** الطمينة بأسرار نجاحها من مطبخي**

[faizarbh]

السلام عليكم




راني شفت مؤخرا بعض مواضيع الاخوات الطمينة ما تصلحلهمش و تاني راني وعدت اخت اني نحضرهالها و راني عند وعدي نتمنى تشوف الموضوع و هادي هيا طريقتي اللي علمتهالي ماما و حقيقة انا غير هاذ الطريقة ما ناكلش الطمينة و كل واحد كيفاش يخدمها
المقادير
كيلو سميد تاع مقروط
(السميد ما تشروش داك اللي يجي خشين بزاف كيما تاع قلب اللوز لانو يشرب بزاف و انا هاد الوصفة درتهابتاع قلب اللوز و شربتلي بزااااف
نشرو داك اللي نديرو بيه المقروط و ان لم يتوفر ماعليش )
علبة زبدة تاع 250 غ انا درت صول
1 كيلو عسل لاني درت بالخشين تاع قلب اللوز شربلي كيلو عسل
و حفنة فرينة
شوية كوكاو مطحون و ايلا ما عندكش يمكن نستغناو عليه
و قرفة مطحونة
و لوازم للتزيين
في طاجين نحمص السميد تاعنا حتى يأخذ لون ذهبي ثم نحمص الفرينة
( الفرينة كي نحمصوها راح يخرجولنا كريات نفوتها ف الصيار تهبط المليحة و يبقاو الكريات لاااازم ترموهم ) لاحظوا الصور

هادو نرموهم
ثم نخلط الفرينة مع السميد جيدا حتى يمتازجوا مع بعض


ثم نذوب الزبدة تاعنا و نسخن العسل هنا مانديرش كل العسل ندير نص العلبة و نزيد شوية
ثم ندير حفرة وسط السميد و نفرغ بنفس الوقت العسل و الزبدة انظروا
هنا ماما فرغت و انا صورت




ثم نخلطها جيدا و هنا على حساب السميد كيما قلت سابقا ايلا كان تاع قلب اللوز زيدي ذوبي شوية زبدة و ديري بقية العسل اللي بقاتلك و ايلا كان سميد تاع مقروط ممكن ما تزيديش و كيفاش نعرفوا بلي بزاف عليه ؟؟؟؟؟ تابعوا معي
عندما نخلط مليح و نتحصل على هاد الخليط يعني ناشف نزيد شوية زبدة و نكمل العسل المتبقي

و نضيف الكوكاو المطحون و مغرف قرفة و نخلط الكل
و ايلا الخليط خرجلنا بهاد الشكل يعني جاري هاداهو الافضل نخلطوه و نخلوه حتى لليوم الموالي يكون شرب مليح و دخلت فيه العسل و الزبدة و نشكلوه كيما نحبوا

و هنا راه جاهز
هادي ما خلاهاش اخي تبات و تنشف كلاها دون انتظار ههههه


و هنا غدوة من ذاك شكلتها و كي تاكليها تحسي انها مكرملة يم يم يم





ان شاء الله يكون الشرح وافي
تقبلوا تحياتي
و شكرا