مربى الليمون الهندي confiture de pamplemousse

[الواثقة بالله 23]

السلام عليكم أحبتي،

الليمون الهندي عندو فوائد لا تحصى و لا تعد لكن للأسف نادرا ما نتناوله يمكن لأنو طعمو قوي أو مش موجودة وصفاتوا في ثقافتنا الغذائية، ممكن نستعملوه كعصير أو مربى في الكيك عن نفسي بديت بالمربى و رح نحاول نستفيد منو كل مرة بطريقة زي. بحثت مطولا في النت على مربى البمبلوموس و لم أجد وصفة تقنعني باللغتين العربية و الفرنسية، وليت رجعت لكتاب قديم موجود في أغلب البيوت الجزائرية la cuisine algérienne جربت منو هذه الوصفة عملت كمية قليلة فقط لأنو أول مرة نعملها و كي خرجت نتيجة مرضية حبيت نشاركم بها.

الوصفة:
ابرشي حبات البمبلوموس حتى تتخلصي من القشرة نهائيا و يبقى فقط اللحاء الأبيض (أنا احتفظت بالبشور رح نعطر بها كيك)

حطي الحبات في وعاء و غطيهم بالماء
خليهم في الماء 48 ساعة (يومين) و بدلي الماء عدة مرات (من 10 إلى 15 مرة) الهدف من هذه العملية هو التخلص من الطعم المر و الحاد للبمبلوموس
حطيهم في طنجرة ثقيلة و غطيهم بالماء و خليه يغلي على النار حوالي ربع ساعة، عاودي ماء جديد و خليهم يغليو مرة ثانية
قطعي الحبات إلى مربعات، ثم حطيهم في صفاية كبيرة أو كسكاس و خليهم يقطروا من 5 إلى 6 ساعات، اعصري بالخف كل حبة باه يسيح شوية العصير (لي يحب عصير البمبلوموس ممكن يخلط ماء و سكر مع هذا نتحصلوا على عصير )

اوزني البمبلوموس
صبي الماء في الطنجرة ثم صبي السكر (وزن السكر يعادل وزن البمبلوموس لي وزنتيه بعد ما عصرتي الماء أو بالتقريب مثل ما عملت أنا إذا معندكش ميزان)
خليهم فوق النار يغليو شوية ثم فرغي عليهم مربعات البمبلوموس و خليهم يطيبوا على نار هادئة حتى تأخذ لون ذهبي جميل و السيرو يكون نوعا ما ثقيل

خليه يبرد ثم خبيه في بلارات


الطعم يجي لذيذ و مختلف و فيه شوية مرارة محببة
شهية طيبة أحبتي