بطاطا بلاكرام فراش رووووووووووووعة للضياف

[إلهام07]

البسملة1

بطاطا بالكرام فراش

صباح الخير والهناء حبيباتي .... على بالي طولت عليكم بالوصفات .... آسفة .....

نبداو بأول وصفة طلبتوها بزاف وهي البطاطا بالكرام فراش ... صدقوني تحفة في الطعم والبنة هايلة وأكيد تحمر الوجه قدام الضياف وتعجب كل الأذواق .

هذي الوصفة جات في بالي بعد ماجربت وصفة شفلور ام محمد تاج ... يعني بصراحة الفكرة مسروقة من عندها ههههه عادي راني وليت مشهورة بالسرقة ... قلت نحط الوصفة من ضرك ياربي تصفى النفوس قبل رمضان

أول مرة درتها جاونا ضياف ، درت يومها كمية كبيرة وماكنتش متخيلة رايحة جي بنينة هكذا .... صدقوني لحسوا الصحون بالمعنى الحرفي للكلمة لأنو الصوص بنينة بزاف خاصة أنو يومها كثرت فيها الجبن ودرت صدر دجاجة كبيرة كامل جات رووووووعة فعلا ..... ربي يخليلنا الشاف ام محمد تاج وأفكارها اللهلوبية هههههه .

بالنسبة ليا هذي الوصفة ضميتها مع الوصفات المختارة للقراتان والبطاطا في المجلد نتاعي كطبق جديد وبنين وخفيف يحمر الوجه قدام أي ضياف وخاصة جاينا رمضان وتكثر فيه العرضات ... وأهم حاجة ساهل ومايأخذش وقت طويل في التحضير وطبعا درتها وعاودتها عدة مرات وأكيد كي يجيونا الضياف نحب نحمر وجهي بهذي الوصفة اللذيذة.

نبدأ على بركة الله مع المقادير :

* حوالي 1 كغ بطاطا مقشرة ومغسولة ومنقية ومقطعة شرائح

* قطعة اسكالوب = نصف صدر دجاجة ... مقطعة إلى شرائح ثم إلى قطع متوسطة الحجم

* 1 بصلة كبيرة مقطعة شرائح

* 4 فصوص ثوم مقطعة شرائح

* علبة كرام فراش

* 1 مكعب مرق دجاج

* جبن مبشور أي نوع

* التوابل : ملح ، فلفل أسود ، ثوم بودرة ، 2 أوراق رند

الطريقة :

1- نحط في مقلاة كبيرة حوالي 4 ملاعق زيت + ملعقة صغيرة زبدة وبمجرد ما يسخنو نضيف البصلة ونقلي حتى تبدأ تأخذ اللون الذهبي.

2- نضيف الاسكالوب والثوم ونقلي لدقائق حتى يتحول لون الدجاج من الوردي إلى الأبيض

3- نضيف الملح والتوابل وننتبه أنو مانكثرش الملح لأنو الجبن مالح.... نقلي حتى يكتسب الدجاج اللون الذهبي.

4- نضيف أوراق الرند ونمرق بحوالي 3 كيسان كبار من الماء مع إضافة مكعب مرق الدجاج مفتت ونتركه يغلي على نار متوسطة حوالي 5د .

5- لمن تريد مرق ثقيل ممكن إضافة ½ ملعقة كبيرة من الفرينة تذوبها في القليل من الماء البارد وتضيفها للمرق وتحرك جيدا... ونخليها تغلي فقط 5د أخرى .

6- ثم نضيف الكرام فراش وكمية مليحة من الجبن المبشور....هنا لك حرية الاختيار في نوع الجبن اللي تحبي ، انا استعملت تشكيلة أجبان كما في الصورة : جبن قرييار وشيدار رابيتهم وقطعة كامومبار قطعتها قطع صغيرة ... أضفت كل هذه الاجبان للمرق ونحرك جيدا... نخليها تغلي 5د أخرى فقط ونذوق الملح إذا محتاجة نزيد شوية ثم نطفي النار وراهي واجدة الصوص .

