الى الخت ام توبة والى من تريد معرفة طريقة طهي البندراق التقرتية

لينة المتفائلة · 2014-05-19, 19:50

نظرا الى طلبات العضوات عن طريقة طبخح البندراق الخاصة باهل منطقة تقرت
اردت ان ادرج هذا الموضوع لكن للاسف من دون الصور
وجدت بعض الصور في النت فقط سوف ادرجها هنا في الموضوع
وان شاء الله في اقرب الاجال ساضع موضوع اخر مع الصور
نبدا على بركة الله
في الحقيقة البندراق هي شبيهة للسلق

تكون في الاول هكذا

تنقى مثل السلق
لكن لها طريقة خاصة يتم اتباعها حتى تقطع لكن من دون الصور لا استطيع الشرح على العموم تقطع صغيرة جدا
وتغسل جيدا جيدا لانها تكون مملوءة بالتراب
بالنسبة للسهم الاحمر الذي في الصورة
هناك في ذلك المكان المشار اليه يتم فتها لان هناك يجود بها زريعتها كيما نقولو تكون سوداء هاذيك هي الزريعة لي تلقاوها يتم غرسها لتنبت لكم البندراق

يتم تقطيعها صغير جدا
هكذا
الصورة صغيرة جدا اسفة

ناتي الان الى طريقة الطهي
ما نحتاج اليه هو الكابو تحب لكابو هي لازم كمية تكون مليحة + البطاطا + الفول اليابس وليس الاخضر + اللحم تكون فيه الشحم لانو البندراق اساس بنتها الشحم و الكابو اذا توفر عندك ذيل الخروف تجي روعة+ الملح+ فلفل حار اخضر او احمر يابس

طريقة الطهي
في الاناء لي رايحين نطبخو فيه نضع في قاع الاناء الزيت البندراق ثم يليه الفول اليابس ثم يليه الخضر بطاطا و الكابو و الفلفل الحارثم في الاخير اللحم
توضع بهذا الترتيب
نتركها على نار ضعيفة تقلى مع بعض البندراق راح تطلق الماء نتاعها نتركوها كيما هيى تطهى بلا منضيفولها الماء كي تكون قريب طيب او لقيناها نشفت من الماء نتاعها نضيفولها شوية ماء مش بزاف هي لازم تكون عبارة عن كتلة مش جارية ومش ناشفة بزاف ونخليوها تتجمر
نخليوها حتان تطهى الفول و الخضر و اللحم
كي طيب نحيو اللحم نمرس الخضر و البندراق نتاعنا بواسطة ملعقة كبيرة ولا كيما نقولولها لوش نتع الشربة نمرسوةها مليح حتان تكون كامل الخضر متجانسة مع بعضها او ماتقدريش تفرقي الخضر على بعضها

هاذي قبل ما تتمرس مليح

وهنا كي كملنا مرسناها

كاين لي لما طيب يزيدلها شوية حليب سائل و يزيد يخليها تتجمر راح الحليب يزيدلها البنة

اما الكسكس نتاعها يطهى عادي مي حنا في تقرت نديروه شوية ناشف ناقس بخان نتع الماء هذا هو كسكس البندراق

هما طريقة تقديمها

ونقدموها مع الفلفل الحار

اسفة لم تتوفر لدي الصور ان شاء الله نكون فلحت ولو بالقليل باه نوصللكم الطريقة نتاعها

scorpionoir · 2014-05-19, 20:48

كنت نستنى فيك بفارغ الصبر راكي ما طولتيش علينا ربي يفتحها عليك
ربي يخليلك ماماك وسلامي ليها قوليلها ربي ينولك حجة ان شاء الله
واكيد راح نجربها ونقولك

لينة المتفائلة · 2014-05-19, 21:13

ان شاء الله يا ربي شكرا ليك اختي
ان شاء اله تجربيها
وباه نقلك تقدري ديريها بالسلق بصح بنتها متجيش كيما البندراق اكيد البندراق لها ذوق وحدو
ان شاء الله نديروها او نحطلكم الصور نتاعها

أم توبة · 2014-05-20, 15:38

نقولك شكرا 1000 مرة. ربي يحفظك و يعطيك ماتتمناي و ربي يحفظلك ماماك.
راكي طليتي على قلبي و هاذ الوصفة عندي مدة حابة نتعلمها و كي زدت شفت موضوعك زدت تحمست اكثر.ان شاء الله نجربها و نردلك لخبر.
شكرا مرة اخرى حنونة ربي يخليك و ينولك الي في بالك.

