[أمل عربية]

الله الله يعطيك الصحة يا الحنونة

[أم ماجد]

خفت من العضان جيت نجري
والله عن جد روعة وعملك متقون وتخدمي بنيتك ربي يفرحك باية واسلام ويجعلهم من البررة

والعسل رائع مليح كي اضفت لوصفة

[بشرى2008]

يعطيك الصحة
صح هاداك العسل يجي رووووووووووووووعة نفس طريقتي فى العسل

[jojo dj]

يعطيك الصحة صحا عيدك

[مرام 1987]

انممممممم جابتني ريحة المقروض نجريي يميييييي يشهي ومعسل كيما يحب الخاطر

[رتيـل]

هااااااايل

بارك الله فيك

[عاشقة الوردة]

اممممممممممممم يعطيك الصحة مقروط وعليه الكلام

[jana ns]

يعطيك الصحة جاك هايل

[ام الهضاب]

اممممم راه يبان يهببببل يعطيك الصحة انت و بنتك و ان شاء الله تشوفيها في اعلى المراتب

[fadoula fcb]

كلمت شكرا قليله علي مجهودك معانا وتعبك ربي يجازيك خير ورانا نتعلمو منك وراه عندك اجر من كل وحدا متعرفش وتدي وصفه من عندك احبك في الله حبيبتي وربي يخليك لينا ويحققلك واش تتمناي في هذي الدنيا ويفرحك بولادك يارب شكرا شكرا شكرا

[yuuke-chan]

عجبتني طريقتك في العسل اخر خسارة درت خلاص المقرود ان شاء الله نجربها المرة الجاية
بارك الله فيك
ربي يخليلك الكتكوتة فرحة و تكمل تحفظ القران كامل ان شاء الله

[أم ملك]

بارك الله فيك و أعتق رقبتك و أحبابك من النار يا رب

[**وحدها غريبة **]

روعة يعطيك. الصحة ام أية
ومبروك لأية الجائزة ربي يبارك فيها والعاقبة لجائزة حفظ المصحف الشريف كامل
ربي يحفظها ويسترها يا رب

[ادرة مكنونة]

صحيتي باين ايجي هايل ربي يخليلك اولادك ويحفضلك اية ويوفقها لحفض كتاب الله