7- في وعاء الفرن نصفف البطاطا المقلية ( البطاطا أنا نقليها في نفس الوقت مع تحضير الصوص وتوجد قبل الصوص لأنها ماتاخذش وقت طويل وهكذا نربح الوقت ). ونرش البطاطا برشة خفيفة فقط . من الملح

* ملاحظة : البطاطا أنا نقليها بلون ذهبي مالازمش تتحمر وإلا رايحة تتحرق في الفرن.

8- نفرغ الصوص فوق البطاطا ونوزعها مليح ونرشها بشوية معدنوس مقطع وندخلها للفرن المسخن مسبقا ( باش نربح الوقت ) في الرف السفلي .

مدة الطهي : فقط نخليها تغلي في الفرن لمدة 10-15د ونطفي لأنو كلش راهو طايب ... مالازمش نخليها طول رايحة تنشف من بعد.

هنا كي خرجتها من الفرن سخووووووووونة ...تبان فيها مرق بزاف لكن صدقوني رايحة تتشرب هذاك المرق كامل كيما تعرفو البطاطا في القراتان تشرب المرق .

9- يقدم مع رشة زكية من المعدنوس

يامامي على البنة مممممممممم انا ناكلها بيديا لا فرشيطة لا مغرفة ... هههههه

هذي الوصفة راهي بنينة بزاف بزاف بزاف .... رووووووووعة ..... اللي ماجربتهاش راهي راحت عليها هههههههه

تحياتي ................ لهومة

[oum kamel]

شكرا على لوصفة جعلها ألله في ميزان حسناتك

[malek nour hane]

salaaaaaaaam lahouma habouba....wallah lgaitek hatiti mawdhou3 dkhollt najri hhhhh bla mana9rah...bayan raw3a na9ra w narja3 nradlek...had lyamatkamal wana n3as w necena f roz... w lbatata hadi.ammmwwwaaaaaaaaaahhh

[ام طيري الجنة]

كالعادة متميزة و اطباقك متميزة و رااااااااااااااائعة بارك الله فيك

[om asma]

شكرا على الوصفة الرائعة والبسيطة

[ladymillion]

ياااااااااااااااااااي يامامي تهبل هههههههههههههه يعطيك الصحة لهلوووووووووووووووووووووبة
بارك الله فيك على الوصفات الرائعة والسهلة في نفس الوقت

[selma2013]

ربي يخليك الهام على الوصفة هذا شحال ملي شريت لاكرام فراش وبقيت نستنى فالوصفة راكي غبتي علينا بزاف غير الخير ان شاء الله

[iaman.fr]

بارك الله فيك

[محبة المطر]

شهيتينــــــــــــــــــــــا ان شاء الله نجربها جزاك الله خيرااااااااااا

[sidali 2007]

اممممممممممم لهلوبة علي سلامتك يعطيك الصحة وربي يخليك لوالديك ولينا هههههههه
حق راني جربت بطاطا سوتي امممممممم رووووعة معنديش برك باش نصور ههههه

[ساندي 28]

لهلوبتى الزينه توحشتك بزززززززززززززززافا ااااااااا والقارتان تهبل اممممممممم عندي كل شيء الا كتب ربى للمساء او للغد منزيدش بعدهم هههههه
مووووووووووووووووووووووووووووووووووووووووووووووواح حتى ترجعى لينا نصبحو على كلامك الحلو

[ام رشدى]

يعطيك اللللللللف صحة اكيييييييييد انجربها

[هند11]

اممممممممم تهبل
هذا مايليق في الصيف باينة بنينة خاصة من يديك ننتضرو منك غير الجديد

[مرام 1987]

امممممممم يا ماميييييي ما لقيت ما نقول حليت فمي وقعدت ههههههه تشهي بصراحة هذا وين تغديت وزدت جعت كي شفت هذا الفن واااااااو يعطيك الصحة وربي يبارك فيك
نمدها لأختي ونوسوسلها في وذنيها باه تجربها امممممممم
اللهم بلغنا رمضان لا فاقدين ولا مفقودين

[khaled Géant]

ربي يخليك لينا يا الهام....شكرا...شكرا....