لينة المتفائلة · 2014-05-20, 16:10

اقتباس:

المشاركة الأصلية كتبت بواسطة أم توبة

نقولك شكرا 1000 مرة. ربي يحفظك و يعطيك ماتتمناي و ربي يحفظلك ماماك.
راكي طليتي على قلبي و هاذ الوصفة عندي مدة حابة نتعلمها و كي زدت شفت موضوعك زدت تحمست اكثر.ان شاء الله نجربها و نردلك لخبر.
شكرا مرة اخرى حنونة ربي يخليك و ينولك الي في بالك.

ااامين يا ربي امين
شكرا ليك اختي ادعيولي الباك نتاعي العام الجاي ادعيولي ربي يوفقني
وان شاء الله في اقرب الاجال راح نحط الصور
وغدوا ان شاء الله راح ديرلنا ماما المفورة ونحطلكم الطريقة كيما وعدتكم
شكرا ليك اختي ام توبة

mounia hse · 2014-06-02, 01:06

شكرااااااااا
رغم اني لم افهم ماهو البندراق و الكابو
ربي يحفظلك ماماك و يرزقها حجة و ربي ينجحك في دراستك حبوبة

لينة المتفائلة · 2014-06-02, 09:00

ان شاء الله خيتي راني راح نحط طريقة البندراق وراح تفهميمها هي او الكابو

ضحى تسابيح · 2014-06-02, 10:18

ربي يجازيك أختي الكريمة
هي فرصة نكتشف أعشاب مثل إلي حطيتيه البندراق و نتعلم الطهي
و حبيت نقسيق هاد العشبة متوفرة في تقرت برك ....... و لا ...ممكن نلقاها مثلا في غرداية ...

......يعطيك الصحة و الراحة ... صحيتي

لينة المتفائلة · 2014-06-02, 10:21

اختي هي تنبت غير في تقرت وممكن تلقايها في ورقلة لكن احسنهم نتع تقرت في البنة او في كلش نتع ورقلة تجي فيها العروق بزاف وخشينة
اما في اماكن اخرى ماشكيتش لا تلقايها غير ايلا كانو يهبطو لتقرت ولا ممكن بنسبة قليلة تلقايها عند عشاب يبيعها يابسة رح تجيبلك نفس النتيجة في البنة

2014-06-02, 10:51

يعطاك الصحة اختي رغماني معرفتوش
ومنكم نستفيد تسلميييييييييييييييييييييييييييي

لينة المتفائلة · 2014-06-02, 11:07

شكرا لمرورك اختي
راني نجهز في موضوع كيفاه نطبخوه وراح تفهميه ان شاء الله والله روعة
هاذا اكلة نتع تقرت اغلب المناطق الاخرى ميعرفوهش للاسف

ikhlasse25 · 2014-06-02, 11:10

بارك الله فيك اختي وربي ينجحك في مسارك الدراسي

لينة المتفائلة · 2014-06-02, 12:14

ان شاء الله اختي الف شكر لمرورك نورتييي

ana7anane · 2014-06-02, 20:56

السلام عليكم انا حبيت نعطيكم معلومة انو البندراق يسمى في مناطق اخرى البرتقالة بفتح الباء وانا من تقرت و احنا نعملوا البندراق بالبصل و شكرااااا اختي على الوصفة

لينة المتفائلة · 2014-06-02, 21:01

يعني كاينفي المناطق الخرى اختي روحي للموضوع الاخر نتاعي او حطيلهم هاذي المعلومة ايه مام حنا بالبصل لكن نسيتو في هذا الموضوع ربي يجازيك